കനത്ത മഴ: 10 ഡാമുകളുടെ കൂടി ഷട്ടറുകള് തുറന്നു
ഇടുക്കി ഡാമിലെ ജലനിരപ്പ് രണ്ട് അടി കൂടി ഉയര്ന്നാല് ഓറഞ്ച് അലര്ട്ട് പ്രഖ്യാപിക്കും.
Update: 2021-10-17 02:00 GMT
ശക്തമായ മഴ തുടരുന്ന സാഹചര്യത്തില് സംസ്ഥാനത്തെ 10 ഡാമുകളുടെ കൂടി ഷട്ടറുകള് തുറന്നു. നെയ്യാര്, പേപ്പാറ, അരുവിക്കര, കല്ലാര്കുട്ടി, പോത്തുണ്ടി, മലമ്പുഴ, പെരിങ്ങല്ക്കുത്ത്, പീച്ചി, മൂഴിയാര്, വാഴാനി എന്നീ ഡാമുകളാണ് തുറന്നത്. കക്കി-ആനത്തോട് ഡാം ഇന്ന് ഉച്ചയോടെ തുറക്കും. ഇടുക്കി ഡാമിലെ ജലനിരപ്പ് രണ്ട് അടി കൂടി ഉയര്ന്നാല് ഓറഞ്ച് അലര്ട്ട് പ്രഖ്യാപിക്കും.
നെയ്യാർ ഡാമിന്റെ ഷട്ടറുകൾ നിലവിൽ 520 സെന്റീമീറ്റര് ഉയർത്തിയിട്ടുണ്ട്. ഉടൻ തന്നെ 80 സെന്റീമീറ്റര് കൂടി ഉയർത്തുമെന്ന് ജില്ലാ കളക്ടർ അറിയിച്ചു. നിലവില് മലമ്പുഴ ഡാമിലെ എല്ലാ ഷട്ടറുകളും 15 സെന്റീമീറ്റർ വീതവും പോത്തുണ്ടി ഡാമിലെ ഷട്ടറുകള് 5 സെന്റീമീറ്റര് വീതവും തുറന്നിട്ടുണ്ട്.
ഇന്ന് റെഡ് അലര്ട്ടില്ല
അറബിക്കടലില് രൂപം കൊണ്ട ന്യൂനമര്ദത്തിന്റെ പ്രഭാവത്തില് ഇന്നും കേരളത്തില് ശക്തമായ മഴക്ക് സാധ്യതയെന്നാണ് അറിയിപ്പ്. തിങ്കളാഴ്ചയോടെ മഴ കുറയാന് സാധ്യതയുണ്ട്. ജില്ലകളില് ഇന്ന് റെഡ് അലര്ട്ടില്ല. 7 ജില്ലകളില് യൊല്ലോ അലര്ട്ട്. പത്തനംതിട്ട, ആലപ്പുഴ, കോട്ടയം, ഇടുക്കി, മലപ്പുറം, കണ്ണൂര്, കാസര്കോട് ജില്ലകളിലാണ് യെല്ലോ അലര്ട്ട്.
ഇന്നലെ പെയ്ത അതിശക്ത മഴയില് കനത്ത നാശ നഷ്ടമുണ്ടായി. മഴക്കെടുതി നാശം വിതച്ച പ്രദേശങ്ങളില് കൂടുതല് ദുരിതാശ്വാസ ക്യാമ്പുകള് തുറന്നു. തിങ്കളാഴ്ച നടക്കാനിരുന്ന സര്വകലാശാല പരീക്ഷകള് മാറ്റിവക്കും. കോളജുകളിലെ മറ്റു ക്ലാസുകള് തുറക്കുന്നത് 20ലേക്ക് നീട്ടിയിട്ടുണ്ട്. ശബരിമല തീര്ത്ഥാടനവും 19 വരെയുണ്ടാകില്ല. സൈന്യം കോട്ടയത്ത് രക്ഷാ പ്രവര്ത്തനം തുടരുകയാണ്. കൂടുതല് എന്.ഡി.ആര്.എഫ് സംഘത്തെയും കെടുതി പ്രദേശങ്ങളില് വിന്യസിച്ചു.