ഡെന്റൽ ഫ്ലോസോ വാട്ടർ ഫ്ലോസറോ? പല്ലുകൾക്കിടയിലെ അഴുക്ക് നീക്കാൻ ഏതാണ് മികച്ചത്?

ദിവസത്തിൽ രണ്ടുതവണ പല്ലുതേക്കുന്നത് വായുടെ ആരോഗ്യത്തിന് അത്യാവശ്യമാണ്. എന്നാൽ പല്ലുകൾക്കിടയിലെ ഇടുങ്ങിയ ഭാഗങ്ങളിൽ അടിഞ്ഞുകൂടുന്ന ഭക്ഷണാവശിഷ്ടങ്ങളും പ്ലാക്കും നീക്കം ചെയ്യാൻ ബ്രഷിങ് മാത്രം മതിയാകില്ല. ഇതിനായി ഡെന്റൽ ഫ്ലോസ് അല്ലെങ്കിൽ വാട്ടർ ഫ്ലോസർ ഉപയോഗിക്കാം. എന്നാൽ ഇവയിൽ ഏതാണ് കൂടുതൽ ഫലപ്രദം? രണ്ടിന്റെയും ഗുണങ്ങളും പരിമിതികളും വിശദീകരിക്കുകയാണ് ഡോ. നിഷ താക്കർ.

ഡോ. കരിഷ്മ എസ്തറ്റിക്സിലെ കോസ്മെറ്റിക് ഡെന്റിസ്റ്റായ ഡോ. നിഷ താക്കറിന്റെ അഭിപ്രായത്തിൽ, പരമ്പരാഗത ഡെന്റൽ ഫ്ലോസിനും വാട്ടർ ഫ്ലോസറിനും അവയുടേതായ ഗുണങ്ങളുണ്ട്.

ഡെന്റൽ ഫ്ലോസ്; പ്ലാക്ക് നീക്കം ചെയ്യാൻ ഫലപ്രദം

പല്ലുകൾക്കിടയിലെ ഇടുങ്ങിയ ഭാഗങ്ങളിൽ അടിഞ്ഞുകൂടുന്ന പ്ലാക്ക് നീക്കം ചെയ്യാൻ പരമ്പരാഗത ഡെന്റൽ ഫ്ലോസ് ഫലപ്രദമാണ്. പല്ലുകളിൽ ഒട്ടിപ്പിടിക്കുന്ന ബാക്ടീരിയകൾ അടങ്ങിയ പ്ലാക്ക് ശരിയായി നീക്കം ചെയ്യുന്നത് മോണരോഗങ്ങളുടെ സാധ്യത കുറയ്ക്കാൻ സഹായിക്കും.

ഫ്ലോസ് ഉപയോഗിക്കുമ്പോൾ പല്ലുകൾക്കിടയിൽ കുടുങ്ങുകയോ നീക്കാൻ ബുദ്ധിമുട്ടുണ്ടാകുകയോ ചെയ്യുന്നുണ്ടെങ്കിൽ വാക്സ് പുരട്ടിയ ഫ്ലോസ് ഉപയോഗിക്കാം. ഇത് പല്ലുകൾക്കിടയിലൂടെ കൂടുതൽ എളുപ്പത്തിൽ നീങ്ങും. കൈകളുടെ ചലനത്തിൽ ബുദ്ധിമുട്ടുള്ളവർക്ക് ഫ്ലോസ് ഹോൾഡറുകളും സഹായകരമാണ്. ഇന്റർഡെന്റൽ ബ്രഷുകൾ, പ്രത്യേകമായി രൂപകൽപ്പന ചെയ്ത പിക്കുകൾ, സ്റ്റിക്കുകൾ എന്നിവയും പല്ലുകൾക്കിടയിലെ ശുചീകരണത്തിന് ഉപയോഗിക്കാവുന്ന മാർഗങ്ങളാണ്.

