ചിക്കാഗോ: കേരളത്തിന്റെ അഴിമതിവിരുദ്ധ പോരാളിയെന്നും ഫയർബ്രാൻഡ് ഉദ്യോഗസ്ഥനെന്നും പരക്കെ അറിയപ്പെടുന്ന ഐഎഎസ് ഉദ്യോഗസ്ഥൻ ഡോ.രാജു നാരായണ സ്വാമി എഴുതിയ പുസ്തകം 'Intellectual Property Rights: Musings of an Amateur Enthusiast' വ്യാപകമായ ശ്രദ്ധ നേടുന്നു. ബൗദ്ധിക സ്വത്തവകാശ മേഖലയിലെ പേറ്റന്റ് ദുരുപയോഗം, ബ്ലോക്ക് ചെയിൻ എഐ ഐപി ഇന്റർഫേസ്, കലാകാരന്മാരുടെ അവകാശങ്ങൾ, യൂട്ടിലിറ്റി മോഡലുകൾ, ആഗോളതലത്തിലെ പേറ്റന്റ് യോഗ്യതാ മാനദണ്ഡങ്ങൾ തുടങ്ങി വൈവിധ്യമാർന്ന നിരവധി വിഷയങ്ങൾ ഈ പുസ്തകം കൈകാര്യം ചെയ്യുന്നു. ബൗദ്ധിക സ്വത്തവകാശ നിയമങ്ങളുമായി ബന്ധപ്പെട്ട് വിവിധ രാജ്യങ്ങളിലെ കോടതികൾ പുറപ്പെടുവിച്ച പ്രധാനപ്പെട്ട വിധിന്യായങ്ങളെക്കുറിച്ചും ഇതിൽ പ്രതിപാദിക്കുന്നുണ്ട്. ചിക്കാഗോയിൽ നടന്ന ചടങ്ങിൽ ഇന്ത്യൻ കോൺസുൽ ജനറൽ ശ്രീ സോമനാഥ് ഘോഷ് ആണ് പുസ്തകം പ്രകാശനം ചെയ്തത്.
രാജു നാരായണ സ്വാമി രചിക്കുന്ന 37-ാമത് പുസ്തകമാണിത്. കേന്ദ്ര സാഹിത്യ അക്കാദമി അവാർഡ് നേടിയ 'ശാന്തിമന്ത്രം മുഴങ്ങുന്ന താഴ്‌വരയിൽ' എന്ന യാത്രാവിവരണവും, സംസ്ഥാന ബാലസാഹിത്യ പുരസ്കാരം നേടിയ 'നീലക്കുറിഞ്ഞി: ഒരു വ്യാഴവട്ടത്തിലെ വസന്തം' എന്നിവ അദ്ദേഹത്തിന്റെ മുൻകാല കൃതികളിൽ ചിലതാണ്.
ഇന്ത്യൻ തെരഞ്ഞെടുപ്പ് കമ്മീഷന്റെ സെൻട്രൽ ഒബ്സർവറായി റെക്കോർഡ് എണ്ണമായ 38 തവണ ഡ്യൂട്ടി അനുഷ്ഠിച്ചതിലൂടെ ഡോ. രാജു നാരായണ സ്വാമി അടുത്തിടെ വാർത്തകളിൽ ഇടം നേടിയിരുന്നു. ഇതിൽ 2018ലെ സിംബാബ്‌വെ തെരഞ്ഞെടുപ്പിലെ അന്താരാഷ്ട്ര നിരീക്ഷകന്റെ ചുമതലയും ഉൾപ്പെടുന്നു. ബൗദ്ധിക സ്വത്തവകാശ നിയമത്തിലെ പാണ്ഡിത്യത്തിന് ജോർജ് മേസൺ യൂണിവേഴ്സിറ്റിയുടെ കീഴിലുള്ള 'സെന്റർ ഫോർ ഇന്റലക്ച്വൽ പ്രോപ്പർട്ടി ആൻഡ് ഇന്നൊവേഷൻ പോളിസി' ഏർപ്പെടുത്തിയ പ്രശസ്തമായ 'ലിയോനാർഡോ ഡാവിഞ്ചി ഫെലോഷിപ്പ്' 2021ൽ അദ്ദേഹത്തിന് ലഭിക്കുകയുണ്ടായി.
അഴിമതിക്കെതിരെയുള്ള പോരാട്ടത്തിന് ഐഐടി കാൺപൂർ നൽകുന്ന 2018ലെ 'സത്യേന്ദ്ര കെ. ദുബെ മെമ്മോറിയൽ അവാർഡും' സ്വാമിക്ക് ലഭിച്ചിട്ടുണ്ട്. കൂടാതെ, സൈബർ നിയമത്തിലെ മികവിന് പ്രശസ്തമായ 'ഹോമി ഭാഭ ഫെലോഷിപ്പും' അദ്ദേഹം നേടി. ഇത് താണു പത്മനാഭനെപ്പോലെയുള്ള പ്രമുഖരുടെ നിരയിലേക്ക് അദ്ദേഹത്തെ എത്തിച്ചു.
ഗ്രാമവികസനം, വിദ്യാഭ്യാസം, ആരോഗ്യം എന്നീ മേഖലകളിലെ നിരവധി പ്രധാന നയങ്ങളും പദ്ധതികളും നടപ്പിലാക്കുന്നതിൽ സ്വാമി നിർണായക പങ്ക് വഹിച്ചിട്ടുണ്ട്. ഭരണരംഗത്ത് സാങ്കേതികവിദ്യയുടെ ഉപയോഗം, ജനപങ്കാളിത്തം, സുതാര്യത, ഉത്തരവാദിത്തം എന്നിവ ഉറപ്പാക്കുന്നതിലെ അദ്ദേഹത്തിന്റെ നൂതനവും സജീവവുമായ സമീപനവും ഏറെ ശ്രദ്ധേയമാണ്.