തെഹ്‌റാൻ: ഇറാൻ്റെ മുൻ പരമോന്നത നേതാവായിരുന്ന ആയത്തുല്ല അലി ഖാംനഈടെയും മറ്റ് കുടുംബാംഗങ്ങളുടെയും സംസ്കാര ചടങ്ങുകൾ തെഹ്റാനിൽ പുരോഗമിക്കുമ്പോൾ ലോകമാധ്യമങ്ങളുടെ ശ്രദ്ധാകേന്ദ്രം അദ്ദേഹത്തിന്റെ മക്കളായിരുന്നു. പിതാവിൻ്റെ അന്ത്യകർമങ്ങളിൽ പങ്കെടുക്കാൻ ഖാംനഈയുടെ മറ്റ് മൂന്ന് ആൺമക്കൾ എത്തിയെങ്കിലും, പുതിയ പരമോന്നത നേതാവായി ചുമതലയേറ്റ മുജ്തബ ഖാംനഈയുടെ അസാന്നിധ്യം വലിയ ചർച്ചയായിരിക്കുകയാണ്. ഇസ്രായേൽ ലക്ഷ്യമിടാൻ സാധ്യതയുണ്ടെന്ന സുരക്ഷാ കാരണങ്ങളാലാണ് മുജ്തബ പൊതുവേദിയിൽ നിന്ന് വിട്ടുനിൽക്കുന്നതെന്നാണ് സൂചന. എന്നാൽ, തെഹ്റാനിലെ ഇമാം ഖുമൈനി ഗ്രാൻഡ് മുസല്ലയിൽ നടന്ന പ്രാർഥനാ ചടങ്ങുകളിൽ മറ്റ് മൂന്ന് മക്കളായ മുസ്തഫ, മസ്ഊദ്, മെയ്സം എന്നിവർ മുൻനിരയിലുണ്ടായിരുന്നു.
കഴിഞ്ഞ ഫെബ്രുവരി 28ന് അമേരിക്കയും ഇസ്രായേലും സംയുക്തമായി നടത്തിയ വ്യോമാക്രമണത്തിൽ അലി ഖാംനഈയും മറ്റ് കുടുംബാംഗങ്ങളും കൊല്ലപ്പെട്ടതിന് ശേഷം ഇതാദ്യമായാണ് ഈ മൂന്ന് മക്കളും ഒരു പൊതുവേദിയിൽ പ്രത്യക്ഷപ്പെടുന്നത്. തങ്ങളുടെ പിതാവിന്റെയും സഹോദരിയുടെയും ഉൾപ്പെടെ അഞ്ച് കുടുംബാംഗങ്ങളുടെയും മൃതദേഹങ്ങൾക്ക് പിന്നിലായി നിന്ന് പ്രാർഥിക്കുന്ന ഇവരുടെ ദൃശ്യങ്ങൾ ഇറാൻ സ്റ്റേറ്റ് ടിവി പുറത്തുവിട്ടിരുന്നു. ചടങ്ങിനിടെ മസ്ഊദ് ഖാംനഈ തൻ്റെ കണ്ണുനീർ ഒരു കഫിയ (ഫലസ്തീൻ ഐക്യദാർഢ്യത്തിന്റെ പ്രതീകമായ ഷാൾ) ഉപയോഗിച്ച് തുടയ്ക്കുന്ന വികാരഭരിതമായ രംഗങ്ങളും പുറത്തുവന്നു.
ആരാണ് ഈ മൂന്ന് മക്കൾ?
അലി ഖാംനഈക്ക് മൊത്തം നാല് ആൺമക്കളും രണ്ട് പെൺമക്കളുമാണുള്ളത്. ഇതിൽ രാഷ്ട്രീയമായും ഭരണപരമായും ഏറ്റവും കൂടുതൽ സ്വാധീനമുള്ളത് മുജ്തബ ഖാംനഈക്കാണ്. എന്നാൽ ചടങ്ങിൽ പങ്കെടുത്ത മറ്റ് മൂന്ന് പേർ വ്യത്യസ്ത മേഖലകളിൽ പ്രവർത്തിക്കുന്നവരാണ്:
1. മുസ്തഫ ഖാംനഈ
അലി ഖാംനഈയുടെ ഏറ്റവും മൂത്ത മകനാണ് മുസ്തഫ. 1965ൽ ജനിച്ച ഇദ്ദേഹം ഒരു ശിയാ പുരോഹിതനാണ്. അധികാര കേന്ദ്രങ്ങളിൽ നിന്നോ സജീവ രാഷ്ട്രീയത്തിൽ നിന്നോ പൂർണമായും അകലം പാലിക്കുന്ന മുസ്തഫ, ഇറാനിലെ പ്രധാന മതപഠന കേന്ദ്രമായ ഖോമിൽ ഉന്നത മതപഠനത്തിലും അധ്യാപനത്തിലുമാണ് ശ്രദ്ധ കേന്ദ്രീകരിച്ചിരിക്കുന്നത്. ആയത്തുല്ല അസീസ് ഖോഷ്‌വാഗ്‌തിന്റെ മകളെയാണ് ഇദ്ദേഹം വിവാഹം കഴിച്ചിരിക്കുന്നത്. തൻ്റെ സഹോദരൻ മുജ്തബയെപ്പോലെ ഭരണകാര്യങ്ങളിൽ ഇദ്ദേഹം ഇടപെടാറില്ല.
