അസമിൽ ഇനി മുസ്ലിം വിവാഹങ്ങൾ നിർബന്ധമായി രജിസ്റ്റർ ചെയ്യണം; പുതിയ ചട്ടങ്ങൾക്ക് മന്ത്രിസഭയുടെ അംഗീകാരം

ഗുവാഹത്തി: അസമിൽ മുസ്ലിം വിവാഹങ്ങളുടെ രജിസ്ട്രേഷൻ നിർബന്ധമാക്കുന്നതിനുള്ള പുതിയ ചട്ടങ്ങൾക്ക് സംസ്ഥാന മന്ത്രിസഭ അംഗീകാരം നൽകി. ‘Assam Muslim Marriage Registration (Compulsory) Rules, 2026’ ആണ് മന്ത്രിസഭ അംഗീകരിച്ചത്. ഇതോടെ സംസ്ഥാനത്ത് മുസ്ലിം വിവാഹങ്ങളുടെ രജിസ്ട്രേഷൻ സർക്കാർ സംവിധാനത്തിലൂടെ നിർബന്ധമായും നടത്തേണ്ട സാഹചര്യമാകും.

മുഖ്യമന്ത്രി ഹിമന്ത ബിശ്വ ശർമയാണ് മന്ത്രിസഭാ യോഗത്തിന് ശേഷം ഇക്കാര്യം അറിയിച്ചത്. ഇനി മുസ്ലിം വിവാഹങ്ങൾ സർക്കാർ നിയമിക്കുന്ന Marriage Registrars മുഖേനയാണ് രജിസ്റ്റർ ചെയ്യുകയെന്ന് മുഖ്യമന്ത്രി വ്യക്തമാക്കി. രജിസ്ട്രേഷനുള്ള അപേക്ഷകൾ വർധിച്ചാൽ പഞ്ചായത്തുതല ഉദ്യോഗസ്ഥർക്കും രജിസ്ട്രാറുടെ ചുമതല നൽകുന്ന സംവിധാനം ഒരുക്കുമെന്നും അദ്ദേഹം പറഞ്ഞു.

നേരത്തെ മുസ്ലിം വിവാഹങ്ങൾ രജിസ്റ്റർ ചെയ്യുന്നതിൽ ‘ഖാസിമാർ’ക്ക് പങ്കുണ്ടായിരുന്നു. എന്നാൽ 2024ലെ നിയമത്തിലൂടെ സർക്കാർ സംവിധാനത്തിന് കീഴിലേക്ക് രജിസ്ട്രേഷൻ മാറ്റാനുള്ള നടപടികൾ ആരംഭിച്ചു. ഖാസിമാർ വിവാഹം രജിസ്റ്റർ ചെയ്യുന്നത് വിലക്കിയിരുന്നെങ്കിലും പകരം ആരാണ് രജിസ്ട്രേഷൻ നടത്തേണ്ടതെന്നതിൽ വ്യക്തമായ സംവിധാനം ഉണ്ടായിരുന്നില്ല. പുതിയ ചട്ടങ്ങളിലൂടെയാണ് ഇതിന് ഔദ്യോഗിക നടപടിക്രമം ഒരുക്കുന്നത്.

പുതിയ ചട്ടങ്ങൾ Assam Compulsory Registration of Muslim Marriages and Divorces Act, 2024 പ്രകാരമാണ് തയ്യാറാക്കിയിരിക്കുന്നത്. 1935ലെ Assam Muslim Marriages and Divorces Registration Act ന് പകരമായാണ് 2024ലെ നിയമം കൊണ്ടുവന്നത്.

നിയമപ്രകാരം വിവാഹ രജിസ്ട്രേഷനിൽ വരന് കുറഞ്ഞത് 21 വയസും വധുവിന് 18 വയസും പൂർത്തിയായിരിക്കണം. ഇരുവരുടെയും സ്വതന്ത്ര സമ്മതം ഉൾപ്പെടെയുള്ള നിബന്ധനകളും നിയമത്തിലുണ്ട്. പ്രായപൂർത്തിയാകാത്തവരുടെ വിവാഹം രജിസ്റ്റർ ചെയ്യുന്നതിനുള്ള സാധ്യത പുതിയ നിയമം ഒഴിവാക്കുന്നു.

വിവാഹ രജിസ്ട്രേഷനുമായി ബന്ധപ്പെട്ട നോട്ടീസ് പ്രസിദ്ധീകരിച്ചതിന് ശേഷം 30 ദിവസത്തിനുള്ളിൽ എതിർപ്പ് ഉന്നയിക്കാനുള്ള അവസരവും നിയമം നൽകുന്നു. എതിർപ്പ് ലഭിച്ചാൽ രജിസ്ട്രാർ അത് പരിശോധിച്ച ശേഷമായിരിക്കും തുടർനടപടി സ്വീകരിക്കുക.

വിവാഹങ്ങൾക്ക് പുറമെ മുസ്ലിം വിവാഹമോചനങ്ങളുടെ രജിസ്ട്രേഷനും 2024ലെ നിയമത്തിന്റെ പരിധിയിൽ നിർബന്ധമാക്കിയിട്ടുണ്ട്. പുതിയ ചട്ടങ്ങളോടെ വിവാഹ-വിവാഹമോചന രജിസ്ട്രേഷൻ നടപടികൾക്ക് സംസ്ഥാനതലത്തിൽ ഏകീകൃത സംവിധാനം നിലവിൽ വരികയാണ്.

അസമിലെ മുസ്ലിം വിവാഹങ്ങളുടെ രജിസ്ട്രേഷൻ സർക്കാർ സംവിധാനത്തിലേക്ക് പൂർണമായി മാറ്റുന്നതിന്റെ അടുത്ത ഘട്ടമായാണ് 2026ലെ പുതിയ ചട്ടങ്ങളുടെ അംഗീകാരം.