ജയ്പൂര്: തൻ്റെ ഉത്തരവാദിത്തത്തിലുള്ള ഏഴ് സീറ്റുകളിൽ ഏതെങ്കിലും ബി.ജെ.പിക്ക് നഷ്ടപ്പെട്ടാൽ ക്യാബിനറ്റ് സ്ഥാനം രാജിവയ്ക്കുമെന്ന് രാജസ്ഥാൻ മന്ത്രി കിരോഡി ലാൽ മീണ.കിഴക്കൻ രാജസ്ഥാനിൽ താൻ കഠിനാധ്വാനം ചെയ്ത ഏഴ് സീറ്റുകളുടെ പട്ടിക പ്രധാനമന്ത്രി നരേന്ദ്ര മോദി തനിക്ക് നൽകിയിട്ടുണ്ടെന്നും അദ്ദേഹം പറഞ്ഞു.
കിഴക്കൻ രാജസ്ഥാനിലെ ദൗസ, ഭരത്പൂർ, ധോൽപൂർ, കരൗലി, അൽവാർ, ടോങ്ക്-സവായ്മാധോപൂർ, കോട്ട-ബുണ്ടി തുടങ്ങിയ സീറ്റുകളിലാണ് കൃഷി, ഗ്രാമവികസന മന്ത്രിയായ കിരോഡി ലാല് പ്രചാരണം നടത്തിയത്.''പ്രധാനമന്ത്രി ദൗസയിൽ വരുന്നതിന് മുമ്പ്, (ദൗസ) സീറ്റ് നേടിയില്ലെങ്കിൽ മന്ത്രി സ്ഥാനം ഒഴിയുമെന്ന് ഞാൻ പറഞ്ഞിരുന്നു. പിന്നീട് പ്രധാനമന്ത്രി എന്നോട് പ്രത്യേകം സംസാരിച്ച് ഏഴ് സീറ്റുകളുടെ ലിസ്റ്റ് തന്നു. ഞാൻ 11 സീറ്റുകളിൽ കഠിനാധ്വാനം ചെയ്തു. പ്രധാനമായും ഏഴ് സീറ്റുകളാണ് ലക്ഷ്യം വച്ചത്. ഏഴിൽ ഒരു സീറ്റെങ്കിലും പാർട്ടിക്ക് നഷ്ടമായാൽ ഞാൻ മന്ത്രിസ്ഥാനം രാജിവയ്ക്കും'' അദ്ദേഹം കൂട്ടിച്ചേര്ത്തു. ബാർമർ, ചുരു തുടങ്ങിയ ചില സീറ്റുകളിൽ സംശയമുണ്ടെന്നും അത് അംഗീകരിക്കേണ്ടിവരുമെന്നും കിരോഡി ലാല് വിശദമാക്കി.
കഴിഞ്ഞ രണ്ട് ലോക്സഭാ തെരഞ്ഞെടുപ്പുകളിലും രാജസ്ഥാനിൽ കോൺഗ്രസിന് ഒരു സീറ്റ് പോലും ലഭിച്ചില്ല. 2019ലെ പൊതുതിരഞ്ഞെടുപ്പിൽ 25 സീറ്റുകളിലും ബി.ജെ.പി നേതൃത്വത്തിലുള്ള എൻഡിഎ വിജയിക്കുകയും 2014ൽ ബി.ജെ.പി എല്ലാ സീറ്റുകളിലും വിജയിക്കുകയും ചെയ്തു.