മുണ്ടക്കൈ ദുരന്തബാധിതരുടെ വായ്പ എഴുതിത്തള്ളുന്നതില് തീരുമാനം അറിയിക്കണം; കേന്ദ്രത്തോട് ഹൈകോടതി
കേന്ദ്രസര്ക്കാരിന് ഹൈക്കോടതി ഡിവിഷന് ബെഞ്ചിന്റെ നിർദേശം
Update: 2025-01-31 10:24 GMT
മുണ്ടക്കൈ - ചൂരല്മല ഉരുള്പൊട്ടല് ദുരന്തബാധിതരുടെ വായ്പ എഴുതിത്തള്ളുന്നതില് തീരുമാനം അറിയിക്കണമെന്ന് കേന്ദ്ര സര്ക്കാരിനോട് ഹൈക്കോടതി. ഒരാഴ്ചയ്ക്കകം അറിയിക്കണമെന്നാണ് ഡിവിഷന് ബെഞ്ചിന്റെ വാക്കാലുള്ള നിര്ദ്ദേശം. വയനാട് ദുരന്തത്തിന്റെ പശ്ചാത്തലത്തില് സ്വമേധയാ സ്വീകരിച്ച ഹര്ജി പരിഗണിക്കവെയാണ് ഹൈക്കോടതി നിര്ദ്ദേശം നല്കിയത്.
വായ്പ എഴുതിത്തള്ളുന്നതില് കേന്ദ്ര സര്ക്കാര് ഇതുവരെ തീരുമാനമെടുത്തിട്ടില്ലെന്ന് സംസ്ഥാന സര്ക്കാരും അമികസ് ക്യൂറിയും ഹൈക്കോടതിയെ അറിയിച്ചു. പുനരധിവാസ പദ്ധതിയുടെ ഭാഗമായ ടൗണ്ഷിപ്പ് നിര്മ്മാണച്ചുമതല ഊരാളുങ്കലിന് നല്കിയതില് വിശദീകരണം നൽകണമെന്ന് സംസ്ഥാന സര്ക്കാര് ഹൈക്കോടതിയെ അറിയിച്ചു. 83 ശതമാനം സര്ക്കാര് ഓഹരിയുള്ള സ്ഥാപനമാണ് ഊരാളുങ്കല് എന്നും ഡിവിഷന് ബെഞ്ചിനെ അറിയിച്ചു.