കൊച്ചി: ലക്ഷദ്വീപിലെ വായ്മൊഴി ഭാഷയായ 'ജസരി' ഭാഷയില് ഒരുങ്ങിയ ആദ്യഗാനം റിലീസായി. മലയാളസിനിമയില് ആദ്യമായാണ് ജസരി ഭാഷയില് ഒരു ഗാനം എത്തുന്നത്. ഐഷ സുല്ത്താന ഒരുക്കിയ ഫ്ളഷിലൂടെയാണ് ഗാനം പുറത്തുവന്നത്. ലക്ഷദ്വീപിലെ തനത് സംഗീതവും പാരമ്പര്യ വരികളും ചേര്ത്തൊരുക്കിയ ഈ ഗാനം ആലപിച്ചത് ലക്ഷദ്വീപ് നിവാസിയായ ഷെഫീക്ക് കില്ത്താനാണ്. സംഗീതം കൈലാഷ് മേനോന്. ഗാനം റിലീസ് ചെയ്ത് മണിക്കൂറുകള്ക്കകം സോഷ്യല് മീഡിയയില് തരംഗമായിക്കഴിഞ്ഞു.
ദക്ഷിണേന്ത്യന് താരം ഡോ.വിഷ്ണുവര്ദ്ധനന്റെ 72 ാം ജന്മദിനത്തോടനുബന്ധിച്ച് നവകര്ണ്ണാടക ഫിലിം അക്കാദമി ഏര്പ്പെടുത്തിയ മൂന്ന് ചലച്ചിത്ര പുരസ്കാരങ്ങള് ഐഷ സുല്ത്താന സംവിധാനം ചെയ്ത ഫ്ലഷിന് ലഭിച്ചിരുന്നു. ലക്ഷദ്വീപില് നിന്നുള്ള ആദ്യ വനിതാ സംവിധായികയാണ് ഐഷാ സുല്ത്താന. അന്താരാഷ്ട്ര വനിതാ ചലച്ചിത്രമേളയിൽ നിറഞ്ഞ സദസ്സിലാണ് ചിത്രം പ്രദർശിപ്പിച്ചത്. ലക്ഷദ്വീപിന്റെ ഭൂപ്രകൃതി പശ്ചാത്തലമാക്കി ഒരുക്കിയ ഫ്ലഷ് ലക്ഷദ്വീപിന്റെ കഥ പറയുന്ന ഒരു ചിത്രമാണ്.
പുതുമുഖ താരങ്ങളെയും ദ്വീപ് നിവാസികളെയും ഉള്പ്പെടുത്തിയാണ് ഫ്ലഷ് ചിത്രീകരിച്ചിരിക്കുന്നത്. നായികാ പ്രാധാന്യമുള്ള ചിത്രത്തില് മുംബൈ മോഡലായ ഡിമ്പിള് പോള് ആണ് കേന്ദ്രകഥാപാത്രത്തെ അവതരിപ്പിക്കുന്നത്. ബീനാ കാസിം നിര്മ്മിച്ചിരിക്കുന്ന ചിത്രത്തിന്റെ ക്യാമറ കെ.ജി രതീഷാണ് നിര്വ്വഹിച്ചിരിക്കുന്നത്. എഡിറ്റിംഗ് - നൗഫല് അബ്ദുള്ള, സംഗീതം- വില്യം ഫ്രാന്സിസ്, കൈലാഷ് മേനോന്, പി.ആര്.ഒ- പി.ആര് സുമേരന്.