അമേരിക്കയെക്കാൾ 54 ബില്യൺ ഡോളർ കൂടുതൽ; പ്രവാസി പണമയക്കലിൽ ഗൾഫിന്‍റെ റെക്കോഡ്

മസ്കത്ത്​: ലോകത്ത്​ ഏറ്റവും കൂടുതൽ പ്രവാസി പണമയക്കുന്ന മേഖലയായി ജിസിസി. അമേരിക്ക അടക്കമുള്ളവയെ പിന്തള്ളിയാണ്​ പ്രവാസി പണമയക്കലിൽ ജിസിസി ഒന്നാമത്​ തുടരുന്നത്​. 2025ൽ ആറ്​ ജിസിസി രാജ്യങ്ങളിൽ നിന്ന്​ പ്രവാസികൾ നാട്ടിലേക്ക്​ അയച്ചത്​ 161 ബില്യൺ ഡോളറാണ്​. ഇത്​ 14 ലക്ഷം കോടി രൂപക്ക്​ തുല്യമാണ്​. അമേരിക്കയിൽ നിന്ന്​ 107 ബില്യൺ ​​ഡോളറാണ്​ പ്രവാസി പണമായി ലോകത്തേക്ക്​ ഒഴുകിയത്​. അമേരിക്കയേക്കാൾ 54 ബില്യൺ ഡോളർ കൂടുതലാണ്​ ജിസിസി രാജ്യങ്ങളിൽ നിന്ന്​ ​ലോകത്തിന്‍റെ വിവിധ ഭാഗങ്ങളിലേക്ക്​ പ്രവാസികൾ അയച്ച തുക. 2024നെ അ​പേക്ഷിച്ച്​ ജിസിസിയിൽ 13.6 ശതമാനം വർധനവും പ്രവാസി പണമൊഴുക്കിൽ ഉണ്ടായി. 19 ബില്യൺ ഡോളറിന്‍റെ വർധനയാണ്​ രേഖപ്പെടുത്തിയിട്ടുള്ളത്​.ജിസിസി സ്റ്റാറ്റിസ്റ്റിക്കൽ സെന്‍റർ പുറത്തുവിട്ട 2025ലെ പ്രവാസി റെമിറ്റൻസ്​ റിപ്പോർട്ടിലാണ്​ ഇക്കാര്യങ്ങൾ വ്യക്​തമായത്​. 2023ൽ ജിസിസിയിൽ നിന്ന്​ പണം അയക്കൽ കുറഞ്ഞിരുന്നു. തുടർന്നുള്ള രണ്ട്​ വർഷങ്ങളിലും വർധനയുണ്ടായെന്നാണ്​ കണക്കുകൾ വ്യക്​തമാക്കുന്നത്​.

ജിസിസിയിൽനിന്നുള്ള പ്രവാസി പണമയക്കലിൽ യുഎഇയാണ് ഒന്നാമത്. 2025ൽ യുഎഇയിൽനിന്ന് വിദേശത്തേക്ക് അയച്ചത് 62.1 ബില്യൺ ഡോളറാണ്​. 58 ബില്യൺ ഡോളറുമായി സൗദി അറേബ്യ രണ്ടാമതാണ്. ജിസിസിയുടെ ആകെ പ്രവാസി പണമൊഴുക്കിന്‍റെ ഏകദേശം 74.8 ശതമാനവും യുഎഇയിൽ നിന്നും സൗദിയിൽ നിന്നുമായാണ്​ സംഭാവന ചെയ്യപ്പെട്ടത്​. കുവൈത്തിൽ നിന്ന്​ 16.7 ബില്യൺ ഡോളറും ഖത്തറിൽ നിന്ന്​ 11.9 ബില്യൺ ഡോളർ ഒമാനിൽ നിന്ന്​ 9.5 ബില്യൺ ഡോളർബഹ്റൈനിൽ നിന്ന്​ 2.5 ബില്യൺ ഡോളറുമാണ്​ പ്രവാസി പണമായി ഒഴുകിയത്​.

പ്രവാസി പണം അയക്കലിൽ സൗദി അറേബ്യയിൽ ഏറ്റവും കൂടുതൽ വളർച്ചയുണ്ടായതെങ്കിൽ ബഹ്​റൈനിൽ മാത്രമാണ്​ ഇടിവ്​ രേഖപ്പെടുത്തിയത്​. സൗദി- 26.9, കുവൈത്ത്​ - 18.2, യുഎഇ -6.3, ഖത്തർ -4.7, ഒമാൻ -2.7 എന്നിങ്ങനെയാണ്​ ശതമാന കണക്കിൽ വളർച്ചയുള്ളത്​. ബഹ്​റൈനിൽ 4.3 ശതമാനം ഇടിവ്​ രേഖപ്പെടുത്തി. 2025ൽ ജിസിസി രാജ്യങ്ങളുടെ സംയുക്ത ജിഡിപിയുടെ ഏകദേശം 6.6 ശതമാനത്തിന് തുല്യമാണ് വിദേശത്തേക്കുള്ള തൊഴിലാളി പണമൊഴുക്ക്. 2024ൽ ഇത് 6 ശതമാനവും 2023ൽ 5.7 ശതമാനവും 2022ൽ 5.6 ശതമാനവുമായിരുന്നു.

ജിസിസി സ്റ്റാറ്റിന്‍റെ വിലയിരുത്തലിൽ പ്രധാന കാരണം മേഖലയിൽ പ്രവാസി തൊഴിലാളികളുടെ തുടർച്ചയായ ഉയർന്ന ആവശ്യകതയാണ്. അടിസ്ഥാനസൗകര്യ വികസനം, സേവനമേഖല, വ്യവസായം, എണ്ണയിതര മേഖലകൾ എന്നിവയിലെ വളർച്ച കൂടുതൽ തൊഴിലവസരങ്ങൾക്ക് വഴിയൊരുക്കി.