പാലക്കാട് ജില്ലാ പഞ്ചായത്തിൽ പത്ത് സീറ്റ് വേണമെന്ന് മുസ്‌ലിം ലീ​ഗ്; നിലവിൽ മത്സരിക്കുന്നത് അഞ്ച് സീറ്റിൽ

പാലക്കാട്: തദ്ദേശ തെരഞ്ഞെടുപ്പിൽ പാലക്കാട് ജില്ലാ പഞ്ചായത്തിൽ പത്ത് സീറ്റിൽ മത്സരിക്കണമെന്ന് ആവശ്യപ്പെട്ട് മുസ്‌ലിം ലീ​ഗ്. ജില്ലാ പഞ്ചായത്ത് മെമ്പറും യൂത്ത് ലീഗ് സംസ്ഥാന സെക്രട്ടറിയുമായ ഗഫൂൾ കോൽകളത്തിലാണ് ആവശ്യം ഉന്നയിച്ചത്. നിലവിൽ 5 സീറ്റിലാണ് മുസ്‌ലിം ലീഗ് മത്സരിക്കുന്നത്.

'പാലക്കാടിന്റെ രാഷ്ട്രീയം ഒരുപാട് മാറിയിട്ടുണ്ട്. കഴിഞ്ഞ പാർലമെന്റ് തെരഞ്ഞെടുപ്പുകൾ അതാണ് തെളിയിച്ചിരിക്കുന്നത്. ജില്ലാ പഞ്ചായത്തിലും കാര്യമായ മാറ്റങ്ങളുണ്ടാകുമെന്നാണ് പ്രതീക്ഷിക്കുന്നത്. അതിനനുസൃതമായ പദ്ധതികളുമായി മുസ്‌ലിം ലീ​ഗും യുഡിഎഫും മുന്നോട്ട് പോകും. കൂടുതൽ സീറ്റ് ആവശ്യപ്പെടുന്നതുമായി ബന്ധപ്പെട്ട് പാർട്ടി ആലോചിക്കുന്നുണ്ട്.' ഗഫൂർ പറഞ്ഞു.

'ഔദ്യോ​ഗികമായി പറയേണ്ടത് മുസ്‌ലിം ലീ​ഗ് നേതൃത്വമാണ്. യൂത്ത് ലീ​ഗ് എന്ന നിലക്ക് ​കൂടുതൽ സീറ്റ് ആവശ്യപ്പെടണമെന്ന് ലീ​ഗ് നേതൃത്വത്തിന്റെ മുന്നിലേക്ക് നിർദേശം വെച്ചിട്ടുണ്ട്. പാർട്ടിക്കും അത്തരമൊരു ആ​ഗ്രഹമുണ്ട്. കോൺ​ഗ്രസ് കഴിഞ്ഞാൽ മുന്നണിയിലെ വലിയ കക്ഷിയായ മുസ്‌ലിം ലീ​ഗിന് പത്ത് സീറ്റെങ്കിലും വേണം.' ഗഫൂർ മീഡിയവണിനോട് പറഞ്ഞു.

വാർഡ് വിഭജനം ജില്ലാതലത്തിൽ യുഡിഎഫിന് അനുകൂലമായി മാറിയിട്ടുണ്ടെന്നും തെരഞ്ഞെടുപ്പിൽ ജയപ്രതീക്ഷയുണ്ടെന്നും അദ്ദേഹം കൂട്ടിച്ചേർത്തു.

നിലവിൽ അഞ്ച് സീറ്റുകളിലാണ് പാലക്കാട് മുസ്‌ലിം ലീ​ഗ് മത്സരിക്കുന്നത്.