നായയെ സ്​കൂട്ടറിൽ കെട്ടിവലിച്ച്​ ക്രൂരത; വാഹനം തടഞ്ഞപ്പോൾ ഉപേക്ഷിച്ച്​ കടന്നു

പഞ്ചാബിലെ പാട്യാലയിൽ നായയെ സ്​കൂട്ടറിൽ കെട്ടിവലിച്ച് ക്രൂരത. സ്​കൂട്ടറിൽ സഞ്ചരിക്കുന്ന സ്​ത്രീകൾ നായയെ കയറുകൊണ്ട്​ കെട്ടിവലിക്കുകയായിരുന്നു. സി.സി.ടി.വിയിൽ ദൃ​ശ്യങ്ങൾ പതിഞ്ഞതോടെയാണ്​ ക്രൂരത പുറംലോകമറിഞ്ഞത്​.

പാട്യാല ന്യൂ സെഞ്ചുറി എൻക്ലേവിലൂടെ രണ്ട്​ സ്​ത്രീകളാണ്​ സ്​കൂട്ടറിൽ നായയെ കെട്ടിവലിച്ചുകൊണ്ട്​ പോയത്​. ഇതുകണ്ട പ്രദേശത്തെ കുട്ടികൾ വാഹനം തടയുകയായിരുന്നുവെന്ന്​ പൊലീസ്​ പറയുന്നു. ഇതോടെ സ്​ത്രീകൾ പരിക്കേറ്റ നായയെ ഉപേക്ഷിച്ച്​ കടന്നുകളഞ്ഞു. പരിക്കേറ്റ നായയെ അധികൃതർ ആശുപത്രിയിലെത്തിച്ചു.

മൃഗങ്ങളോടുള്ള ക്രൂരത തടയൽ നിയമപ്രകാരം സംഭവത്തിൽ കേസ്​ എടുത്തതായി സെഞ്ചുറി എൻക്ലേവ്​ പൊലീസ്​ സ്​റ്റേഷൻ എസ്​.എച്ച്​.ഒ ഗുർമീത്​ സിങ്​ പറഞ്ഞു. സ്​ത്രീകൾക്കായുള്ള അന്വേഷണം ആരംഭിച്ചിട്ടുണ്ട്​.