മുക്കം മുനിസിപ്പാലിറ്റി: നാല് വാർഡുകളിൽ ഒറ്റയ്ക്ക് വിജയിച്ച് വെൽഫെയർ പാർട്ടി

കോഴിക്കോട്: മുക്കം മുനിസിപ്പാലിറ്റിയിൽ നാല് വാർഡുകൾ ഒറ്റയ്ക്ക് വിജയിച്ച് വെൽഫെയർ പാർട്ടി. നേരത്തെ യുഡിഎഫ് സഖ്യത്തിലായിരുന്നു വിജയിച്ചിരുന്നത്. അന്ന് മൂന്ന് സീറ്റുകളില്‍ വിജയിച്ചിരുന്നു. എന്നാൽ ഇപ്രാവശ്യം സഖ്യമുണ്ടായിരുന്നില്ല. 

കണക്കുപറമ്പ് ഡിവിഷന്‍ 18ല്‍ വെൽഫെയർ പാർട്ടിയുടെ മുഹമ്മദ് നസീം വിജയിച്ചത് 108 വോട്ടുകൾക്കാണ്. നസീം 396 വോട്ടുകൾ നേടിയപ്പോൾ രണ്ടാം സ്ഥാനത്ത് എത്തിയ സ്വതന്ത്ര സ്ഥാനാർഥി ശശീന്ദ്രൻ പി.സി 288 വോട്ടുകളാണ് നേടിയത്.

മംഗലശ്ശേരി 19 ഡിവിഷനിൽ നിന്നും വിജയിച്ച ശഫീഖ് മാടായിയാണ് വെല്‍ഫെയര്‍ പാര്‍ട്ടി ടിക്കറ്റില്‍ വിജയിച്ച രണ്ടാമത്തെയാള്‍. ഇവിടെ 191 വോട്ടുകൾക്കാണ് ശഫീഖ് മാടായി വിജയിച്ചത്. 464 വോട്ടുകളാണ് ശഫീഖ് നേടിയത്. രണ്ടാം സ്ഥാനത്ത് എത്തിയ മുസ്‌ലിം ലീഗിലെ അബ്ദുൽ ജബ്ബാർ 273 വോട്ടുകൾ നേടി. 124 വോട്ടുകൾ നേടി സിപിഎമ്മിന്റെ ഇംതിഹാസ് എൻ മൂന്നാമതായി.

ചേന്ദമംഗല്ലൂർ 20 ഡിവിഷനിലെ ബനൂജ വിയാണ് വെൽഫെയർ പാർട്ടി ടിക്കറ്റിൽ വിജയിച്ച മൂന്നാമത്തെ സ്ഥാനാർഥി. 77 വോട്ടുകൾക്കാണ് ബനൂജ വിജയിച്ചത്. ബനൂജ 434 വോട്ടുകൾ നേടിയപ്പോൾ രണ്ടാമത് എത്തിയ കോൺഗ്രസിലെ ജസീല 357 വോട്ടുകൾ നേടി. വെൽഫെയർ പാർട്ടി പിന്തുണയോടെ മത്സരിച്ച പുൽപ്പറമ്പിൽ ജസീലയാണ് വിജയിച്ച നാലാമത്തെ സ്ഥാനാർഥി. 58 വോട്ടുകൾക്കാണ് ജസീല വിജയിച്ചത്. ജസീല 401 വോട്ടുകൾ നേടിയപ്പോൾ രണ്ടാം സ്ഥാനത്ത് എത്തിയ സ്വതന്ത്ര സ്ഥാനാർത്തി  റംല ഗഫൂർ 343 വോട്ടുകളാണ് നേടിയത്.