കുട്ടികൾ പൊതുസ്ഥലത്ത് വാശിപിടിച്ച് കരയാറുണ്ടോ? പരിഹാരമുണ്ട്

പൊതുസ്ഥലങ്ങളിൽ വെച്ച് കുട്ടികൾ പെട്ടെന്ന് ദേഷ്യപ്പെടുകയോ വാശിപിടിച്ച് കരയുകയോ ചെയ്യുന്നത് മിക്ക മാതാപിതാക്കളെയും പ്രതിസന്ധിയിലാക്കുന്ന കാര്യമാണ്. മറ്റുള്ളവരുടെ മുൻപിൽ വെച്ചുണ്ടാകുന്ന ഇത്തരം സാഹചര്യങ്ങൾ മാതാപിതാക്കളിൽ അമിതമായ സമ്മർദ്ദവും ചിലപ്പോൾ നാണക്കേടും ഉണ്ടാക്കിയേക്കാം. എന്നാൽ ഈ അവസരങ്ങളിൽ കുട്ടികളെ വഴക്കുപറയുകയോ ശിക്ഷിക്കുകയോ ചെയ്യുന്നതിന് പകരം തികച്ചും ശാന്തമായി കാര്യങ്ങൾ കൈകാര്യം ചെയ്യുകയാണ് വേണ്ടത്. കുട്ടികളുടെ ദേഷ്യവും വാശിയും പൊതുസ്ഥലങ്ങളിൽ വെച്ച് എങ്ങനെ ഫലപ്രദമായി നിയന്ത്രിക്കാം എന്ന് പരിശോധിക്കാം.

