വെളുത്ത ഷർട്ടിൽ മറ്റ് വസ്ത്രങ്ങളുടെ നിറം പിടിച്ചോ? മിനിറ്റുകൾക്കുള്ളിൽ വൃത്തിയാക്കാം

വസ്ത്രങ്ങൾ കഴുകുമ്പോൾ പലരും ചെയ്യുന്ന ഒരു തെറ്റാണ് എല്ലാ വസ്ത്രങ്ങളും കൂടി ഒരു ബക്കറ്റിലിടുകയോ അല്ലെങ്കിൽ വാഷിങ് മെഷീനിൽ ഇടുകയോ ചെയ്യുന്നത്. ഇത് ചിലപ്പോൾ മറ്റ് വസ്ത്രങ്ങളുടെ നിറങ്ങൾ കൂട്ടത്തിൽ ഒരു വെള്ള ഷര്‍ട്ടോ ചുരിദാറോ ഉണ്ടെങ്കിൽ അതിലേക്ക് പടരാൻ ഇടയാക്കും. ഇത് ആ വസ്ത്രത്തിന്‍റെ ആകെയുള്ള ഭംഗിയെ നശിപ്പിക്കും. നമ്മൾ എത്ര ശ്രമിച്ചാലും ഈ കറ പോവുകയുമില്ല. എന്നാൽ ലളിതമായ മാര്‍ഗങ്ങളിലൂടെ ഇവ നീക്കം ചെയ്യാം.

ശരിയായ രീതി ശരിയായ സമയത്ത് പ്രയോഗിച്ചാൽ വെളുത്ത വസ്ത്രങ്ങളിൽ നിന്നുള്ള കറ എളുപ്പത്തിൽ നീക്കം ചെയ്യാൻ കഴിയും. ഇതിന് വിലകൂടിയ കറനിവാരണ വസ്തുക്കൾ ആവശ്യമില്ല. വെളുത്ത ഷര്‍ട്ടിൽ മറ്റൊരു വസ്ത്രത്തിന്‍റെ നിറം പിടിച്ചാൽ ആദ്യം ആ ഷര്‍ട്ട് മറ്റ് വസ്ത്രങ്ങളിൽ മാറ്റുക. ഒരിക്കലും ചൂടുവെള്ളത്തിൽ കഴുകരുത്. കാരണം ചൂടുവെള്ളം കൂടുതൽ കറ പടർത്തും. പകരം, കഴിയുന്നത്ര നിറം നീക്കം ചെയ്യാൻ തണുത്ത വെള്ളത്തിൽ മൃദുവായി കഴുകുക. കൂടാതെ, കറ പുരണ്ട ഭാഗത്ത് ശക്തമായി ഉരസുന്നത് ഒഴിവാക്കുക. കാരണം ഇത് തുണിക്കും നൂലുകൾക്കും കേടുവരുത്തും.

വിനാഗിരിയും ഉപ്പും ചേര്‍ത്ത ലായനി വെള്ള വസ്ത്രങ്ങളിൽ പിടിച്ച നിറം നീക്കാൻ ഫലപ്രദമാണ്. ഒരു ബക്കറ്റ് തണുത്ത വെള്ളത്തിൽ 2 മുതൽ 3 ടീസ്പൂൺ വെളുത്ത വിനാഗിരിയും 1 മുതൽ 2 ടീസ്പൂൺ ഉപ്പും കലർത്തുക. കറ പുരണ്ട വസ്ത്രം ഈ ലായനിയിൽ അര മണിക്കൂർ മുതൽ ഒരു മണിക്കൂർ വരെ മുക്കിവയ്ക്കുക. അതിനുശേഷം, വസ്ത്രം മൃദുവായി പിഴിഞ്ഞെടുത്ത് വീര്യം കുറഞ്ഞ ഡിറ്റർജന്റ് ഉപയോഗിച്ച് കഴുകുക. നേരിയ കറകൾ നീക്കം ചെയ്യുന്നതിന് ഈ രീതി നല്ലതാണ്.

കടുത്ത കറയാണെങ്കിൽ ബേക്കിങ് സോഡയും വിനാഗിരിയും ഫലപ്രദമായി പ്രവര്‍ത്തിക്കും. ആദ്യം കറ പുരണ്ട ഭാഗം ചെറുതായി നനയ്ക്കുക, തുടർന്ന് ബേക്കിംഗ് സോഡ വിതറിയതിന് ശേഷം മുകളിൽ അല്പം വിനാഗിരി ഒഴിക്കുക. 15 -20 മിനിറ്റിന് ശേഷം കറ പുരണ്ട ഭാഗം കൈകൊണ്ട് ഉരച്ച് തണുത്ത വെള്ളത്തിൽ കഴുകുക. ഇത് കഠിനമായ കറകൾ പോലും കുറയ്ക്കാൻ സഹായിക്കും.

നാരങ്ങയുടെ സ്വാഭാവിക ഗുണങ്ങൾ കറ കുറയ്ക്കാൻ സഹായിക്കുന്നു. കറയുള്ള ഭാഗത്ത് നാരങ്ങാനീര് പുരട്ടി മുകളിൽ അല്പം ഉപ്പ് വിതറുക. വസ്ത്രം നേരിയ സൂര്യപ്രകാശത്തിൽ 30 മുതൽ 45 മിനിറ്റ് വരെ വയ്ക്കുക. തുടർന്ന്, തണുത്ത വെള്ളത്തിൽ കഴുകുക. കറ പഴയതാണെങ്കിൽ ഒറ്റയടിക്ക് മാഞ്ഞുപോകുന്നില്ലെങ്കിൽ, ഇത് ആവർത്തിക്കാവുന്നതാണ്.

വസ്ത്രങ്ങളിലെ നിറമുള്ള കറകൾ നീക്കം ചെയ്യാൻ അധികമാര്‍ക്കും അറിയാത്ത ഒരു ടിപ്സാണ് പാൽ. കറ പുരണ്ട ഭാഗം 1 മുതൽ 2 മണിക്കൂർ വരെ പാലിൽ മുക്കിവയ്ക്കുക. അതിനുശേഷം, നേരിയ ഡിറ്റർജന്റ് ഉപയോഗിച്ച് വസ്ത്രം കഴുകുക. ആവശ്യമെങ്കിൽ, ചെറിയ അളവിൽ നാരങ്ങാനീരും ഉപയോഗിക്കാം. നേരിയ കറകളിൽ ഈ പ്രതിവിധി ഫലപ്രദമാണ്.