അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയ കേസ്; ദിലീപിന്റെ മുന്കൂര് ജാമ്യാപേക്ഷ ഇന്ന് പരിഗണിക്കും
ഇന്നലെ പരിഗണിച്ചെങ്കിലും വിശദമായ വാദം കേള്ക്കേണ്ടതിനാല് ഓണ്ലൈനായി വേണ്ടെന്ന് കോടതി തീരുമാനിക്കുകയായിരുന്നു
Update: 2022-01-22 01:16 GMT
നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന് ഗൂഡാലോചന നടത്തിയെന്ന കേസില് നടന് ദിലീപ് സമര്പ്പിച്ച മുന്കൂര് ജാമ്യാപേക്ഷ ഹൈക്കോടതി ഇന്ന് പരിഗണിക്കും. രാവിലെ 10.15ന് ജസ്റ്റിസ് പി ഗോപിനാഥ് പ്രത്യേക സിറ്റിങ്ങാണ് നിശ്ചയിച്ചിരിക്കുന്നത്.
ദിലീപടക്കമുള്ള ആറ് പ്രതികളുടെ മുന്കൂര് ജാമ്യപേക്ഷ ഇന്നലെ പരിഗണിച്ചെങ്കിലും വിശദമായ വാദം കേള്ക്കേണ്ടതിനാല് ഓണ്ലൈനായി വേണ്ടെന്ന് കോടതി തീരുമാനിക്കുകയായിരുന്നു. ഒന്നാം പ്രതി ദിലീപിനൊപ്പം സഹോദരന് അനൂപ്, സഹോദരി ഭര്ത്താവ് സൂരജ്, സുഹൃത്ത് ബാബു ചെങ്ങമനാട് എന്നിവരുടെ ഹര്ജികളാണ് പരിഗണിക്കുന്നത്.
അന്വേഷണ ഉദ്യോഗസ്ഥര് വ്യക്തിവൈരാഗ്യം തീര്ക്കുകയാണെന്നും കളളക്കേസാണെന്നുമാണ് ദിലീപടക്കമുളള പ്രതികളുടെ വാദം. എന്നാല് നടിയെ ആക്രമിച്ച കേസിന്റെയും അന്വേഷണ ഉദ്യോഗസ്ഥരെ അപായപ്പെടുത്താന് ഗൂഡാലോചന നടത്തിയതിന്റെയും ബുദ്ധി കേന്ദ്രം ദിലീപാണെന്നാണ് പ്രോസിക്യൂഷന് നിലപാട്. ഈ സാഹചര്യത്തില് കസ്റ്റഡിയിലെടുത്ത് ചോദ്യം ചെയ്യണമെന്നാണ് ആവശ്യപ്പെടുക. ഇതിനിടെ ഹൈക്കോടതി പുതുതായി വിസ്തരിക്കാന് അനുവദിച്ച നാലുപേരോട് ഇന്ന് ഹാജരാകാന് വിചാരണക്കോടതി ആവശ്യപ്പെട്ടിട്ടുണ്ട്.