റിലയന്സ് 10,000 കോടി കടമെടുക്കുന്നു
റിസര്വ് ബാങ്കിന്റെ ഒക്ടോബര് 7ലെ പണനയ യോഗത്തിന് മുമ്പ് കടമെടുക്കല് പൂര്ത്തിയാക്കാനാണ് കമ്പനി ലക്ഷ്യമിടുന്നതെന്നാണ് ബാങ്കര്മാരെ ഉദ്ധരിച്ച് റിപ്പോര്ട്ട് പറയുന്നത്
Update: 2026-09-25 05:15 GMT
മുകേഷ് അംബാനി
മുംബൈ: മുകേഷ് അംബാനിയുടെ ഉടമസ്ഥതയിലുള്ള റിലയന്സ് ഇന്ഡസ്ട്രീസ് ഏകദേശം 10,000 കോടി രൂപ ആഭ്യന്തര ബോണ്ട് വിപണിയിലൂടെ സമാഹരിക്കാന് ഒരുങ്ങുന്നതായി റിപ്പോര്ട്ട്.10 വര്ഷം കാലാവധിയുള്ള ബോണ്ടുകള് പുറത്തിറക്കിയാണ് കമ്പനി തുക സമാഹരിക്കാന് ലക്ഷ്യമിടുന്നത്. ഈ ബോണ്ടുകള്ക്ക് പ്രതിവര്ഷം 7.90 ശതമാനം പലിശ നല്കാനാണ് പദ്ധതിയെന്നാണ് റിപ്പോര്ട്ട്. നിക്ഷേപകരില് നിന്ന് അടുത്ത ആഴ്ചയോ അതിന് ശേഷമുള്ള ആഴ്ചയോ ബിഡുകള് ക്ഷണിച്ചേക്കും.
റിസര്വ് ബാങ്കിന്റെ ഒക്ടോബര് 7ലെ പണനയ യോഗത്തിന് മുമ്പ് കടമെടുക്കല് പൂര്ത്തിയാക്കാനാണ് കമ്പനി ലക്ഷ്യമിടുന്നതെന്നാണ് ബാങ്കര്മാരെ ഉദ്ധരിച്ച് റിപ്പോര്ട്ട് പറയുന്നത്.
രണ്ട് ആഴ്ചയ്ക്കുള്ളില് രണ്ടാമത്തെ കടമെടുപ്പ്
രണ്ട് ആഴ്ച മുമ്പ് റിലയന്സ് ഇന്ഡസ്ട്രീസ് 12,000 കോടി രൂപ അഞ്ച് വര്ഷത്തെ ബോണ്ടുകളിലൂടെ സമാഹരിച്ചിരുന്നു. ഈ ബോണ്ടിന് പ്രതിവര്ഷം 7.47 ശതമാനം പലിശ ആയിരുന്നു.
2023 നവംബറിന് ശേഷം റിലയന്സ് നടത്തിയ ആദ്യത്തെ രൂപാ ബോണ്ട് വില്പ്പനയായിരുന്നു ഇത്. അന്ന് കമ്പനി 20,000 കോടി രൂപ സമാഹരിച്ചിരുന്നു.
ഇപ്പോള് 10,000 കോടി രൂപ കൂടി സമാഹരിച്ചാല് റിലയന്സ് ഇന്ഡസ്ട്രീസിന്റെ ബാക്കി നില്ക്കുന്ന ബോണ്ട് ബാധ്യത ഏകദേശം 54,000 കോടി രൂപയായി ഉയരും.
എന്തുകൊണ്ടാണ് റിലയന്സ് ആഭ്യന്തര വിപണിയില് നിന്ന് കടമെടുക്കുന്നത്?
ഇപ്പോള് ഇന്ത്യയിലെ ബോണ്ട് വിപണിയിലെ പലിശനിരക്കുകള് താരതമ്യേന അനുകൂലമാണ്. അതിനാല് യുഎസ് ഡോളറില് കടമെടുക്കുന്നതിനേക്കാള് രൂപയില് കടമെടുക്കുന്നത് കമ്പനിക്ക് ചെലവ് കുറഞ്ഞ മാര്ഗമായേക്കാമെന്നാണ് ബാങ്കര്മാരുടെ വിലയിരുത്തല്.അമേരിക്കന് ട്രഷറി യീല്ഡുകള് ഉയര്ന്നതോടെ ഡോളര് കടത്തിന്റെ ചെലവും വര്ധിച്ചിട്ടുണ്ട്. ഈ സാഹചര്യത്തിലാണ് റിലയന്സ് ആഭ്യന്തര ബോണ്ട് വിപണിയെ ആശ്രയിക്കുന്നത്.
വലിയ സ്വകാര്യ ബാങ്കുകള് പുതിയ ബോണ്ട് വില്പ്പനയുടെ ക്രമീകരകരായി പ്രവര്ത്തിക്കാനും ബോണ്ടുകളുടെ ഒരു ഭാഗം നേരിട്ട് വാങ്ങാനും സാധ്യതയുണ്ടെന്നും റിപ്പോര്ട്ടില് പറയുന്നു.അതേസമയം, ഈ കടമെടുപ്പിനെക്കുറിച്ച് റിലയന്സ് ഇന്ഡസ്ട്രീസ് ഔദ്യോഗികമായി പ്രതികരിച്ചിട്ടില്ല.