പിഴ ഒഴിവാക്കാൻ WPS വഴി ശമ്പളം ; ഓർമപ്പെടുത്തലുമായി ഒമാൻ തൊഴിൽ മന്ത്രാലയം

മസ്കത്ത്: പിഴ ഒഴിവാക്കാൻ തൊഴിലാളികളുടെ ശമ്പളം വേജ് പ്രൊട്ടക്ഷൻ സിസ്റ്റം വഴി കൃത്യസമയത്ത് കൈമാറണമെന്ന് ഓർമിപ്പിച്ച് ഒമാൻ തൊഴിൽ‌ മന്ത്രാലയം. എല്ലാ സ്ഥാപനങ്ങളും അവരുടെ തൊഴിലാളികളിൽ കുറഞ്ഞത് 90% പേരുടെയും നവംബറിലെ ശമ്പളം മുതൽ വേതന സംരക്ഷണ സംവിധാനം വഴി കൈമാറ്റം ചെയ്യണം.

സെപ്തംബർ 29-ന് നടത്തിയ മുൻ പ്രഖ്യാപനത്തെ തുടർന്നാണ് ഈ നിർദേശം. നിയമങ്ങൾ പാലിക്കാത്തതുമായി ബന്ധപ്പെട്ട സാമ്പത്തിക പിഴകൾ തടയുക എന്നതാണ് ഇതിന്റെ ലക്ഷ്യം. ഇവ പാലിക്കുന്നതിൽ പരാജയപ്പെട്ടാൽ പിഴയടക്കമുള്ള നടപടികളിലേക്ക് നീങ്ങും. ജീവനക്കാരൻ ശമ്പളത്തിന് അർഹനായതു മുതൽ മൂന്നുദിവസത്തിനുള്ളിൽ വേതനം ബാങ്ക് അക്കൗണ്ട് വഴി നൽകണമെന്നതടക്കമുള്ള മാർ​ഗനിർദേശങ്ങൾ നേരത്തെ മന്ത്രാലയം പുറപ്പെടുവിച്ചിരുന്നു.

കൈമാറ്റം ചെയ്യപ്പെടുന്ന വേതനം കരാറിൽ പറഞ്ഞിരിക്കുന്ന നിബന്ധനകൾക്കും വ്യവസ്ഥകൾക്കും അനുസൃതമായിരിക്കണം. ഏതെങ്കിലും അധിക അലവൻസുകൾ, ഓവർടൈം വേതനം അല്ലെങ്കിൽ കിഴിവുകൾ ഉണ്ടെങ്കിൽ അവ കൃത്യമായി വ്യക്തമാക്കിയിരിക്കണമെന്നും മാർഗനിർദേശത്തിൽ സൂചിപ്പിച്ചിരുന്നു.