Photo| Special Arrangement
കൊച്ചി: മഞ്ചേശ്വരം തെരഞ്ഞെടുപ്പ് കോഴക്കേസിൽ ബിജെപി നേതാവ് കെ സുരേന്ദ്രന് ഹൈക്കോടതി നോട്ടീസ്. കുറ്റപത്രം തള്ളിയതിനെതിരായ സര്ക്കാര് അപ്പീല് ഫയലില് സ്വീകരിച്ചാണ് ഹൈക്കോടതി നടപടി. ഹരജി ഈ മാസം 30ന് വീണ്ടും പരിഗണിക്കും.
ബിജെപി മുന് സംസ്ഥാന പ്രസിഡന്റ് കെ. സുരേന്ദ്രനെ പ്രതിപ്പട്ടികയില് നിന്നൊഴിവാക്കിയ കാസര്കോട് അഡീഷണല് സെഷന്സ് കോടതിയുടെ വിധിക്കെതിരെയാണ് സർക്കാർ അപ്പീല് നൽകിയത്. നേരത്തെ നല്കിയ റിവിഷന് ഹരജി പിന്വലിച്ചതിന് പിന്നാലെയാണ് സര്ക്കാര് അപ്പീല് . കെ. സുരേന്ദ്രനെ പ്രതിപ്പട്ടികയില് നിന്നൊഴിവാക്കിയ സെഷന്സ് കോടതി വിധിയില് പിഴവുണ്ടെന്നും നിയമവിരുദ്ധമാണ് എന്നുമാണ് അപ്പീലില് സര്ക്കാരിന്റെ വാദം. പൊലീസ് നല്കിയ തെളിവുകള് പരിശോധിക്കാതെയാണ് വിചാരണക്കോടതി തീരുമാനമെടുത്തത്. എസ്സി, എസ്ടി നിയമത്തിന്റെ പരിധിയില് വരുന്ന കുറ്റങ്ങള് കെ. സുരേന്ദ്രന് ഉള്പ്പടെയുള്ള പ്രതികള്ക്കെതിരെ നിലനില്ക്കുമെന്നുമാണ് സര്ക്കാരിന്റെ വാദം.
2021ലെ നിയമസഭാ തെരഞ്ഞെടുപ്പില് ബിഎസ്പി സ്ഥാനാര്ഥിയായിരുന്ന കെ. സുന്ദരയ്യക്ക് സ്ഥാനാര്ഥിത്വം പിന്വലിക്കാനായി കോഴ നല്കിയെന്നാണ് ബദിയടുക്ക പൊലീസ് രജിസ്റ്റര് ചെയ്ത കേസ്. സ്ഥാനാര്ഥിത്വം പിന്വലിക്കാന് രണ്ട് ലക്ഷം രൂപയും സ്മാര്ട്ട് ഫോണും കോഴ നല്കിയെന്നാണ് കെ. സുരേന്ദ്രന് ഉള്പ്പടെയുള്ള ആറ് നേതാക്കള്ക്കെതിരായ ആരോപണം.