'ഈ സ്നേഹം മറക്കില്ല': പ്രതിസന്ധി ഘട്ടത്തിൽ ഒപ്പം നിന്ന ഇന്ത്യക്ക് നന്ദി പറഞ്ഞ് ഇറാൻ എംബസി

ന്യൂഡൽഹി:അമേരിക്കയുടെയും ഇസ്രായേലിന്റെയും സംയുക്ത ആക്രമണത്തിൽ തകർന്ന ഇറാനെ സഹായിക്കാൻ മുന്നിട്ടിറങ്ങിയ ഇന്ത്യൻ ജനതയ്ക്ക് നന്ദി അറിയിച്ച് ഇന്ത്യയിലെ ഇറാനിയൻ എംബസി. "നന്ദി ഇന്ത്യ" എന്ന് എക്സ് പ്ലാറ്റ്‌ഫോമിൽ കുറിച്ച എംബസി, കശ്മീരിലെ ജനങ്ങൾ പ്രകടിപ്പിക്കുന്ന ഐക്യദാർഢ്യത്തെ പ്രത്യേകിച്ച് പ്രശംസിച്ചു.

കശ്മീരിലെ കൊച്ചു കുട്ടികൾ തങ്ങളുടെ സമ്പാദ്യക്കുടുക്കകൾ ഇറാന് സഹായമായി നൽകുന്ന വീഡിയോകൾ സോഷ്യൽ മീഡിയയിൽ വ്യാപകമായി പ്രചരിച്ചിരുന്നു. ഈ വീഡിയോകൾ പങ്കുവെച്ചുകൊണ്ടാണ് ഇറാൻ്റെ ഇന്ത്യയിലെ എംബസി നന്ദി പറഞ്ഞിരിക്കുന്നത്. "കൃതജ്ഞത നിറഞ്ഞ ഹൃദയത്തോടെ ഞങ്ങൾ കശ്മീരിലെ ജനങ്ങളോട് നന്ദി പറയുന്നു. ഇറാനിലെ ജനങ്ങൾക്കൊപ്പം നിൽക്കുന്ന നിങ്ങളുടെ ഈ സ്നേഹം ഒരിക്കലും മറക്കില്ല," എംബസി കുറിച്ചു. തന്റെ സമ്പാദ്യക്കുടുക്കയുമായി നിൽക്കുന്ന ഒരു കൊച്ചു പെൺകുട്ടിയുടെ വീഡിയോ പങ്കുവെച്ചുകൊണ്ട് "ദൈവം നിങ്ങളെ അനുഗ്രഹിക്കട്ടെ" എന്നും എംബസി കുറിച്ചു.