2. മസ്ഊദ് ഖാംനഈ
മുഹ്‌സെൻ ഖാംനഈ എന്നും അറിയപ്പെടുന്ന മസ്ഊദ് അലി ഖാംനഈയുടെ മൂന്നാമത്തെ മകനാണ്. ഇറാനിലെ മുൻ വിദേശകാര്യ മന്ത്രിയായിരുന്ന കമാൽ ഖരാസിയുടെ അനന്തരവളാണ് ഇദ്ദേഹത്തിന്റെ ഭാര്യ. ഇറാൻ്റെ പരമോന്നത നേതാവിൻ്റെ കൃതികളും രചനകളും സംരക്ഷിക്കുന്നതിനും പ്രചരിപ്പിക്കുന്നതിനുമുള്ള ഔദ്യോഗിക കാര്യാലയത്തിന്റെ ചുമതലകളിൽ മസ്ഊദ് സജീവമാണ്. പിതാവിന്റെ വിലാപയാത്രയിൽ ഏറ്റവും കൂടുതൽ വികാരഭരിതനായി കാണപ്പെട്ടതും ഇദ്ദേഹത്തെയാണ്.
3. മെയ്സം ഖാംനഈ
ഖാംനഈയുടെ ആൺമക്കളിൽ ഏറ്റവും ഇളയ ആളാണ് മെയ്സം. തെഹ്റാനിലെ ഒരു പ്രമുഖ വ്യാപാരിയായ മഹ്മൂദ് ലൊലാച്ചിയൻ്റെ മകളെയാണ് മെയ്സം വിവാഹം കഴിച്ചിരിക്കുന്നത്. ഇദ്ദേഹത്തിന് ഭരണതലത്തിൽ ചില രാഷ്ട്രീയ ബന്ധങ്ങളുണ്ടെങ്കിലും ഇറാൻ്റെ രാഷ്ട്രീയ ഗതിവിഗതികളെ നിയന്ത്രിക്കുന്നതിൽ മുജ്തബയ്ക്കുള്ളത്ര സ്വാധീനം ഇദ്ദേഹത്തിനില്ല.
മുജ്തബയുടെ അസാന്നിധ്യവും ഉന്നത നേതാക്കളുടെ പങ്കാളിത്തവും
സുരക്ഷാ ഭീഷണികൾ നിലനിൽക്കുന്നതിനാൽ പുതിയ പരമോന്നത നേതാവായ മുജ്തബ എവിടെയാണ് കഴിയുന്നതെന്ന വിവരം ഇറാൻ പുറത്തുവിട്ടിട്ടില്ല. ഫെബ്രുവരിയിലെ ആക്രമണത്തിൽ അദ്ദേഹത്തിന് സാരമായി പരിക്കേറ്റിരുന്നതായും റിപ്പോർട്ടുകളുണ്ട്. അതേസമയം, രാജ്യത്തിൻ്റെ ഭരണ-സൈനിക നേതൃത്വം ഒന്നടങ്കം ഈ അന്ത്യകർമങ്ങളിൽ പങ്കുചേർന്നു. ഇറാൻ പ്രസിഡൻ്റ് മസൂദ് പെസഷ്കിയാൻ, പാർലമെൻ്റ് സ്പീക്കർ മുഹമ്മദ് ബഗർ ഗാലിബാഫ്, ഇസ്‌ലാമിക് റെവല്യൂഷണറി ഗാർഡ് കോർപ്സ് കമാൻഡർ ജനറൽ അഹമ്മദ് വാഹിദി തുടങ്ങിയ ഉന്നതർ ഖാംനഈയുടെ മക്കൾക്കൊപ്പം മുൻനിരയിൽ തന്നെ ഉണ്ടായിരുന്നു. യുദ്ധത്തിന് ശേഷം സുരക്ഷാ കാരണങ്ങളാൽ പൊതുവേദികളിൽ നിന്ന് വിട്ടുനിന്ന ജനറൽ അഹമ്മദ് വാഹിദിയുടെ തിരിച്ചുവരവ് കൂടിയായിരുന്നു ഈ ചടങ്ങ്.