'ആഴക്കടലിലെ അത്ഭുതങ്ങൾ കാണാം'; പ്രഥമ മുസന്ദം അന്താരാഷ്ട്ര ഡൈവിങ് ഫെസ്റ്റിവൽ പ്രഖ്യാപിച്ചു

മസ്‌കത്ത്: മുസന്ദം ഗവർണറേറ്റിൽ ആദ്യമായി അന്താരാഷ്ട്ര ഡൈവിംഗ് ഫെസ്റ്റിവൽ സംഘടിപ്പിക്കുന്നു. 2025 ആഗസ്റ്റ് 25 മുതൽ 28 വരെയാണ് ഫെസ്റ്റിവൽ നടക്കുക. ഖസബിൽ നടന്ന പത്രസമ്മേളനത്തിലാണ് മുസന്ദം ഗവർണർ ഓഫീസ് ഇതുസംബന്ധിച്ച വിശദാംശങ്ങൾ പുറത്തുവിട്ടത്. ലോകത്തിന്റെ വിവിധ ഭാഗങ്ങളിൽ നിന്നുള്ള ഡൈവർമാർ, വിനോദസഞ്ചാരികൾ, നിക്ഷേപകർ എന്നിവരെ ആകർഷിച്ചുകൊണ്ട്, സുസ്ഥിരമായ ഒരു കൂട്ടായ്മയിലൂടെ പരിസ്ഥിതി ടൂറിസവും സമുദ്ര ടൂറിസവും പ്രോത്സാഹിപ്പിക്കുകയാണ് ഈ പരിപാടിയുടെ പ്രധാന ലക്ഷ്യം.

ഖസബിൽ വിവിധതരം പ്രവർത്തനങ്ങളും മത്സരങ്ങളും ഉത്സവത്തിന്റെ ഭാഗമായി അരങ്ങേറും. കൂടാതെ, കുമ്‌സാർ, ദിബ്ബ എന്നിവിടങ്ങളിലും പ്രത്യേക പരിപാടികൾ ഉണ്ടാകും. ഡീപ് സീ ക്ലീനപ്പ് കാമ്പയിൻ, 'ഫ്രീ ഡൈവിംഗ് ചാമ്പ്യൻ' ചലഞ്ച്, അണ്ടർവാട്ടർ ഫോട്ടോഗ്രാഫി മത്സരം, കയാക്ക് റേസ് , മികച്ച സമുദ്രജീവി വീഡിയോ മത്സരം എന്നിവ ഇവയിൽ ഉൾപ്പെടുന്നു.

മുസന്ദമിന്റെ ആഴക്കടലിൽ നിന്നുള്ള ചിത്രങ്ങളുടെയും വീഡിയോകളുടെയും പ്രദർശനം, പ്രധാന സ്ഥലങ്ങളിലേക്കുള്ള ഗ്രൂപ്പ് ഡൈവിങ് യാത്രകൾ, സമുദ്രജീവികളെക്കുറിച്ചുള്ള ഹ്രസ്വചിത്ര പ്രദർശനങ്ങൾ, ഡൈവിങ് ഉപകരണങ്ങൾ, പ്രാദേശിക സമുദ്രവിഭവങ്ങൾ, കരകൗശല വസ്തുക്കൾ എന്നിവ വിൽക്കുന്ന മാരിടൈം സൂഖ് (ചന്ത), ഒരു ഒമാനി ഡൈവിംഗ് ഫെഡറേഷൻ സ്ഥാപിക്കുന്നതിനുള്ള ഡൈവിംഗ് കോൺഫറൻസ് എന്നിവ അനുബന്ധ പരിപാടികളിൽ ഉൾപ്പെടും.

മുസന്ദം എക്‌സ്‌പ്ലോറേഷൻ ഡൈവിംഗ് സെന്ററുമായി സഹകരിച്ച് സംഘടിപ്പിക്കുന്ന ഈ ഉത്സവം പ്രൊഫഷണൽ ഡൈവർമാർക്കും, സാഹസിക യാത്ര ഇഷ്ടപ്പെടുന്നവർക്കും, മറൈൻ സ്‌പോർട്‌സ് താരങ്ങൾക്കും, മാധ്യമ പ്രവർത്തകർക്കും, ഡൈവിംഗ് കമ്പനികൾക്കും, ഉപകരണ വിതരണക്കാർക്കും, പരിസ്ഥിതി ടൂറിസ്റ്റുകൾക്കും, പ്രാദേശിക സന്ദർശകർക്കും ഒരു ആഗോള വേദിയായിരിക്കുമെന്ന് മുസന്ദം ഗവർണർ സയ്യിദ് ഇബ്രാഹിം സെയ്ദ് അൽ ബുസൈദി ഊന്നിപ്പറഞ്ഞു.

മുസന്ദമിനെ ഒരു പ്രമുഖ ഡൈവിങ് കേന്ദ്രമായി മാറ്റുക, ഗവർണറേറ്റിലെ അതുല്യമായ സമുദ്ര ജൈവവൈവിധ്യം എടുത്തു കാണിക്കുക, പ്രാദേശിക ടൂറിസം കേന്ദ്രങ്ങളെയും ഡൈവിങ് പ്രോജക്റ്റുകളെയും പിന്തുണയ്ക്കുക, കൂടാതെ സമൂഹങ്ങൾക്ക് സാമ്പത്തിക അവസരങ്ങൾ സൃഷ്ടിക്കുക എന്നിവയാണ് ഫെസ്റ്റിവലിന്റെ ലക്ഷ്യങ്ങളെന്നും അദ്ദേഹം ചൂണ്ടിക്കാട്ടി.

അറേബ്യൻ ഗൾഫ് ഇന്ത്യൻ മഹാസമുദ്രവുമായി ചേരുന്ന മുസന്ദമിന്റെ ജലം സമ്പന്നമായ സമുദ്ര ആവാസവ്യവസ്ഥയെ ഉൾക്കൊള്ളുന്നുണ്ടെന്നും, എല്ലാ വൈദഗ്ധ്യമുള്ള ഡൈവർമാർക്കും ഇത് ഒരു മികച്ച ഡൈവിങ് കേന്ദ്രമാണെന്നും അദ്ദേഹം എടുത്തുപറഞ്ഞു.

ഉയർന്ന നിലവാരമുള്ള വിനോദസഞ്ചാരികളെ ആകർഷിക്കുന്നതിലൂടെ ഡൈവിങ്് ടൂറിസം സാമ്പത്തിക വളർച്ചയ്ക്ക് ആക്കം കൂട്ടും. കൂടാതെ, ഡൈവ് സെന്ററുകൾ, ഹോട്ടലുകൾ, റെസ്റ്റോറന്റുകൾ, ഗതാഗത സേവനങ്ങൾ എന്നിവയുൾപ്പെടെയുള്ള അടിസ്ഥാന സൗകര്യ വികസനം ഇത് വർധിപ്പിക്കുമെന്നും, ഡൈവിങ്് ഇൻസ്ട്രക്ഷൻ, ബോട്ട് ഓപ്പറേഷൻ, ഹോസ്പിറ്റാലിറ്റി, മറൈൻ കൺസർവേഷൻ തുടങ്ങിയ മേഖലകളിൽ തൊഴിലവസരങ്ങൾ സൃഷ്ടിക്കുമെന്നും അദ്ദേഹം കൂട്ടിച്ചേർത്തു.