ഇന്ത്യയിൽ കുട്ടികൾക്കിടയിലുള്ള മരണങ്ങളിൽ പ്രധാന കാരണങ്ങളിലൊന്നായി കാൻസർ മാറുന്നുവെന്ന് പ്രശസ്ത വൈദ്യശാസ്ത്ര മാസികയായ 'ദി ലാൻസെറ്റ്' പുറത്തുവിട്ട ഒരു പഠനത്തിൽ സൂചിപ്പിക്കുന്നു. മതിയായ ചികിത്സാ സൗകര്യങ്ങളുടെ കുറവിനേക്കാൾ, രോഗം തിരിച്ചറിയുന്നതിലുണ്ടാകുന്ന കാലതാമസമാണ് പലപ്പോഴും മരണത്തിലേക്ക് നയിക്കുന്നതെന്ന് അതിൽ ചൂണ്ടിക്കാട്ടുന്നു. ഇന്ത്യയിൽ കുട്ടികളിലെ കാൻസർ മരണങ്ങൾ ഉയരാൻ പ്രധാന കാരണം രോഗം മൂർച്ഛിച്ച ഘട്ടത്തിൽ മാത്രം തിരിച്ചറിയുന്നതാണ്. പ്രാരംഭ ഘട്ടത്തിൽ തന്നെ ചികിത്സ ആരംഭിച്ചാൽ മാറ്റിയെടുക്കാവുന്ന പല കേസുകളും വൈകിയുള്ള രോഗനിർണയം കാരണം സങ്കീർണമാകുന്നു.
ഐസിഎംആറിന്റെ കണക്കുകൾ പ്രകാരം, 2022ൽ ഇന്ത്യയിലെ ആകെ കാൻസർ കേസുകളിൽ മൂന്ന് മുതൽ അഞ്ച് ശതമാനം വരെ കുട്ടികളിലായിരുന്നു. പ്രതിവർഷം 0-14 വയസിനിടയിലുള്ള 50,000 മുതൽ 60,000 വരെ പുതിയ കേസുകൾ ഇന്ത്യയിൽ റിപ്പോർട്ട് ചെയ്യപ്പെടുന്നു. ആഗോളതലത്തിൽ 2023ൽ 3,77,000 കുട്ടികൾക്ക് കാൻസർ ബാധിക്കുകയും 1,44,000 മരണങ്ങൾ സംഭവിക്കുകയും ചെയ്തു.
ഇന്ത്യയിലെ കുട്ടികളിൽ രക്താർബുദം (Leukaemias) ആണ് ഏറ്റവും കൂടുതൽ കണ്ടുവരുന്നത്. ലിംഫോമ, സെൻട്രൽ നെർവസ് സിസ്റ്റം ട്യൂമറുകൾ എന്നിവയാണ് തൊട്ടുപിന്നാലെയുള്ളത്. നഗരങ്ങളിൽ രോഗനിർണയ സംവിധാനങ്ങൾ ഉള്ളതിനാൽ കൂടുതൽ കേസുകൾ റിപ്പോർട്ട് ചെയ്യപ്പെടുന്നുണ്ടെങ്കിലും, ഗ്രാമീണ മേഖലകളിൽ പല കേസുകളും ഇന്നും രേഖപ്പെടുത്തപ്പെടാതെ പോകുന്നുണ്ട്.
വികസിത രാജ്യങ്ങളിൽ കുട്ടികളിലെ കാൻസർ അതിജീവന നിരക്ക് 80 ശതമാനത്തിന് മുകളിലാണെങ്കിലും ഇന്ത്യയിൽ ഇത് എല്ലായിടത്തും ഒരേപോലെയല്ല. നഗരങ്ങളിലെ അത്യാധുനിക സൗകര്യങ്ങളുള്ള ആശുപത്രികളിൽ മികച്ച ഫലം ലഭിക്കുമ്പോൾ, സാധാരണ സാഹചര്യങ്ങളിൽ ചികിത്സ തേടുന്ന കുട്ടികളുടെ അതിജീവന നിരക്ക് കുറവാണ്.
പ്രധാന കണ്ടെത്തലുകൾ
കുട്ടികളിലുണ്ടാകുന്ന ലക്ഷണങ്ങളെ സാധാരണ അസുഖങ്ങളായി കണ്ട് അവഗണിക്കുന്ന പ്രവണത മാതാപിതാക്കൾക്കിടയിലുണ്ട്. തുടർച്ചയായ പനി, വിളർച്ച, അസാധാരണമായ മുഴകൾ തുടങ്ങിയ ലക്ഷണങ്ങൾ ഗൗരവമായി കാണേണ്ടതുണ്ട്. നഗരപ്രദേശങ്ങളിൽ മികച്ച ചികിത്സ ലഭ്യമാണെങ്കിലും ഗ്രാമപ്രദേശങ്ങളിൽ വിദഗ്ധ ചികിത്സയ്ക്കുള്ള സൗകര്യങ്ങൾ കുറവാണ്. ഇത് രോഗികൾക്ക് കൃത്യസമയത്ത് വിദഗ്ധ സഹായം ലഭിക്കുന്നതിന് തടസമാകുന്നു. ദീർഘകാലം നീണ്ടുനിൽക്കുന്ന ചികിത്സാ ചെലവ് സാധാരണ കുടുംബങ്ങളെ സംബന്ധിച്ച് വലിയ വെല്ലുവിളിയാണ്. ഇത് പകുതിവഴിയിൽ ചികിത്സ നിർത്തുന്ന സാഹചര്യം ഉണ്ടാക്കുന്നു.
പരിഹാര മാർഗങ്ങൾ
പ്രാഥമിക ആരോഗ്യ കേന്ദ്രങ്ങളിലെ ഡോക്ടർമാർക്കും ആരോഗ്യ പ്രവർത്തകർക്കും കുട്ടികളിലെ കാൻസർ ലക്ഷണങ്ങൾ തിരിച്ചറിയാൻ പ്രത്യേക പരിശീലനം നൽകണം. സ്കൂൾ തലത്തിലും പ്രാദേശിക തലത്തിലും കൃത്യമായ സ്ക്രീനിങ് പരിശോധനകൾ ഉറപ്പാക്കുക. കുട്ടികൾക്കുള്ള കാൻസർ ചികിത്സ പൂർണമായും സർക്കാർ മേൽനോട്ടത്തിൽ സൗജന്യമായോ സബ്സിഡി നിരക്കിലോ ലഭ്യമാക്കേണ്ടത് അനിവാര്യമാണ്.
ലക്ഷണങ്ങൾ ശ്രദ്ധിക്കുക
ശരീരഭാരം കുറയുക, എല്ലുകളിലും സന്ധികളിലും വേദന, വിട്ടുമാറാത്ത തലവേദന, കഴുത്തിലോ വയറിലോ ഉണ്ടാകുന്ന മുഴകൾ എന്നിവ കണ്ടാൽ എത്രയും വേഗം ഒരു പീഡിയാട്രിക് ഓങ്കോളജിസ്റ്റിനെ കാണിക്കേണ്ടതാണ്. മുൻകൂട്ടിയുള്ള പരിശോധനയും കൃത്യമായ ചികിത്സയും വഴി കുട്ടികളിലെ കാൻസർ മരണങ്ങൾ വലിയൊരു പരിധിവരെ കുറയ്ക്കാൻ സാധിക്കുമെന്ന് ഈ റിപ്പോർട്ട് അടിവരയിടുന്നു.