മികച്ച സേവനം: കുവൈത്ത് എയർവേയ്സിന് 2026 അപെക്‌സ് ഫൈവ്-സ്റ്റാർ റേറ്റിംഗ്

കുവൈത്ത് സിറ്റി: കുവൈത്ത് എയർവേയ്സിന് 2026 ഫൈവ്-സ്റ്റാർ എയർലൈൻ റേറ്റിംഗ് നൽകി എയർലൈൻ പാസഞ്ചർ എക്സ്പീരിയൻസ് അസോസിയേഷൻ (APEX). ലോകമെമ്പാടുമുള്ള യാത്രക്കാരിൽ നിന്നുള്ള വസ്തുനിഷ്ഠമായ അവലോകനങ്ങളെ അടിസ്ഥാനമാക്കിയാണ് ഈ അംഗീകാരം. യുഎസിലെ കാലിഫോർണിയയിൽ നടന്ന അവാർഡ് ദാന ചടങ്ങിൽ ആക്ടിംഗ് സിഇഒ അബ്ദുൽവഹാബ് അൽഷാത്തി അവാർഡ് സ്വീകരിച്ചു.

എയർലൈൻ ജീവനക്കാരുടെ പരിശ്രമവും സമർപ്പണവും യാത്രക്കാർക്ക് നൽകുന്ന ഉയർന്ന നിലവാരമുള്ള സേവനങ്ങളുമാണ് ഈ നേട്ടത്തിന് കാരണമെന്ന് ബോർഡ് ചെയർമാൻ അബ്ദുൽ മുഹ്‌സിൻ അൽ-ഫെഗാൻ കുവൈത്ത് ന്യൂസ് ഏജൻസിക്ക് (KUNA) നൽകിയ പ്രസ്താവനയിൽ പറഞ്ഞു.

ലോകത്തെ 600 എയർലൈനുകൾ നടത്തുന്ന ഒരു ദശലക്ഷത്തിലധികം വിമാന സർവീസുകളിലെ യാത്രക്കാരിൽ നിന്നുള്ള നിഷ്പക്ഷമായ ഫീഡ്ബാക്കിലൂടെയാണ് ഫൈവ്-സ്റ്റാർ എയർലൈൻ റേറ്റിംഗ് നിർണയിക്കുന്നത്. വിമാനത്തിലെ വിനോദം, ഭക്ഷണ നിലവാരം, മറ്റ് ഓൺബോർഡ് സേവനങ്ങൾ എന്നിവ വിലയിരുത്തൽ മാനദണ്ഡങ്ങളിൽ ഉൾപ്പെടുന്നു.

ട്രാവൽ ഡാറ്റ പ്ലാറ്റ്ഫോമായ എയർഹെൽപ്പിന്റെ 2024 ലെ വാർഷിക റിപ്പോർട്ട് പ്രകാരം, ഈ വർഷം ആദ്യം, കുവൈത്ത് എയർവേയ്സ് 109 ആഗോള എയർലൈനുകളിൽ 20-ാം സ്ഥാനത്തും മിഡിൽ ഈസ്റ്റിൽ അഞ്ചാം സ്ഥാനത്തുമെത്തിയിരുന്നുവെന്ന് അൽ-ഫെഗാൻ ചൂണ്ടിക്കാട്ടി.

കഴിഞ്ഞ വർഷം മണിസൂപ്പർമാർക്കറ്റിൽ നിന്ന് ഓൺബോർഡ് ഭക്ഷണ ഗുണനിലവാരത്തിന് മികച്ച ആഗോള റാങ്കിംഗ് നേടി. കൂടാതെ 2024 ഏപ്രിലിൽ ഏവിയേഷൻ അനലിറ്റിക്‌സ് സ്ഥാപനമായ സിറിയം കൃത്യനിഷ്ഠയുടെ കാര്യത്തിൽ മിഡിൽ ഈസ്റ്റിൽ രണ്ടാം സ്ഥാനത്തെത്തി.

1953ലാണ് കുവൈത്ത് നാഷണൽ എയർവേയ്‌സ് ലിമിറ്റഡ് എന്ന പേരിൽ കുവൈത്ത് എയർവേയ്‌സ് സ്ഥാപിതമായത്. 1954 മാർച്ച് 16-ന് ആദ്യ വിമാന സർവീസ് ആരംഭിച്ചു. 1962-ൽ ഗവൺമെന്റ് എയർലൈനിന്റെ പൂർണ ഉടമസ്ഥാവകാശം ഏറ്റെടുത്തു.