ദുബൈ: യു.എ.ഇയിൽ റൂപേ കാർഡുകൾ പ്രാബല്യത്തിൽ. ആഭ്യന്തര തലത്തിൽ കാർഡ് ഉപയോഗത്തിന് ഇന്ത്യയും യു.എ.ഇയും കരാറിലെത്തി. റൂപേക്ക് തുല്യമായ കാർഡ് യു.എ.ഇ വികസിപ്പിക്കുന്നതോടെ, അതിന് ഇന്ത്യയിലും അനുമതി ലഭിക്കും. വ്യവസായ, സാങ്കേതിക മേഖലകളിലെ സഹകരണത്തിനും ഇരു രാജ്യങ്ങളും ധാരണയിലെത്തി.
നാഷനൽ പേയ്മെന്റ് കോർപറേഷൻ ഓഫ് ഇന്ത്യയും യു.എ.ഇ അധികൃതരുമായാണ് റൂപേ കാർഡുകൾ സംബന്ധിച്ച കരാറിൽ ഒപ്പുവച്ചത്. കേന്ദ്ര വാണിജ്യ, വ്യവസായ മന്ത്രി പിയൂസ് ഗോയൽ, അബൂദബി നിക്ഷേപ അതോറിറ്റി എം.ഡി ശൈഖ് ഹാമിദ് ബിൻ സായിദ് ആൽ നഹ്യാൻ എന്നിവരുടെ സാന്നിധ്യത്തിൽ ആയിരുന്നു ധാരണാപത്രത്തിൽ ഒപ്പുവച്ചത്.
ഇതോടെ റൂപേ കാർഡുകൾ യു.എ.ഇയിൽ ഉപയോഗിക്കാൻ അവസരം ഒരുങ്ങി. യു.എ.ഇ സ്വന്തം നിലയ്ക്ക് ക്രെഡിറ്റ് കാർഡ് സംവിധാനം നടപ്പാക്കാൻ ഒരുങ്ങുകയാണ്. ഇന്ത്യയുടെ റൂപേ കാര്ഡിന് യു.എ.ഇ നേരത്തെ അനുമതി നൽകിയിരുന്നു. എന്നാൽ കരാർ ഇപ്പോൾ മാത്രമാണ് ഒപ്പുവയ്ക്കുന്നത്. തെരഞ്ഞെടുത്ത സ്ഥാപനങ്ങളില് നിന്ന് ഉൽപ്പന്നങ്ങള് വാങ്ങുമ്പോൾ മികച്ച നിരക്കിളവ് ഉൾപ്പെടെ നിരവധി വാഗ്ദാനങ്ങളാണ് നാഷനല് പേയ്മെന്റ്സ് കോര്പറേഷന് ഓഫ് ഇന്ത്യ അധികൃതര് നൽകുന്നത്.
നിക്ഷേപ മേഖലയുമായി ബന്ധപ്പെട്ട ഇന്ത്യ, യു.എ.ഇ ഉന്നതതല ദൗത്യസംഘത്തിന്റെ യോഗവും അബൂദബിയിൽ നടന്നു. കേന്ദ്ര വാണിജ്യ, വ്യവസായ മന്ത്രി പിയൂസ്ഗോയൽ, അബൂദബി നിക്ഷേപ അതോറിറ്റി എം.ഡി ശൈഖ് ഹാമിദ് ബിൻ സായിദ് ആൽ നഹ്യാൻ എന്നിവർ സംസാരിച്ചു.
2013ൽ തുടക്കം കുറിച്ച ടാസ്ക് ഫോഴ്സിനു ചുവടെ സാമ്പത്തിക, നിക്ഷേപ രംഗങ്ങളിൽ ഏറെ മുന്നോട്ടുപോകാൻ ഇരു രാജ്യങ്ങൾക്കും സാധിച്ചു. ഇന്ത്യയും യു.എ.ഇയും ഒപ്പുവച്ച സമഗ്ര സാമ്പത്തിക കരാറിന്റെ നേട്ടങ്ങൾ യോഗം വിലയിരുത്തി. വ്യവസായം, നവീന സാങ്കേതികത എന്നീ മേഖലകളിൽ ഇരു രാജ്യങ്ങളും കരാറിൽ ഒപ്പുവച്ചു.