വെളുത്ത വിവാഹ വസ്ത്രം പുതച്ച് അസ്സ റംസിക്ക് കണ്ണീരോടെ വിട

ജിദ്ദ: റിയാദ്​ വിമാനത്താവളത്തിൽ കഴിഞ്ഞ ശനിയാഴ്ച ഹൂതികൾ നടത്തിയ ആക്രമണത്തിൽ ​കൊല്ല​പ്പെട്ട ഈജിപ്​ഷ്യൻ യുവതി അസ്സ റംസിക്ക്​ കണ്ണീരോടെ വിട. വിവാഹത്തിനായി ദിവസങ്ങൾ മാത്രം ബാക്കിനിൽക്കെയാണ് 28-കാരിയായ അസ്സയുടെ ജീവിതം അപ്രതീക്ഷിതമായി അവസാനിച്ചത്. വെളുത്ത വിവാഹ വസ്ത്രം പുതച്ചാണ്​ അസ്സ റംസിയെ അവസാനമായി യാത്രയാക്കിയത്​.സൗദി വിമാനക്കമ്പനിയായ ഫ്ലൈനാസിൽ ഫ്ലൈറ്റ് അറ്റൻഡന്‍റായി ജോലി ചെയ്യുകയായിരുന്നു അസ്സയും സഹോദരിയും. ജോലിക്കിടെയാണ് ദാരുണമായ അന്ത്യം. ഈജിപ്തിലെ അസ്സയുടെ അൽ അത്ഫ് ഗ്രാമത്തിലാണ് മൃതദേഹം ഖബറടക്കിയത്.

കുടുംബവീട്ടിൽനിന്ന് മൃതദേഹം വഹിച്ച പെട്ടിക്കു മുകളിൽ വിരിച്ചത് അസ്സയുടെ വെളുത്ത വിവാഹവസ്ത്രം. മനസ്സിനെ ഉലക്കുന്ന ആ കാഴ്ച ഗ്രാമത്തെ ഒന്നാകെ ദുഃഖത്തിലാഴ്ത്തി. സമൂഹമാധ്യമങ്ങളിലുൾപ്പെടെ അസ്സയുടെ അന്ത്യയാത്രയുടെ ദൃശ്യങ്ങൾ വ്യാപകമായി പങ്കുവെച്ചു. റിയാദ് വിമാനത്താവളത്തിലെ ആക്രമണം നിരവധി കുടുംബങ്ങളുടെ ജീവിതത്തിലാണ് തീരാനഷ്ടം വരുത്തിയത്. അതിലൊന്നാണ് അസ്സ റംസിയുടെ ഈ നോവേറുന്ന കഥ. ഇന്ത്യക്കാരൻ അടക്കം 13 പേരാണ്​ ആ​ക്രമണത്തിൽ കൊല്ലപ്പെട്ടത്​. ഹൈദരാബാദ്​ സ്വദേശി മുഹമ്മദ്​ യൂസുഫ്​ അലി (46)യുടെ ഖബറടക്കം സൗദിയിൽ തന്നെ നടന്നു. സൗദിയിൽ ഐടി പ്രഫഷനലായ യൂസുഫ്​ അലിയുടെ ഭാര്യക്കും മക്കൾക്കും പരിക്കേറ്റിരുന്നു. ആക്രമണത്തിൽ ഗുരുതര പരി​ക്കേറ്റ മലയാളിയായ പാലക്കാട്​ സ്വ​ദേശി മുഹമ്മദ്​ റബ്ബാനി ഗുരുതരാവസ്ഥയിൽ ചികിത്സയിൽ തുടരുകയാണ്​.