ഭക്ഷണം കഴിക്കാൻ ഇരിക്കുന്നതേ ഓർമയുള്ളൂ, ഒരു പ്ലേറ്റ് ബിരിയാണിയാണെങ്കിലും തീർക്കാൻ അഞ്ച് മിനിറ്റ് തികച്ച് വേണ്ട. നിങ്ങളും ഇങ്ങനെയാണോ? ഭക്ഷണം നന്നായി ചവച്ചരയ്ക്കാൻ പോലും സമയം കളയാതെ വേഗത്തിൽ വിഴുങ്ങുന്ന ശീലം നിങ്ങൾക്കുണ്ടെങ്കിൽ ഒരു നിമിഷം... വളരെ നിസാരമായി തോന്നാമെങ്കിലും ഈ ശീലം ശരീരത്തിനുള്ളിൽ ഗുരുതരമായ മെറ്റബോളിക് പ്രശ്നങ്ങളാണ് ഉണ്ടാക്കുന്നതെന്ന് പഠനങ്ങൾ പറയുന്നു. വേഗത്തിൽ ആഹാരം കഴിക്കുന്നത് ദഹനവ്യവസ്ഥയെ തകിടം മറിക്കുക മാത്രമല്ല, രക്തത്തിലെ പഞ്ചസാരയുടെ അളവ് പെട്ടെന്ന് വർധിക്കുന്നതിനും കാരണമാകുമെന്ന് ഗ്യാസ്ട്രോഎൻട്രോളജി വിദഗ്ധർ മുന്നറിയിപ്പ് നൽകുന്നു.
ഭക്ഷണം സാവധാനം കഴിക്കേണ്ടതിന്റെ പ്രാധാന്യത്തെക്കുറിച്ചും, വേഗത്തിൽ കഴിക്കുന്നത് വഴി ശരീരത്തിനുണ്ടാകുന്ന പ്രധാന പ്രശ്നങ്ങൾ എന്തൊക്കെയാണെന്നും പരിശോധിക്കാം:
വേഗത്തിലുള്ള ആഹാരശീലം വരുത്തുന്ന നാല് പ്രധാന ആരോഗ്യപ്രശ്നങ്ങൾ
രക്തത്തിലെ പഞ്ചസാരയുടെ പെട്ടെന്നുള്ള വർധനവ്: നമ്മൾ വളരെ വേഗത്തിൽ ആഹാരം കഴിക്കുമ്പോൾ വലിയ അളവിൽ കാർബോഹൈഡ്രേറ്റുകൾ ഒന്നിച്ച് ശരീരത്തിലെത്തുന്നു. ഇത് രക്തത്തിലെ ഗ്ലൂക്കോസിന്റെ അളവ് പെട്ടെന്ന് കുത്തനെ ഉയരാൻ കാരണമാകും. ഈ ഗ്ലൂക്കോസിനെ നിയന്ത്രിക്കാൻ ശരീരം കൂടുതൽ ഇൻസുലിൻ ഉത്പാദിപ്പിക്കേണ്ടി വരുന്നു. ദീർഘകാലാടിസ്ഥാനത്തിൽ ഈ ശീലം ഇൻസുലിൻ റെസിസ്റ്റൻസിലേക്കും ടൈപ്പ്-2 പ്രമേഹത്തിലേക്കും വഴിതെളിക്കും
അമിതവണ്ണവും അമിതാഹാരവും: നമ്മൾ ആഹാരം കഴിക്കാൻ തുടങ്ങി വയർ നിറഞ്ഞുകഴിഞ്ഞാൽ, "വയർ നിറഞ്ഞു" എന്ന സന്ദേശം തലച്ചോറിലെത്താൻ കുറഞ്ഞത് 20 മിനിറ്റെങ്കിലും എടുക്കും. എന്നാൽ നമ്മൾ 5-10 മിനിറ്റുകൊണ്ട് വേഗത്തിൽ ഭക്ഷണം കഴിച്ചുതീർക്കുമ്പോൾ, തലച്ചോറിന് ഈ സന്ദേശം ലഭിക്കുന്നതിന് മുമ്പ് തന്നെ ശരീരത്തിന് ആവശ്യമായതിലും കൂടുതൽ കലോറി നമ്മൾ ഉള്ളിലാക്കിയിട്ടുണ്ടാകും. ഇത് അമിതവണ്ണത്തിന് കാരണമാകുന്നു
വയറു വീർക്കലും ഗ്യാസും: ഭക്ഷണം കൃത്യമായി ചവച്ചരയ്ക്കാതെ വലിയ കഷ്ണങ്ങളായി വേഗത്തിൽ വിഴുങ്ങുമ്പോൾ, അതിനോടൊപ്പം വലിയ അളവിൽ വായുവും നമ്മൾ ഉള്ളിലേക്ക് ശ്വസിക്കുന്നുണ്ട്. ഇത് ആമാശയത്തിൽ അമിതമായ ഗ്യാസ് നിറയുന്നതിനും, വയറു വീർക്കലിനും, വിട്ടുമാറാത്ത പുളിച്ചുതികട്ടലിനും കാരണമാകും
ദഹനരസങ്ങളുടെ കുറവ്: ദഹനപ്രക്രിയ ആരംഭിക്കുന്നത് നമ്മുടെ വായിൽ നിന്നാണ്. ഭക്ഷണം നന്നായി ചവച്ചരയ്ക്കുമ്പോൾ ഉമിനീരിലെ എൽസൈമുകൾ ഭക്ഷണവുമായി കലരുകയും ദഹനം എളുപ്പമാക്കുകയും ചെയ്യും. എന്നാൽ വേഗത്തിൽ വിഴുങ്ങുമ്പോൾ ആമാശയത്തിന് കൂടുതൽ കഠിനമായി ജോലി ചെയ്യേണ്ടി വരുന്നു, ഇത് ദഹനക്കേടിലേക്ക് നയിക്കുന്നു
ഭക്ഷണസമയം ആരോഗ്യകരമാക്കാൻ മൂന്ന് ലളിതമായ വഴികൾ
നിങ്ങൾ എന്ത് കഴിക്കുന്നു എന്നതുപോലെ തന്നെ പ്രധാനമാണ് അത് 'എങ്ങനെ കഴിക്കുന്നു' എന്നതും. ഭക്ഷണത്തിന്റെ വേഗത കുറയ്ക്കുന്നത് നിങ്ങളുടെ ശരീരഭാരത്തെയും പ്രമേഹത്തെയും നിയന്ത്രണത്തിലാക്കാൻ സഹായിക്കുന്ന ഏറ്റവും ലളിതമായ ഒരു ഔഷധമാണ്.