വാർത്തകളിൽ നിറയുന്ന ആര്യൻ ഖാൻ; ഷാറൂഖ് ഖാന്റെ മകനെ കുറിച്ച് അറിയേണ്ടത്
ആഡംബര കപ്പലിലെ ലഹരിപ്പാര്‍ട്ടിയുമായി ബന്ധപ്പെട്ട കേസില്‍ ആര്യൻ ഖാനെ നാർക്കോട്ടിക്സ് കൺട്രോൾ ബ്യൂറോ ചോദ്യംചെയ്യുകയാണ്
Update: 2021-10-03 09:20 GMT
ആഡംബര കപ്പലിലെ ലഹരിപ്പാര്‍ട്ടിയുമായി ബന്ധപ്പെട്ട കേസില്‍ ബോളിവുഡ് സൂപ്പർതാരം ഷാരൂഖ് ഖാന്റെ മകൻ ആര്യൻ ഖാനെ നാർക്കോട്ടിക്സ് കൺട്രോൾ ബ്യൂറോ (എൻസിബി) ചോദ്യംചെയ്യുകയാണ്. മുംബൈ തീരത്തുനിന്ന് പുറപ്പെട്ട കപ്പലില്‍ ശനിയാഴ്ച രാത്രി നടന്ന ലഹരി പാർട്ടിയുമായി ബന്ധപ്പെട്ടാണ് ചോദ്യംചെയ്യല്‍. ആര്യൻ ഖാനെതിരെ ഇതുവരെ കുറ്റം ചുമത്തുകയോ അറസ്റ്റ് ചെയ്യുകയോ ചെയ്തിട്ടില്ല .
വാര്‍ത്തകളില്‍ നിറഞ്ഞു നില്‍ക്കുന്ന ആര്യന് ഖാനെ കുറിച്ച് കൂടുതലറിയാം.
ബോളിവുഡ് സൂപ്പർതാരം ഷാരൂഖ് ഖാന്‍റേയും ഗൌരി ഖാന്‍റേയും മൂത്ത മകനാണ് ആര്യൻ ഖാന്‍. ദമ്പതികള്‍ക്ക് ഒരു മകളും ഇളയ മകനും കൂടിയുണ്ട്.
2019ല്‍ അമേരിക്കന്‍ കംപ്യൂട്ടര്‍ ആനിമേറ്റഡ് ചിത്രം ലയണ്‍ കിംഗിന്‍റെ ഹിന്ദി പതിപ്പില്‍ ആര്യൻ ഖാന്‍ ഡബ്ബിംഗ് ചെയ്തിരുന്നു. പ്രധാന കഥാപാത്രമായ സിംബയുടെ കാരക്റ്ററിനാണ് ആര്യന് ശബ്ദം കൊടുത്തത്. വ്യത്യസ്തമായ രീതിയിലാണ് ഷാരൂഖ് ഖാന്‍ ആര്യനെ സിംബയായി സാമൂഹിക മാധ്യമങ്ങളില്‍ അവതരിപ്പിച്ചത്. 2019 ഐസിസി ലോകകപ്പിൽ രാജ്യം മുഴുവൻ ടീം ഇന്ത്യയ്ക്കായി ആരവം മുഴക്കിയപ്പോള്‍, ഷാരൂഖ് ഖാൻ തന്‍റെയും ആര്യന്‍റെയും ടീം ഇന്ത്യ ജേഴ്സി ധരിച്ച ചിത്രം പങ്കിട്ടു. എസ്‌ആർ‌കെയുടെ ജഴ്‌സിയിൽ മുഫാസ (സിംബയുടെ അച്ഛന്‍) എന്ന് എഴുതിയിരുന്നപ്പോൾ, ആര്യൻ സിംബ എന്നെഴുതിയ ജഴ്‌സിയാണ് ധരിച്ചത്.
"ഞങ്ങൾ ഇൻക്രെഡിബിൾസ് ചെയ്യുമ്പോൾ, ആര്യന് ഏകദേശം ഒമ്പത് വയസായിരുന്നു. അവന്‍റെ ശബ്ദം കേൾക്കാൻ വളരെ മധുരമായിരുന്നു. ഇപ്പോൾ പോലും, വർഷങ്ങൾക്ക് ശേഷം ഞാൻ ലയൺ കിംഗിനായി ഇത് ചെയ്യുമ്പോൾ. എന്നെ സംബന്ധിച്ചിടത്തോളം ഇത് ആര്യനുമായുള്ള ഒരു അത്ഭുതകരമായ ബോണ്ടിംഗ് സമയമാണ്. "- ലയൺ കിംഗിൽ ആര്യനൊപ്പം ഒരുമിച്ച് പ്രവര്‍ത്തിക്കുന്നതിനെ കുറിച്ചുള്ള ഒരു വിനോദ വെബ്‌സൈറ്റിന്‍റെ ചോദ്യത്തോട് ഷാരൂഖ് അഭിപ്രായപ്പെട്ടു.
