'ശക്തമായി അപലപിക്കുന്നു, അടിയന്തിര നടപടി​ വേണം';ചാമ്പ്യൻസ് ലീഗിലെ വംശീയ അധിക്ഷേപത്തിനെതിരെ ഉർദുഗാൻ

ചാമ്പ്യൻസ് ലീഗിൽ പി.എസ്.ജി (പാരിസ്​ സെൻറ്​ ജെർമൈൻ)-ഇസ്താംബൂൾ ബസക്സ‍ഹിർ മത്സരത്തിനിടെ ഉയർന്ന വംശീയാധിക്ഷേപ ആരോപണത്തിൽ പ്രതികരണവുമായി തുർക്കി പ്രസിഡൻറ്​ റജബ്​ ത്വയ്യിബ്​ ഉർദുഗാൻ. വംശീയാധിക്ഷേപത്തിൽ പ്രതിഷേധിച്ച്​​ ആദ്യം ബസക്​സഹിർ താരങ്ങളും പിന്നീട്​ പി.എസ്​.ജി താരങ്ങളും ഗ്രൗണ്ടിൽ നിന്നും ഇറങ്ങി​പ്പോയതി​നെ തുടർന്ന്​ മത്സരം മാറ്റിവെച്ചിരുന്നു. കളി തുടങ്ങി പതിനാലാം മിനിറ്റിലായിരുന്നു സംഭവം. ടീമിന്‍റെ അസിസ്റ്റന്‍റ് കോച്ച് പിയറെ വെബോവിനെതിരെയായിരുന്നു നാലാം മാച്ച് ഒഫീഷ്യല്‍ സെബാസ്റ്റ്യന്‍ കോള്‍ടെസ്ക്യു വംശീയ അധിക്ഷേപം നടത്തിയെന്ന് ആരോപണമുയര്‍ന്നത്.

''ബസക്​സഹിറർ സ്​റ്റാഫ്​ പിയറെ വെബോവിനെതിരായ വംശീയാധിക്ഷേപത്തെ ഞാൻ ശക്തമായി അപലപിക്കുന്നു. യുവേഫ അടിയന്തിര നടപടികൾ സ്വീകരിക്കുമെന്നാണ് വിശ്വസിക്കുന്നത്​'' -ഉർദുഗാൻ ട്വീറ്റ്​ ചെയ്​തു.

മത്സരത്തിലെ നാലാം മാച്ച് ഒഫീഷ്യൽ ഇസ്താംബൂൾ ബസക്സഹീർ സഹപരിശീലകനെ വംശീയമായി അധിക്ഷേപിക്കുകയായിരുന്നു. ടീമിന് പിന്തുണ പ്രഖ്യാപിച്ച് പിഎസ്ജി താരങ്ങളും കളംവിട്ടതോടെ മത്സരം മാറ്റിവെക്കാൻ തീരുമാനിക്കുകയായിരുന്നു. ഇതിൽ പ്രതിഷേധിച്ച്​ കളം വിട്ട ബസക്​സഹിർ താരങ്ങൾ പത്ത്​ മിനിറ്റോളം കോച്ച്​ ഒവിഡ്യു ഹാറ്റഗനുമായി ചർച്ച നടത്തിയ ശേഷം കളി ബഹിഷ്​കരിക്കാൻ തീരുമാനിക്കുകയായിരുന്നു. ഇവർക്ക്​ പിന്തുണ പ്രഖ്യാപിച്ച് പി.എസ്.ജി താരങ്ങളും കളംവിട്ടതോടെ മത്സരം മാറ്റിവെക്കാൻ തീരുമാനിച്ചു. സംഭവത്തിൽ സമഗ്രമായ അന്വേഷണം നടത്തുമെന്നും ഫുട്​ബാളിൽ വംശീയ അധിക്ഷേപത്തിന്​ സ്​ഥാനമില്ലെന്നും യുവേഫ ​പ്രതികരിച്ചു. രണ്ട്​ ക്ലബുകളുമായും ചർച്ച നടത്തിയ യുവേഫ അധികൃതർ ബാക്കി സമയത്തെ മത്സരം പുതിയ മാച്ച്​ ഒഫീഷ്യലുകളെ ഉൾപ്പെടുത്തി ബുധനാഴ്ച പ്രാദേശിക സമയം വൈകീട്ട്​ 6.55ന്​ നടത്താൻ തീരുമാനിച്ചു.