'ട്രാൻസാക്ഷൻ സക്‌സസ്ഫുൾ'; പുതിയ മോഡൽ തട്ടിപ്പിലൂടെ നാല് ലക്ഷം രൂപയുടെ സ്വർണം തട്ടിയെടുത്ത പ്രതികൾ പിടിയിൽ

കോഴിക്കോട്: ഫറോക്കിലുള്ള മലബാറി ഫാഷൻ ജ്വല്ലറിയിൽ നിന്ന് സ്വർണം വാങ്ങി തട്ടിപ്പ് നടത്തിയവർ പിടിയിൽ. കണ്ണൂർ സ്വദേശികളായ ആരോളി അമൃതം എന്ന വീട്ടിൽ താമസിക്കുന്ന അഭിഷേക് (25), പേരാവൂർ ഇടപ്പറ വീട്ടിൽ താമസിക്കുന്ന അഷ്റഫ് (34) എന്നിവരാണ് അറസ്റ്റിലായത്. സെപ്റ്റംബർ 30ന് ഫറോക്കിലെ മലബാറി ഫാഷൻ ജ്വല്ലറിയിൽ നിന്ന് നാല് ലക്ഷം രൂപയുടെ സ്വർണാഭരണങ്ങൾ ഒന്നാംപ്രതി അഭിഷേക് ആവശ്യപ്പെടുകയും തന്റെ മൊബൈൽ ഫോണിൽ നിന്നും എൻഇഎഫ്ടി വഴി നാല് ലക്ഷം രൂപ ട്രാൻസ്ഫർ ചെയ്യുകയും 'ട്രാൻസാക്ഷൻ സക്‌സസ്ഫുൾ' എന്ന സ്‌ക്രീൻഷോട്ട് ജ്വല്ലറി ഉടമയെ കാണിക്കുകയും ചെയ്തു. ട്രാൻസാക്ഷൻ എൻഇഎഫ്ടി ആയതിനാൽ അൽപസമയത്തിനുള്ളിൽ അക്കൗണ്ടിൽ ക്യാഷ് കയറും എന്ന് ജ്വല്ലറി ഉടമയെ പറഞ്ഞു വിശ്വസിപ്പിച്ച് പ്രതി നാല് പവൻ സ്വർണവുമായി കടന്നു കളയുകയായിരുന്നു.

സെർവറുമായി ബന്ധപ്പെട്ട് എന്തെങ്കിലും തകരാറാണെന്ന് വിശ്വസിച്ച കട ഉടമ രണ്ട് ദിവസം കഴിഞ്ഞിട്ടും ക്യാഷ് അക്കൗണ്ടിൽ വരാത്തതിനെ തുടർന്നാണ് പൊലീസിൽ വിവരമറിയിച്ചത്. രണ്ടാംപ്രതി അഷ്റഫിന്റെ സഹായത്തോടെ സ്വർണം രാമനാട്ടുകരയിൽ ഉള്ള രണ്ട് ജ്വല്ലറികളിൽ വിൽപ്പന നടത്തുകയും കിട്ടിയ കാശുമായി അഭിഷേകും സുഹൃത്തും കരിപ്പൂർ എയർപോർട്ടിൽ നിന്നും ഡൽഹിയിലേക്ക് പോയി. ഡൽഹിയിൽ ആഡംബര ഹോട്ടലിൽ താമസിക്കുകയും അവിടെനിന്ന് ഹൈദരാബാദിലേക്കും പിന്നീട് കണ്ണൂരിലേക്കും വിമാനയാത്ര നടത്തി. ആഡംബര ജീവിതത്തിനാണ് പണം ചെലവഴിച്ചത്. ജ്വല്ലറിയിലെ സിസിടിവിയിൽ നിന്നും കിട്ടിയ ദൃശ്യങ്ങളുടെ അടിസ്ഥാനത്തിൽ പൊലീസ് പരിശോധന നടത്തിയപ്പോൾ ഇയാൾ വിവിധ സ്ഥലങ്ങളിലായി ഇതേ തട്ടിപ്പിന് പത്തോളം കേസുകളുള്ള വ്യക്തിയാണെന്ന് മനസ്സിലായി.

വടകരയിലെ ഒരു ജ്വല്ലറിയിൽ ഇതേ മാതൃകയിൽ 15 ലക്ഷം രൂപയുടെ സ്വർണം വാങ്ങാൻ ഒരുങ്ങുന്ന സമയത്താണ് ക്രൈം സ്‌ക്വാഡും ഫറോക്ക് പൊലീസും പ്രതിയെ പിടികൂടുന്നത്. ഒരു സ്ഥലത്തും കൃത്യമായി കൂടുതൽ നേരം ചെലവഴിക്കാതെ സ്ഥിരമായി യാത്ര ചെയ്യാൻ താത്പര്യം ഉള്ള വ്യക്തിയാണ് അഭിഷേക്. സുഹൃത്ത് അഷ്‌റഫിനൊപ്പമാണ് ഇയാൾ തട്ടിപ്പ് നടത്താറുള്ളത്. 15 ലക്ഷത്തിന്റെ സ്വർണം കൂടി വടകരയിൽ നിന്നും അടിച്ചുമാറ്റിയിട്ടുണ്ടെന്നും അത് വിറ്റ് തരണമെന്നും അഭിഷേകിനെക്കൊണ്ട് പറയിപ്പിച്ച് എറണാകുളത്തുനിന്നും വിളിച്ചു വരുത്തിയാണ് അഷ്‌റഫിനെ പൊലീസ് പിടികൂടിയത്. എൻഇഎഫ്ടി ട്രാൻസ്ഫർ മൊബൈൽ ഫോണിൽ നിന്നും നടത്തുന്ന സമയം ട്രാൻസാക്ഷൻ സക്‌സസ്ഫുൾ എന്ന് കാണിക്കുമെങ്കിലും മിനിമം ഒരു മണിക്കൂറിനു ശേഷമെങ്കിലും ആണ് യഥാർഥ മെസ്സേജ് ബാങ്കിൽ നിന്നും ലഭിക്കുക. ഈ അവസരം മുതലെടുത്താണ് പ്രതികൾ ഇത്തരം തട്ടിപ്പ് നടത്തുന്നത്.