• ശാന്തത കൈവിടാതിരിക്കുക:കുട്ടികൾ ദേഷ്യപ്പെടുമ്പോൾ മാതാപിതാക്കൾ ആദ്യം ചെയ്യേണ്ടത് സ്വന്തം നിയന്ത്രണം വിടാതിരിക്കുക എന്നതാണ്. കുട്ടി ദേഷ്യപ്പെടുമ്പോൾ നിങ്ങളും ശബ്ദമുയർത്തിയാൽ സ്ഥിതി കൂടുതൽ വഷളാകാനേ സാധ്യതയുള്ളൂ. നിങ്ങൾ ശാന്തമായി നിന്നാൽ മാത്രമേ കുട്ടിയെയും ശാന്തനാക്കാൻ സാധിക്കൂ.
• കാരണങ്ങൾ കണ്ടെത്തുക:പലപ്പോഴും കുട്ടികൾ പൊതുസ്ഥലങ്ങളിൽ ദേഷ്യപ്പെടുന്നത് അവർക്ക് വിശക്കുന്നതു കൊണ്ടോ, ദാഹിക്കുന്നതു കൊണ്ടോ അല്ലെങ്കിൽ ക്ഷീണം കൊണ്ടോ ആകാം. എന്തുകൊണ്ടാണ് അവർ അസ്വസ്ഥരാകുന്നത് എന്നതിന്റെ യഥാർഥ കാരണം കണ്ടെത്താൻ ശ്രമിക്കുക.
• സുരക്ഷിതമായ ഒരിടത്തേക്ക് മാറ്റുക: ആളുകൾ കൂടിനിൽക്കുന്ന സ്ഥലത്താണ് കുട്ടി ബഹളം വെക്കുന്നതെങ്കിൽ, അവിടെ നിന്ന് കുറച്ചുകൂടി ശാന്തമായ മറ്റൊരു സ്ഥലത്തേക്ക് കുട്ടിയെ മാറ്റുക. കാണാൻ ആളുകൾ ഇല്ലെന്നറിയുമ്പോൾ പലപ്പോഴും കുട്ടികൾ ബഹളം വെക്കുന്നത് നിർത്താറുണ്ട്.
• ശ്രദ്ധ തിരിക്കുക: കുട്ടികളുടെ ശ്രദ്ധ വേഗത്തിൽ തിരിച്ചുവിടാൻ സാധിക്കും. അവർക്ക് ഇഷ്ടമുള്ള പാട്ടോ, ചുറ്റുപാടുമുള്ള രസകരമായ മറ്റ് കാഴ്ചകളോ കാണിച്ച് അവരുടെ ദേഷ്യത്തിൽ നിന്ന് ശ്രദ്ധ തിരിക്കാൻ ശ്രമിക്കുക.
• വാഗ്ദാനങ്ങൾ നൽകി പ്രലോഭിപ്പിക്കരുത്: കരച്ചിൽ നിർത്താൻ വേണ്ടി അനാവശ്യമായി മിഠായിയോ കളിപ്പാട്ടങ്ങളോ വാങ്ങി നൽകാതിരിക്കുക. ഇങ്ങനെ ചെയ്യുന്നത് വാശിപിടിച്ചാൽ എന്തും കിട്ടും എന്ന തെറ്റായ ചിന്ത കുട്ടികളിൽ ഉണ്ടാക്കാൻ കാരണമാകും.
• സ്നേഹത്തോടെ ചേർത്തുപിടിക്കാം: ചില സമയങ്ങളിൽ കുട്ടികൾക്ക് വേണ്ടത് നിങ്ങളുടെ ശ്രദ്ധയും സ്നേഹവും മാത്രമായിരിക്കും. ദേഷ്യപ്പെടുന്ന കുട്ടിയെ ഒന്നും മിണ്ടാതെ ഇറുകെ കെട്ടിപ്പിടിക്കുന്നത് അവരുടെ കോപം കുറയ്ക്കാനും അവർക്ക് സുരക്ഷിതത്വം തോന്നാനും സഹായിക്കും.
• കുട്ടിയുടെ വികാരങ്ങളെ അംഗീകരിക്കുക: 'നിനക്ക് ദേഷ്യം വരുന്നുണ്ടെന്നും, ആ കളിപ്പാട്ടം കിട്ടാത്തതിലെ സങ്കടം എനിക്ക് മനസിലാകുന്നുണ്ടെന്നും' കുട്ടിയോട് പറയുക. തങ്ങളുടെ വികാരങ്ങൾ മാതാപിതാക്കൾ മനസിലാക്കുന്നുണ്ടെന്ന് അറിയുന്നത് കുട്ടികളെ വേഗത്തിൽ ശാന്തരാക്കാൻ സഹായിക്കും.
• പരിധികൾ വ്യക്തമാക്കുക: കുട്ടി എത്ര ദേഷ്യപ്പെട്ടാലും ചില കാര്യങ്ങൾ സാധിച്ചു തരില്ല എന്ന കാര്യത്തിൽ മാതാപിതാക്കൾ ഉറച്ച നിലപാട് എടുക്കണം. ഒരിക്കൽ 'ഇല്ല' എന്ന് പറഞ്ഞാൽ അതിൽ ഉറച്ചുനിൽക്കുക. നിങ്ങളുടെ തീരുമാനങ്ങളിൽ മാറ്റം വരില്ലെന്ന് അവർക്ക് മനസിലാക്കിക്കൊടുക്കുക. അതേസമയം, ഒരു കാര്യത്തിൽ 'വേണ്ട', 'ഇല്ല' എന്ന് പറയുമ്പോൾ അതിന്റെ കാരണവും അവരെ ബോധ്യപ്പെടുത്താൻ ശ്രദ്ധിക്കണം.
• തയ്യാറെടുപ്പുകൾ നടത്തുക: ഷോപ്പിംഗിനോ മറ്റോ പോകുന്നതിന് മുൻപ് തന്നെ കുട്ടികളോട് എവിടേക്കാണ് പോകുന്നതെന്നും, അവിടെ എങ്ങനെ പെരുമാറണമെന്നും മുൻകൂട്ടി പറഞ്ഞു മനസിലാക്കുക. ഇത് അവർക്ക് മാനസികമായ തയ്യാറെടുപ്പ് നൽകും.
• പിന്നീട് സംസാരിക്കാം: കുട്ടി ബഹളം വെക്കുന്ന സമയത്ത് അവരെ ഉപദേശിക്കാൻ ശ്രമിക്കരുത്. അവർ ശാന്തരായ ശേഷം, അല്ലെങ്കിൽ വീട്ടിലെത്തുമ്പോൾ ആ സംഭവത്തെക്കുറിച്ച് സംസാരിക്കുക. പൊതുസ്ഥലത്ത് അങ്ങനെ പെരുമാറിയത് എന്തുകൊണ്ടാണെന്നും, അത് തെറ്റാണെന്നും സ്നേഹത്തോടെ പറഞ്ഞു മനസിലാക്കുക.

കുട്ടികളുടെ വാശിയും ദേഷ്യവും അവരുടെ വളർച്ചയുടെ ഒരു ഭാഗം മാത്രമാണ്. അത് കൈകാര്യം ചെയ്യാൻ മാതാപിതാക്കൾക്ക് ഏറ്റവും ആവശ്യം ക്ഷമയാണ്. സ്നേഹത്തോടെയും എന്നാൽ ഉറച്ച നിലപാടുകളോടെയും വേണം ഇത്തരം സാഹചര്യങ്ങളെ മാതാപിതാക്കൾ നേരിടാൻ.