മലപ്പുറം ജില്ലാ പഞ്ചായത്തിലേക്ക് മുസ്‌ലിം ലീഗ് സ്ഥാനാർഥികളെ പ്രഖ്യാപിച്ചു

മലപ്പുറം: മലപ്പുറം ജില്ലാ പഞ്ചായത്തിലേക്ക് മുസ്‌ലിം ലീഗ് സ്ഥാനാർഥികളെ പ്രഖ്യാപിച്ചു. 33 ഡിവിഷനിൽ 23 ഡിവിഷനിലാണ് മുസ്‌ലിം ലീഗ് മത്സരിക്കുന്നത്. 12 എണ്ണം വനിതാ ഡിവിഷനുകളാണ്. യുവാക്കളെ പരിഗണിച്ചുകൊണ്ടാണ് ഇത്തവണ മലപ്പുറം ജില്ലാ പഞ്ചായത്തിലേക്കുള്ള മുസ്‌ലിം ലീഗിന്റെ സ്ഥാനാർത്ഥികളെ പ്രഖ്യാപിച്ചത്.

യൂത്ത് ലീഗ് ജില്ലാ പ്രസിഡന്റ് ശരീഫ് കുറ്റൂർ, ജില്ലാ സെക്രട്ടറി മുസ്തഫ അബ്ദുല്ലത്തീഫ്, എംഎസ്എഫ് സംസ്ഥാന ട്രഷറർ അഷ്ഹർ പെരുമുക്ക്, എംഎസ്എഫ് സംസ്ഥാന വൈസ് പ്രസിഡന്റ് പി.എച്ച് ആയിഷ ബാനു, അന്തരിച്ച മുൻ ജില്ല പഞ്ചായത്ത് പ്രസിന്റ് എ.പി ഉണ്ണികൃഷ്ണന്റെ മകൾ അഡ്വ. എ.പി സ്മിജി എന്നിവർ ഉൾപ്പെടെ സ്ഥാനാർഥി പട്ടികയിലുണ്ട്. എസ്എംഎഫ് സംസ്ഥാന കമ്മിറ്റി അംഗവും എസ്‌വൈഎസ് ജില്ലാ കമ്മിറ്റി അംഗവുമായ പി.എ ജബ്ബാർ ഹാജിയും സ്ഥാനാർഥി പട്ടികയിൽ ഉണ്ട്.