രാജ്യത്തെ മുന്‍നിര നടന്മാരില്‍ ഒരാളാണ് അച്ഛനെങ്കിലും അഭിനയ രംഗത്തേക്ക് കടന്നുവരാന്‍ ആര്യനു താല്‍പര്യം ഇല്ലെന്ന് ഷാരൂഖ് ഖാന്‍ തന്നെ ഒരു അഭിമുഖത്തില്‍ വ്യക്തമാക്കിയിട്ടുണ്ട്. "അവന് സുന്ദരാണ്, നല്ല പൊക്കമുണ്ട്, പക്ഷെ അഭിനയത്തേക്കാളുപരി അവന് താല്‍പര്യം എഴുത്തിലാണ്." - ഷാരൂഖ് പറയുന്നു.
സംവിധായകനായി സിനിമാ ലോകത്തേക്ക് കടന്നുവരാന്‍ മകന്‍ താല്‍പര്യപ്പെടുന്നുവെന്ന് മറ്റൊരു അഭിമുഖത്തില്‍ ഷാരൂഖ് വെളിപ്പെടുത്തി.
"എന്‍റെ മകനോ മകളോ അഭിനേതാക്കളാകാൻ തയ്യാറായിട്ടില്ല. സുഹാനയ്ക്ക് ഒരു നടിയാകാനുള്ള ആഗ്രഹമുണ്ട്. ആറ് മാസത്തിനുള്ളിൽ അവൾ സ്കൂൾ പഠനം പൂർത്തിയാക്കി, അഭിനയ പരിശീലനത്തിനായി നാല് വർഷത്തേക്ക് ഒരു വിദ്യാഭ്യാസ സ്ഥാപനത്തിലേക്ക് പോകും. ആര്യന് ഒരു നടനാകാൻ താൽപ്പര്യമില്ല, സിനിമകൾ നിർമ്മിക്കാനും സംവിധായകനാകാനും അമേരിക്കയിൽ അതിനായി പരിശീലനം നടത്താനും ആഗ്രഹിക്കുന്നു. അബ്രാം എനിക്കറിയില്ല, അവൻ ഒരു റോക്ക് സ്റ്റാർ ആകാൻ പര്യാപ്തനാണ്, "അദ്ദേഹം പറഞ്ഞു.
കുട്ടിക്കാലത്ത് കഭി ഖുഷി കഭി ഗമിൽ ആര്യൻ ഖാൻ ഒരു അതിഥി വേഷത്തിൽ ഉണ്ടായിരുന്നുവെന്ന് നിങ്ങൾക്കറിയാമോ? സിനിമയുടെ ആരംഭത്തില്‍ രാഹുലിന്‍റെ (ഷാരൂഖ് ഖാൻ അവതരിപ്പിച്ച കഥാപാത്രം) കുട്ടിക്കാലം കാണിക്കുന്നത് ഓർക്കുന്നില്ലേ? ജയ ബച്ചന്‍റെ കൈകളിലെ ചെറിയ രാഹുൽ, ആര്യൻ ഖാൻ ആയിരുന്നു. ഷാരൂഖ് ഖാനും പ്രീതി സിന്‍റയും അഭിനയിച്ച കഭി അൽവിദ നാ കെഹ്നയിലും ആര്യൻ ഖാന്‍ ഭാഗമായിരുന്നു.
അമിതാഭ് ബച്ചന്‍റെ ചെറുമകൾ നവ്യ നവേലി നന്ദയുടെ അടുത്ത സുഹൃത്താണ് ആര്യൻ ഖാൻ. ഇരുവരും പ്രണയത്തിലാണെന്ന് നേരത്തെ അഭ്യൂഹങ്ങളുണ്ടായിരുന്നു. എന്നാല്‍ അവർ നല്ല സുഹൃത്തുക്കൾ മാത്രമാണെന്ന് അവരുടെ കുടുംബങ്ങൾ വ്യക്തമാക്കി.
ആര്യൻ ഖാൻ ഈ വർഷമാണ് സതേൺ കാലിഫോർണിയ സർവകലാശാലയിൽ നിന്ന് ബിരുദം നേടിയത്. മേയിൽ നടന്ന ബിരുദദാന ചടങ്ങിൽ അദ്ദേഹം യൂണിവേഴ്സിറ്റിയിൽ നിന്ന് ബിരുദം നേടി. തന്‍റെ സർട്ടിഫിക്കറ്റ് കൈയില്‍പ്പിടിച്ച്, ബിരുദ വസ്ത്രം ധരിച്ച് നില്‍ക്കുന്ന ആര്യന്‍റെ ചിത്രം സാമൂഹിക മാധ്യമങ്ങളില്‍ വൈറലായിരുന്നു. ആര്യൻ, ബാച്ചിലർ ഓഫ് ഫൈൻ ആർട്സ്, സിനിമാറ്റിക് ആർട്സ്, ഫിലിം ആൻഡ് ടെലിവിഷൻ പ്രൊഡക്ഷൻ, സ്കൂൾ ഓഫ് സിനിമാറ്റിക് ആർട്സ് എന്നിവയിലാണ് ബിരുദം നേടിയത്.