വാട്ടർ ഫ്ലോസർ; ഭക്ഷണാവശിഷ്ടങ്ങൾ നീക്കാൻ സഹായിക്കും

വെള്ളത്തിന്റെ ശക്തി ഉപയോഗിച്ച് പല്ലുകൾക്കിടയിലെ ഭക്ഷണാവശിഷ്ടങ്ങൾ നീക്കം ചെയ്യുന്ന ഉപകരണമാണ് വാട്ടർ ഫ്ലോസർ. ഓറൽ ഇറിഗേറ്റർ എന്നും ഇത് അറിയപ്പെടുന്നു.

പല്ലുകൾക്കിടയിൽ കുടുങ്ങിയ ഭക്ഷണാവശിഷ്ടങ്ങൾ നീക്കം ചെയ്യാൻ വാട്ടർ ഫ്ലോസർ ഫലപ്രദമാണ്. പ്ലാക്ക് നീക്കം ചെയ്യാനും ഒരു പരിധിവരെ സഹായിക്കുമെങ്കിലും, സാധാരണ ഫ്ലോസ് പോലെ പല്ലുകളിൽ ഒട്ടിപ്പിടിച്ചിരിക്കുന്ന പ്ലാക്ക് ഉരച്ചുനീക്കുന്നതിൽ ഇതിന് അത്ര ഫലപ്രാപ്തിയുണ്ടാകണമെന്നില്ല.

കൈകളുടെ ചലനത്തിൽ ബുദ്ധിമുട്ടുള്ളവർക്കും ബ്രേസ്, ഇംപ്ലാന്റ് എന്നിവയുള്ളവർക്കും വാട്ടർ ഫ്ലോസർ ഉപയോഗിക്കുന്നത് എളുപ്പമായിരിക്കും.

വാട്ടർ ഫ്ലോസർ ഉപയോഗിക്കുമ്പോൾ ശ്രദ്ധിക്കേണ്ട കാര്യങ്ങൾ

വാട്ടർ ഫ്ലോസർ ഉപയോഗിക്കുന്നതിന് ചില പരിമിതികളുമുണ്ട്. പല്ലുകൾക്കിടയിലെ എല്ലാ ഇടുങ്ങിയ ഭാഗങ്ങളിലും സാധാരണ ഫ്ലോസ് എത്തുന്നതുപോലെ ഇത് എത്തണമെന്നില്ല. കൂടാതെ, ബാക്ടീരിയകൾ പകരാനുള്ള സാധ്യതയുള്ളതിനാൽ വാട്ടർ ഫ്ലോസർ മറ്റുള്ളവരുമായി പങ്കുവെച്ച് ഉപയോഗിക്കരുത്.

ഉപകരണത്തിന് തുടക്കത്തിൽ ചെലവുണ്ടാകുന്നതിനൊപ്പം പതിവായി വൃത്തിയാക്കി പരിപാലിക്കുകയും വേണം.

ഏതാണ് തിരഞ്ഞെടുക്കേണ്ടത്?

സ്ഥിരമായി ശരിയായ രീതിയിൽ ഡെന്റൽ ഫ്ലോസ് ഉപയോഗിക്കുകയും ബുദ്ധിമുട്ടുകളൊന്നുമില്ലാതിരിക്കുകയും ചെയ്യുന്നവർക്ക് വാട്ടർ ഫ്ലോസറിലേക്ക് മാറേണ്ട നിർബന്ധമില്ലെന്നാണ് ഡോ. നിഷ താക്കറിന്റെ അഭിപ്രായം. എന്നാൽ പരമ്പരാഗത ഫ്ലോസ് ഉപയോഗിക്കാൻ പ്രയാസമുള്ളവർക്കും മറ്റൊരു മാർഗം ആഗ്രഹിക്കുന്നവർക്കും വാട്ടർ ഫ്ലോസർ പ്രയോജനകരമായൊരു ബദലാണ്.

ഏത് രീതി തിരഞ്ഞെടുക്കുന്നു എന്നതിലുപരി, പല്ലുകൾക്കിടയിലെ ശുചീകരണം പതിവാക്കുക എന്നതാണ് പ്രധാനം. ഓരോരുത്തരുടെയും പല്ലുകളുടെയും മോണകളുടെയും ആരോഗ്യസ്ഥിതിക്ക് അനുയോജ്യമായ രീതി ഏതെന്ന് ദന്തഡോക്ടറുടെ നിർദേശപ്രകാരം തീരുമാനിക്കാം.