ഉംറ വിസാ കാലാവധി മുന്ന് മാസമായി ദീര്ഘിപ്പിച്ചു.
തീര്ഥാടകരുടെ സൗകര്യം കണക്കിലെടുത്താണ് കാലാവധി നീട്ടിയത്
Update: 2022-06-02 18:04 GMT
തീര്ഥാടകരുടെ സൗകര്യം കണക്കിലെടുത്ത് ഉംറ വിസാ കാലാവധി മൂന്ന് മാസമായി ദീര്ഘിപ്പിച്ചതായി ഹജ്ജ് ഉംറ മന്ത്രാലയം അറിയിച്ചു. വിസ കാലയളവില് തീര്ഥാടകര്ക്ക് രാജ്യത്തെവിടെയും സഞ്ചരിക്കാനുള്ള അനുമതിയുണ്ടെന്നും മന്ത്രാലയം വ്യക്തമാക്കി.
ഉംറ വിസാ കാലാവധി ഒരു മാസത്തില് നിന്ന് മൂന്നു മാസമായി ദീര്ഘിപ്പിച്ചതായി ഹജ്, ഉംറ മന്ത്രി ഡോ. തൗഫീഖ് അല്റബീഅ അറിയിച്ചു. കൂടുതല് ഉംറ തീര്ഥാടകരെ മികച്ച നിലയില് സ്വീകരിക്കാനാണ് വിഷന് 2030 പദ്ധതി ലക്ഷ്യമിടുന്നത്. ഉംറ വിസകളില് രാജ്യത്ത് എത്തുന്നവര്ക്ക് സൗദിയിലെ മുഴുവന് പ്രവിശ്യകളിലും സഞ്ചരിക്കാന് സാധിക്കുമെന്നും മന്ത്രി പറഞ്ഞു.
ജോര്ദാന് തലസ്ഥാനമായ അമ്മാനില് സൗദി എംബസിയില് വിളിച്ചുചേര്ത്ത പത്രസമ്മേളനത്തില് സംസാരിക്കുകയായിരുന്നു മന്ത്രി. മിനായിലും അറഫയിലും തീര്ഥാടകരുടെ യാത്ര സുഗമമാക്കാനും വേഗത്തിലാക്കാനുമാണ് സ്മാര്ട്ട് കാര്ഡ് പദ്ധതിയിലൂടെ ലക്ഷ്യമിടുന്നത്. ഹജിനുള്ള ഒരുക്കങ്ങള് പൂര്ത്തിയായിട്ടുണ്ട്. ഹജ് സ്മാര്ട്ട് കാര്ഡുകള് ഈ വര്ഷം നടപ്പാക്കുമെന്നും അദ്ദേഹം അറിയിച്ചു. മാതൃകാ രീതിയില് ഹജ് സംഘാടനത്തിന് ഡിജിറ്റല് സാങ്കേതികവിദ്യകള് സഹായിക്കും. ഇപ്പോള് ഇ-സേവനം വഴി ഉംറ വിസകള് ഇരുപത്തിനാലു മണിക്കൂറിനകം ഇഷ്യു ചെയ്യുന്നുണ്ട്. പുണ്യസ്ഥലങ്ങളിലെ താമസം, യാത്ര എന്നിവ ഇ-സേവനം വഴി മുന്കൂട്ടി തെരഞ്ഞെടുക്കാന് തീര്ഥാടകര്ക്ക് സാധിക്കുമെന്നും മന്ത്ര പറഞ്ഞു.