സൗദി പ്രോ ലീ​ഗ്; അൽ നസ്റിന് തകർപ്പൻ ജയം

റിയാദ്: സൗദി പ്രോ ലീ​ഗിൽ അൽ നജ്മക്കെതിരെ അൽ നസ്റിന് തകർപ്പൻ ജയം. ഏകപക്ഷീയമായ അഞ്ച് ​ഗോളുകൾക്കാണ് അൽ നജ്മയെ തകർത്തുവിട്ടത്. ജയത്തോടെ മഞ്ഞപ്പട പോയിന്റ് പട്ടികയിൽ ഒന്നാമതെത്തി. മത്സരത്തിലെ ഏഴാം മിനിറ്റിൽ അൽ നസ്റിന് അനുകൂലമായി ലഭിച്ച പെനാൽറ്റി ​വലയിലെത്തിച്ച് സൂപ്പർ താരം ക്രിസ്റ്റ്യാനോ റൊണാൾഡോയാണ് സ്കോറിങ്ങിന് തുടക്കമിട്ടത്.

32-ാം മിനിറ്റിൽ ബ്രോസോവിച്ചിന്റെ അസിസ്റ്റിൽ നിന്നും കിങ്സ്ലി കോമാൻ ടീമിന്റെ രണ്ടാം ഗോൾ നേടി. 43-ാം മിനിറ്റിൽ ഇനിഗോ മാർട്ടിനെസ് തൊടുത്തുവിട്ട ലോങ് റേഞ്ചർ ഗോൾകീപ്പറെ കാഴ്ചക്കാരനാക്കി വലയിൽ പതിച്ചതോടെ ആദ്യ പകുതി അവസാനിക്കുമ്പോൾ അൽ നസ്ർ മൂന്ന് ​ഗോളിന് മുന്നിലെത്തിയിരുന്നു.

മത്സരത്തിന്റെ രണ്ടാം പകുതിയിലേക്ക് കടന്ന് അധികം വൈകാതെ തന്നെ 52-ാം മിനിറ്റിൽ റൊണാൾഡോയുടെ മികച്ചൊരു പാസിൽ നിന്നും സെനഗലീസ് സൂപ്പർ താരം സാദിയോ മാനെ നാലാം ഗോളും കണ്ടെത്തി. 80-ാം മിനിറ്റിൽ അബ്ദുറഹ്മാൻ ഗരീബ് എടുത്ത കോർണർ കിക്ക് ഹെഡറിലൂടെ വലയിലാക്കി ഇനിഗോ മാർട്ടിനെസ് തന്റെ രണ്ടാം ഗോളും ടീമിന്റെ അഞ്ചാം ഗോളും പൂർത്തിയാക്കി. ഈ വിജയത്തോടെ 58 പോയിന്റുകളുമായി അൽ നസ്ർ പോയിന്റ് പട്ടികയിൽ ഒന്നാം സ്ഥാനത്തെത്തി. അതേസമയം, വെറും 8 പോയിന്റുകൾ മാത്രമുള്ള അൽ നജ്മ പട്ടികയിൽ ഏറ്റവും അവസാന സ്ഥാനത്താണ്.