വീട്ടിൽ വളർത്തുമൃഗങ്ങളെ വളർത്തുന്നവരാണോ? മഴക്കാലത്ത് ഇവ ശ്രദ്ധിക്കാതെ പോകരുത്!

മഴക്കാലം എത്തിയതോടെ വീടിനുള്ളിൽ വളർത്തുമൃഗങ്ങളെ പരിപാലിക്കുന്നവർ കൂടുതൽ ജാഗ്രത പുലർത്തേണ്ട സമയമാണ്. അന്തരീക്ഷത്തിലെ ഈർപ്പം കൂടുന്നതോടെ മൃഗങ്ങളുടെ രോമം, താരൻ, ചെളി, പൂമ്പൊടി തുടങ്ങിയവ വീടിനുള്ളിൽ കൂടുതൽ അടിഞ്ഞുകൂടാൻ സാധ്യതയുണ്ട്. ഇത് വീടിന്റെ ശുചിത്വത്തെയും വായുവിന്റെ ഗുണനിലവാരത്തെയും ബാധിച്ചേക്കാം.

മഴക്കാലത്ത് വളർത്തുമൃഗങ്ങളെ ആരോഗ്യത്തോടെ പരിപാലിക്കുന്നതിനൊപ്പം വീടും വൃത്തിയായി സൂക്ഷിക്കാൻ ശ്രദ്ധിക്കേണ്ട ചില കാര്യങ്ങളുണ്ട്.

രോമം മുഴുവൻ വെട്ടിമാറ്റേണ്ട

രോമം കൂടുതലായി കൊഴിയുന്നത് കണ്ട് വളർത്തുമൃഗങ്ങളുടെ രോമം പൂർണമായി ഷേവ് ചെയ്യുന്നത് പരിഹാരമല്ല. കാലാവസ്ഥയിലെ മാറ്റങ്ങളിൽ നിന്ന് ശരീരത്തെ സംരക്ഷിക്കുന്ന പ്രകൃതിദത്ത കവചമായും രോമം പ്രവർത്തിക്കും. അതിനാൽ പൂർണമായി ഷേവ് ചെയ്യുന്നതിന് പകരം കൃത്യമായ ഇടവേളകളിൽ ബ്രഷ് ചെയ്ത് അധിക രോമം നീക്കം ചെയ്യുന്നതാണ് നല്ലത്.

രോമം മാത്രമല്ല, താരനും ശ്രദ്ധിക്കണം

വളർത്തുമൃഗങ്ങളുടെ രോമം മാത്രമല്ല വീടിനുള്ളിലെ അലർജിക്ക് കാരണമാകുന്നത്. ശരീരത്തിൽ നിന്നുള്ള താരൻ, പുറത്തുനിന്ന് കൊണ്ടുവരുന്ന പൂമ്പൊടി, പൊടി, വിവിധ സൂക്ഷ്മാണുക്കൾ എന്നിവയും വീടിനുള്ളിലെ അന്തരീക്ഷത്തെ ബാധിക്കാം. വായുവിന്റെ ഗുണനിലവാരം മെച്ചപ്പെടുത്താൻ ആവശ്യമായ സാഹചര്യങ്ങളിൽ എയർ പ്യൂരിഫയർ ഉപയോഗിക്കുന്നത് പരിഗണിക്കാം.

കിടക്കയും സോഫയും വൃത്തിയാക്കുക

വളർത്തുമൃഗങ്ങൾ കൂടുതൽ സമയം ചെലവഴിക്കുന്ന കിടക്ക, പുതപ്പ്, സോഫ തുടങ്ങിയ ഇടങ്ങളിൽ രോമവും താരനും പൊടിയും അടിഞ്ഞുകൂടാം. ഇവയുടെ വിരിപ്പുകളും ബെഡ്ഡുകളും പതിവായി കഴുകി വൃത്തിയാക്കുന്നത് പ്രധാനമാണ്.

വൃത്തിയാക്കുമ്പോൾ വാക്വം ക്ലീനർ ഉപയോഗിക്കാം

തറയിലും സോഫയിലും വളർത്തുമൃഗങ്ങൾ വിശ്രമിക്കുന്ന ഇടങ്ങളിലും അടിഞ്ഞുകൂടുന്ന രോമവും പൊടിയും നീക്കം ചെയ്യാൻ വാക്വം ക്ലീനർ ഉപയോഗിക്കാം. മഴക്കാലത്ത് ചെളിയും ഈർപ്പവും കൂടുന്നതിനാൽ ഇത്തരം ഇടങ്ങൾ പതിവായി വൃത്തിയാക്കുന്നതും സഹായകരമാണ്.

പുറത്തുപോയാൽ കാലുകൾ തുടയ്ക്കണം

മഴയത്ത് പുറത്തിറങ്ങി വീട്ടിലെത്തുന്ന വളർത്തുമൃഗങ്ങളുടെ കാലുകളിൽ ചെളിയും പൊടിയും മാത്രമല്ല, പൂമ്പൊടി, ഇലകൾ, മറ്റ് അഴുക്കുകൾ എന്നിവയും പറ്റിയിരിക്കാം. അതിനാൽ ഓരോ തവണയും പുറത്തുനിന്ന് വീട്ടിലെത്തുമ്പോൾ പാദങ്ങൾ നന്നായി തുടച്ച് വൃത്തിയാക്കിയ ശേഷം വീടിനുള്ളിലേക്ക് പ്രവേശിപ്പിക്കുക.

മഴക്കാലത്ത് വളർത്തുമൃഗങ്ങളുടെ ശരീരശുചിത്വത്തിനൊപ്പം അവ കൂടുതലായി സമയം ചെലവഴിക്കുന്ന ഇടങ്ങളുടെയും വീടിനുള്ളിലെ വായുവിന്റെയും ശുചിത്വത്തിന് കൂടി പ്രാധാന്യം നൽകുന്നത് നല്ലതാണ്.