ഷാങ്ഹായ്: ഒപ്പോയുടെ ഏറ്റവും പുതിയ സ്മാർട്ട്ഫോണായ 'ഫെൻഡ് എക്സ് 10 പ്രോ മാക്സ്' ചൈനീസ് വിപണിയിൽ അവതരിപ്പിച്ചു.
ക്യാമറ, ബാറ്ററി പ്രകടനങ്ങൾക്ക് മുൻഗണന നൽകി നിർമ്മിച്ച ഈ ഫോണിൽ 200 മെഗാപിക്സലിന്റെ മൂന്ന് റിയർ ക്യാമറകളും 8,000എംഎഎച്ച് ബാറ്ററിയുമാണ് ഉൾപ്പെടുത്തിയിരിക്കുന്നത്. മീഡിയാടെക് ഡൈമൻസിറ്റി 9600 പ്രോ പ്രൊസസറും ആൻഡ്രോയിഡ് 17 അടിസ്ഥാനമാക്കിയുള്ള കളർ ഒഎസ് 17-ലുമാണ് ഫോൺ പ്രവർത്തിക്കുന്നത്.
ഇന്ത്യയിലെ ലോഞ്ച് തിയ്യതി കമ്പനി ഇതുവരെ ഔദ്യോഗികമായി പ്രഖ്യാപിച്ചിട്ടില്ലെങ്കിലും ഒക്ടോബർ അവസാനത്തോടെയോ ദീപാവലിക്ക് മുന്നോടിയായോ ഇന്ത്യൻ വിപണിയിലെത്തുമെന്നാണ് പ്രതീക്ഷിക്കുന്നത്. 1.5K റെസല്യൂഷനോട് കൂടിയ 6.78 ഇഞ്ച് LTPO OLED ഡിസ്പ്ലേയാണ് മോഡലിന്.
200 മെഗാപിക്സലിന്റെ മൂന്ന് റിയർ ക്യാമറകളാണ് പ്രധാന ആകർഷണം. f/1.5 അപ്പർച്ചറും ടൂ-ആക്സിസ് ഒഐഎസ് ഉള്ള 200എംപി പ്രധാന ക്യാമറ, 124 ഡിഗ്രി ഫീൽഡ് ഓഫ് വ്യൂ നൽകുന്ന 200എംപി അൾട്രാ-വൈഡ് ക്യാമറ, ഒഐഎസ് പിന്തുണയുള്ള 200എംപി ടെലിഫോട്ടോ ക്യാമറ എന്നിവയാണ് ക്യാമറ ഡിപാര്ട്മെന്റിലുള്ളത്. ഒപ്പോയുടെ സ്വന്തം 'ടൈഡ് എഞ്ചിൻ' സാങ്കേതികവിദ്യ വഴി 200എംപി ചിത്രങ്ങൾ പകർത്തുമ്പോഴുള്ള പ്രോസസിംഗ് സമയം 0.7 സെക്കൻഡായി കുറയ്ക്കാനും സാധിക്കും. ഓട്ടോഫോക്കസ് ഉള്ള 50എംപിയാണ് ഫ്രണ്ട് ക്യാമറ.
മൂന്ന് പിൻ ക്യാമറകളിലും 8K Log വീഡിയോ റെക്കോർഡിംഗ്, 4K/120 fps, 4K ഡോൾബി വിഷൻ സപ്പോർട്ട് ചെയ്യും. 8,000എംഎഎച്ച് ശേഷിയുള്ള വമ്പൻ ബാറ്ററിയാണ് മോഡലിന്. 80W വയർഡ് ചാർജിംഗും 50W വയർലെസ് ചാർജിംഗും പിന്തുണക്കും. അഞ്ച് വർഷത്തെ ഉപയോഗത്തിന് ശേഷവും ബാറ്ററിയുടെ 80% ശേഷി നിലനിൽക്കുമെന്നാണ് ഒപ്പോയുടെ അവകാശവാദം.
12GB RAM + 256GB സ്റ്റോറേജ് വാരിയന്റുള്ള ബേസ് മോഡലിന്റെ ചൈനീസ് വില അടിസ്ഥാനമാക്കിയാല് ഇന്ത്യയില് 97,050 രൂപ വരും. 16 ജിബി റാമും 1ടിബി സ്റ്റോറേജ് വാരിയന്റമുള്ള ടോപ് മോഡലിന് 1,28,456 രൂപയും വരും.