'തെറ്റുകൾ കണ്ടെത്തിയാൽ വോട്ടെടുപ്പിന് മുമ്പ് ചൂണ്ടിക്കാട്ടണമായിരുന്നു'; വോട്ട് അട്ടിമറിയിൽ പ്രതികരണവുമായി തെരഞ്ഞെടുപ്പ് കമ്മീഷൻ

ന്യൂഡൽഹി: 2024 ലോകസഭാ തെരഞ്ഞെടുപ്പിൽ വോട്ടർ പട്ടികയിൽ കൃത്രിമം നടന്നുവെന്ന പ്രതിപക്ഷത്തിന്റെ വെളിപ്പെടുത്തലിൽ മറുപടിയുമായി തെരഞ്ഞെടുപ്പ് കമ്മീഷൻ. വോട്ടർ പട്ടികയിൽ എന്തെങ്കിലും തെറ്റുകൾ കണ്ടെത്തിയാൽ വോട്ടെടുപ്പിന് മുമ്പ് ചൂണ്ടിക്കാട്ടണമായിരുന്നുവെന്ന് ഇന്ത്യൻ തെരഞ്ഞെടുപ്പ് കമ്മീഷൻ പുറത്തിറക്കിയ പ്രസ്താവനയിൽ പറഞ്ഞു.

'അടുത്തിടെ ചില രാഷ്ട്രീയ പാർട്ടികളും വ്യക്തികളും മുൻകാലങ്ങളിൽ തയ്യാറാക്കിയ വോട്ടർ പട്ടികയിലെ പിശകുകളെക്കുറിച്ച് പ്രശ്നങ്ങൾ ഉന്നയിക്കുന്നുണ്ട്.' കമ്മീഷൻ പുറത്തിറക്കിയ പ്രസ്താവനയിൽ പറയുന്നു. 'വോട്ടർ പട്ടിക സംബന്ധിച്ച ഏതൊരു പ്രശ്നവും ഉന്നയിക്കാൻ ഉചിതമായ സമയം അതിരക്കിയ സമയം തന്നെയായിരിക്കും. എല്ലാ രാഷ്ട്രീയ പാർട്ടികളുമായും സ്ഥാനാർത്ഥികളുമായും വോട്ടർ പട്ടിക പങ്കിടുന്നതിന്റെ പിന്നിലെ കൃത്യമായ ലക്ഷ്യവും അതുതന്നെയാണ്. ശരിയായ സമയത്ത് ഈ പ്രശ്നങ്ങൾ ശരിയായ മാർഗങ്ങളിലൂടെ ഉന്നയിച്ചിരുന്നെങ്കിൽ ബന്ധപ്പെട്ട എസ്ഡിഎം/ഇആർഒമാർക്ക് തെറ്റുകൾ യഥാർത്ഥമാണെങ്കിൽ തെരഞ്ഞെടുപ്പുകൾക്ക് മുന്നേ തന്നെ തിരുത്താൻ പ്രാപ്തമാക്കുമായിരുന്നു.' പ്രസ്താവന കൂട്ടിച്ചേർത്തു.

കരട് വോട്ടർ പട്ടിക പ്രസിദ്ധീകരിച്ചതിനുശേഷം അതിന്റെ ഡിജിറ്റൽ, ഭൗതിക പകർപ്പുകൾ എല്ലാ രാഷ്ട്രീയ പാർട്ടികളുമായും പങ്കിടുകയും ഇസിഐ വെബ്‌സൈറ്റിൽ പ്രസിദ്ധീകരിക്കുകയും ചെയ്യുമെന്ന് വോട്ടെടുപ്പ് സമിതി അറിയിച്ചു. 'കരട് ER പ്രസിദ്ധീകരിച്ചതിനുശേഷം അന്തിമ ER പ്രസിദ്ധീകരിക്കുന്നതിന് മുമ്പ് അവകാശവാദങ്ങളും എതിർപ്പുകളും സമർപ്പിക്കുന്നതിന് വോട്ടർമാർക്കും രാഷ്ട്രീയ പാർട്ടികൾക്കും ഒരു മാസത്തെ മുഴുവൻ സമയവും ലഭ്യമാണ്.' കമ്മീഷൻ പറഞ്ഞു.