സൗജന്യ അന്താരാഷ്ട്ര റോമിങ്ങുമായി വിഐ
170ലധികം രാജ്യങ്ങളില് ഈ സൗകര്യം ലഭ്യമാകും
Update: 2026-09-25 08:39 GMT
വിദേശയാത്ര നടത്തുന്ന ഉപഭോക്താക്കള്ക്കായി പുതിയ സൗകര്യവുമായി വോഡഫോണ് ഐഡിയ. തെരഞ്ഞെടുത്ത പ്രീപെയ്ഡ്, പോസ്റ്റ്പെയ്ഡ്, ബിസിനസ് യൂസേഴ്സ് പ്ലാനുകളില് സൗജന്യ അന്താരാഷ്ട്ര റോമിങ് ഉള്പ്പെടുത്തിയതായി കമ്പനി അറിയിച്ചു.
ഇതോടെ പ്രത്യേക റോമിങ് പാക്ക് വാങ്ങാതെ തന്നെ ഉപഭോക്താക്കള്ക്ക് വിദേശരാജ്യങ്ങളില് തങ്ങളുടെ വിഐ നമ്പര് ഉപയോഗിക്കാന് സാധിക്കും. 170ലധികം രാജ്യങ്ങളില് ഈ സൗകര്യം ലഭ്യമാകും. പ്ലാനും ഉപയോഗവും അനുസരിച്ച് ഒരു വര്ഷം 9,000 രൂപ വരെ ലാഭിക്കാനാകുമെന്നും കമ്പനി അറിയിച്ചു.
പുതിയ പദ്ധതിയുടെ ഭാഗമായി അര്ഹരായ ഉപഭോക്താക്കള്ക്ക് ഒരു വര്ഷത്തില് മൂന്ന് വിദേശയാത്രകള് വരെ അന്താരാഷ്ട്ര റോമിങ് സൗജന്യമായി ഉപയോഗിക്കാം.എന്നാല് ഓരോ പ്ലാനിലും ലഭിക്കുന്ന ഡാറ്റയുടെ അളവും വിദേശത്തേക്ക് വിളിക്കാനുള്ള സൗജന്യ മിനിറ്റുകളും വ്യത്യസ്തമായിരിക്കും.വ്യക്തിഗത യാത്രക്കാര്, കുടുംബങ്ങള്, ബിസിനസ് യൂസേഴ്സ് എന്നിവരെ ലക്ഷ്യമിട്ടാണ് പുതിയ സൗകര്യം അവതരിപ്പിച്ചിരിക്കുന്നത്.
പ്രത്യേക റോമിങ് പാക്ക് ഇനി വേണ്ട
വിദേശയാത്രയ്ക്കിടെ മൊബൈല് കണക്ഷന് ഉപയോഗിക്കുന്നതിലെ ചെലവിനെക്കുറിച്ച് പല ഉപഭോക്താക്കള്ക്കും ആശങ്കയുണ്ടാകാറുണ്ട്.വിദേശത്ത് എത്തുമ്പോള് പ്രാദേശിക സിം കാര്ഡ് വാങ്ങുക, യാത്രയ്ക്കുള്ള ഇ-സിം ഉപയോഗിക്കുക, ഇന്ത്യന് മൊബൈല് നമ്പര് നഷ്ടപ്പെടുക, ഒ ടി പി സന്ദേശങ്ങള് ലഭിക്കാതിരിക്കുക, പ്രതീക്ഷിക്കാത്ത റോമിങ് നിരക്കുകള് വരിക തുടങ്ങിയ പ്രശ്നങ്ങള് സാധാരണമാണ്.ഈ പ്രശ്നങ്ങള് ഒഴിവാക്കുകയാണ് പുതിയ പദ്ധതിയിലൂടെ ലക്ഷ്യമിടുന്നതെന്ന് വോഡഫോണ് ഐഡിയ അറിയിച്ചു.വിഐയുടെ ചീഫ് എക്സിക്യൂട്ടീവ് ഓഫീസര് അഭിജിത് കിഷോര് പറയുന്നതനുസരിച്ച്, വിദേശത്തേക്ക് യാത്ര ചെയ്യുമ്പോഴും ഉപഭോക്താക്കളുടെ സ്വന്തം വിഐ നമ്പര് സൗജന്യമായി കൂടെയുണ്ടാകും.
ഏതൊക്കെ പ്ലാനുകളില് സൗകര്യം ലഭിക്കും
പുതിയ സൗജന്യ അന്താരാഷ്ട്ര റോമിങ് സൗകര്യം താഴെപ്പറയുന്ന പ്ലാനുകളില് ലഭ്യമാകും:
501 രൂപ മുതല് ആരംഭിക്കുന്ന പോസ്റ്റ്പെയ്ഡ് പ്ലാനുകള്
വാര്ഷിക പരിധിയില്ലാത്ത ഡാറ്റയുള്ള പ്രീപെയ്ഡ് പ്ലാനുകള്
451 രൂപ മുതല് ആരംഭിക്കുന്ന ബിസിനസ് യൂസേഴ്സ് പ്ലാനുകള്
എന്നാല് ഓരോ പ്ലാനിലും ലഭിക്കുന്ന റോമിങ് ഡാറ്റയും വിളിക്കാനുള്ള മിനിറ്റുകളും വ്യത്യസ്തമായിരിക്കും.