പാലക്കാട്: പാലക്കാട് കോട്ടായിയിൽ ആലിനും ആരിവേപ്പിനും കല്യാണം. കോട്ടായി പുളിനെല്ലി അഞ്ചുമൂർത്തി ക്ഷേത്രത്തിലാണ് ഈ വിവാഹം നടന്നത്. ആലാണ് വരൻ, ആരിവേപ്പായിരുന്നു വധു. കോട്ടായിയിലെ ഒരു കുടുംബത്തിലെ മംഗല്യ സൗഭാഗ്യ പ്രാർഥനയുടെ ഭാഗമായാണ് ചടങ്ങ് നടന്നത്.
പാനാവൂർ പരമേശ്വരൻ നമ്പൂതിരിപ്പാടാണ് ചടങ്ങുകൾക്ക് നേതൃത്വം നൽകിയത്. നാദസ്വരത്തിന്റെ അകമ്പടിയോടെ വരനായി സങ്കൽപിക്കുന്ന ആലിന്റെ ഭാഗത്ത് ദേശക്കാരും വധുവായി സങ്കൽപിക്കുന്ന ആരിവേപ്പിന്റെ ഭാഗത്ത് വഴിപാട് സമർപ്പിച്ച കുടുംബവും ചടങ്ങിന് സാക്ഷ്യം വഹിച്ചു. തുടർന്ന് വധുവായി സങ്കൽപിക്കുന്ന ആരിവേപ്പിന് സ്വർണാഭരണം അണിയിക്കലും പുടവ ഉടുപ്പിക്കലും നടന്നു. ശേഷം 'ആൽമരം ആരിവേപ്പിന്' താലിചാർത്തി. ചടങ്ങുകളുടെ ഭാഗമായി കല്യാണസദ്യയും വിളമ്പി.