Writer - അൻഫസ് കൊണ്ടോട്ടി
anfas123
ലൈംഗികാതിക്രമക്കേസ്; സംവിധായകന് പി.ടി കുഞ്ഞുമുഹമ്മദിനെ അറസ്റ്റ് ചെയ്ത് വിട്ടയച്ചു
മുന്കൂര് ജാമ്യ ഉപാധി പ്രകാരമാണ് നടപടി
Update: 2025-12-24 05:29 GMT
തിരുവനന്തപുരം: ലൈംഗികാതിക്രമക്കേസില് സംവിധായകന് പി.ടി കുഞ്ഞുമുഹമ്മദിനെ അറസ്റ്റ് ചെയ്ത് വിട്ടയച്ചു. മുന്കൂര് ജാമ്യ ഉപാധി പ്രകാരമാണ് നടപടി.കന്റോണ്മെന്റ് സ്റ്റേഷനില് ഹാജരാകുകയായിരുന്നു. അറസ്റ്റ് ചെയ്താല് ജാമ്യത്തില് വിടണമെന്നായിരുന്നു കോടതി നിര്ദേശം. ചോദ്യം ചെയ്യലില് കുഞ്ഞുമുഹമ്മദ് കുറ്റം നിഷേധിച്ചു. പരാതി വ്യാജമെന്നാണ് ഇയാള് പൊലീസിന് നല്കിയ മൊഴി.
തിരുവനന്തപുരം സെഷന്സ് കോടതിയിലാണ് മുന്കൂര് ജാമ്യാപേക്ഷ നല്കിയിരുന്നത്. വനിതാ ചലച്ചിത്ര പ്രവര്ത്തക നല്കിയ പരാതിയില് ജാമ്യമില്ലാ വകുപ്പ് ചുമത്തിയാണ് പി.ടി കുഞ്ഞുമുഹമ്മദിനെതിരെ കേസെടുത്തിരുന്നത്.
കേരള രാജ്യാന്തര ചലച്ചിത്രമേളയിലേക്കുള്ള സിനിമകളുടെ സെലക്ഷനിടെ അപമര്യാദയായി പെരുമാറിയെന്നാണ് ചലച്ചിത്ര പ്രവര്ത്തകയുടെ പരാതി. കഴിഞ്ഞ മാസം ആറിനായിരുന്നു പരാതിക്ക് ആസ്പദമായ സംഭവം. ചലച്ചിത്രമേളയിലേക്കുള്ള സിനിമകളുടെ സെലക്ഷനു വേണ്ടിയുള്ള കമ്മിറ്റിയില് പരാതിക്കാരിയായ ചലച്ചിത്രപ്രവര്ത്തകയുമുണ്ടായിരുന്നു. തലസ്ഥാനത്തെ ഒരു ഹോട്ടലിലാണ് ജൂറി അംഗങ്ങള് താമസിച്ചിരുന്നത്. സ്ക്രീനിംഗിന് ശേഷം ഹോട്ടലില് തിരിച്ചെത്തിയ സമയത്ത് കുഞ്ഞുമുഹമ്മദ് മുറിയിലെത്തി അപമര്യാദയായി പെരുമാറിയെന്നാണ് പരാതി.
സ്ത്രീത്വത്തെ അപമാനിച്ചെന്ന് കാണിച്ച് ചലച്ചിത്ര പ്രവര്ത്തക മുഖ്യമന്ത്രിക്കാണ് പരാതി നല്കിയത്. ഈ പരാതി മുഖ്യമന്ത്രി കന്റോണ്മെന്റ് പൊലീസിന് കൈമാറുകയായിരുന്നു. പൊലീസിനോടും ചലച്ചിത്ര പ്രവര്ത്തക പരാതി ആവര്ത്തിച്ചു. ഹോട്ടലിലെ സിസിടിവി ദൃശ്യങ്ങളടക്കം പരിശോധിച്ചാണ് പൊലീസ് കേസെടുത്തത്.