പുലർച്ചെ 3 മണിക്ക് ഉറക്കമുണരുന്നുണ്ടോ? ശരീരം നൽകുന്ന സൂചനയായിരിക്കാം; കാരണങ്ങൾ അറിയാം

എല്ലാ രാത്രിയും ഏതാണ്ട് ഒരേ സമയത്ത്, പ്രത്യേകിച്ച് പുലർച്ചെ മൂന്ന് മണിയോടെ ഉറക്കമുണരുന്നത് പലരിലും ആശങ്കയുണ്ടാക്കാറുണ്ട്. ഇതിന് പിന്നിൽ ആത്മീയമായ കാരണങ്ങളാണെന്നും ഹോർമോൺ വ്യതിയാനങ്ങളാണെന്നും സമൂഹമാധ്യമങ്ങളിൽ പല തരത്തിലുള്ള വാദങ്ങളുണ്ട്. എന്നാൽ മിക്കപ്പോഴും ഉറക്കത്തെ തടസ്സപ്പെടുത്തുന്ന സാധാരണ കാരണങ്ങളാണ് ഇതിന് പിന്നിലെന്ന് വിദഗ്ധർ ചൂണ്ടിക്കാട്ടുന്നു.

മുംബൈയിലെ സർ എച്ച്.എൻ റിലയൻസ് ഫൗണ്ടേഷൻ ആശുപത്രിയിലെ ക്ലിനിക്കൽ സൈക്കോളജിസ്റ്റ് മെഹെസാബിൻ ദോർദിയുടെ അഭിപ്രായത്തിൽ, രാത്രിയിൽ ഇടയ്ക്കിടെ ഉറക്കമുണരുന്നത് സ്വാഭാവികമാണ്. പലരും രാത്രിയിൽ പലതവണ ഉണരാറുണ്ടെങ്കിലും രാവിലെ അത് ഓർമിക്കണമെന്നില്ല. എന്നാൽ എല്ലാ രാത്രിയും ഒരേ സമയത്ത് ഉറക്കമുണരുകയും വീണ്ടും ഉറങ്ങാൻ പ്രയാസപ്പെടുകയും ചെയ്യുന്നുണ്ടെങ്കിൽ ശ്രദ്ധിക്കേണ്ടതുണ്ട്.

സമ്മർദവും ഉത്കണ്ഠയും കാരണമാകാം

ഉറക്കത്തെ തടസ്സപ്പെടുത്തുന്ന പ്രധാന ഘടകങ്ങളിലൊന്നാണ് മാനസിക സമ്മർദം. ശരീരത്തെ ഉണരാൻ സജ്ജമാക്കുന്നതിന്റെ ഭാഗമായി പുലർച്ചെയോടടുക്കുമ്പോൾ കോർട്ടിസോൾ എന്ന ഹോർമോണിന്റെ അളവ് സ്വാഭാവികമായി ഉയരാറുണ്ട്. എന്നാൽ ദീർഘകാല സമ്മർദം, ഉത്കണ്ഠ, വൈകാരിക ബുദ്ധിമുട്ടുകൾ, അമിതമായ ക്ഷീണം എന്നിവ അനുഭവിക്കുന്നവരിൽ ഉറക്കത്തിനിടയിലെ ഉണർവ് കൂടാനും വീണ്ടും ഉറങ്ങാൻ ബുദ്ധിമുട്ടുണ്ടാകാനും സാധ്യതയുണ്ട്.

എന്നാൽ പുലർച്ചെ മൂന്ന് മണിക്ക് ഉറക്കമുണരുന്നതെല്ലാം കോർട്ടിസോളിന്റെ വ്യതിയാനം മൂലമാണെന്ന് കരുതരുത്. ഉറക്കത്തെ ബാധിക്കുന്ന നിരവധി ഘടകങ്ങളുണ്ട്.

ഉറക്കം തടസ്സപ്പെടുത്തുന്ന മറ്റ് കാരണങ്ങൾ

ഉത്കണ്ഠയും വിഷാദവും ഉറക്കത്തെ ബാധിക്കാം. അതുപോലെ, ഉറക്കത്തിനിടെ ശ്വാസതടസ്സം അനുഭവപ്പെടുന്ന സ്ലീപ് അപ്നിയ, വിട്ടുമാറാത്ത വേദന, ആസിഡ് റിഫ്ലക്സ്, ഹോർമോൺ വ്യതിയാനങ്ങൾ തുടങ്ങിയ ആരോഗ്യപ്രശ്നങ്ങളും രാത്രിയിൽ ഉറക്കമുണരാൻ കാരണമാകാം.

ചില മരുന്നുകളും ഉറക്കത്തിന്റെ ക്രമത്തെ ബാധിച്ചേക്കാം. വൈകുന്നേരങ്ങളിൽ കഫീൻ അടങ്ങിയ പാനീയങ്ങൾ കുടിക്കുക, ഉറങ്ങുന്നതിന് മുമ്പ് ഏറെ നേരം മൊബൈൽ ഫോൺ ഉപയോഗിക്കുക, മദ്യപിക്കുക, ദിവസവും വ്യത്യസ്ത സമയങ്ങളിൽ ഉറങ്ങുകയും ഉണരുകയും ചെയ്യുക തുടങ്ങിയ ശീലങ്ങളും ഉറക്കത്തെ തടസ്സപ്പെടുത്താം.

ഉറക്കമുണർന്നാൽ ചിന്തകൾ കൂടുന്നുണ്ടോ?

പുലർച്ചെ ഉറക്കമുണരുമ്പോൾ ജോലി, ബന്ധങ്ങൾ, സാമ്പത്തിക കാര്യങ്ങൾ, ആരോഗ്യം തുടങ്ങിയ വിഷയങ്ങളെക്കുറിച്ചുള്ള ചിന്തകൾ പെട്ടെന്ന് ശക്തമാകുന്നതായി ചിലർക്ക് അനുഭവപ്പെടാം. പകൽ സമയത്ത് വലിയ പ്രശ്നമായി തോന്നാത്ത കാര്യങ്ങൾ പോലും രാത്രിയിലെ നിശ്ശബ്ദതയിൽ കൂടുതൽ സങ്കീർണമായി തോന്നിയേക്കാം.

ചുറ്റുമുള്ള ശ്രദ്ധതിരിക്കുന്ന കാര്യങ്ങൾ കുറയുമ്പോൾ സ്വന്തം ചിന്തകളിലേക്ക് കൂടുതൽ ശ്രദ്ധ പോകുന്നതാണ് ഇതിന് ഒരു കാരണം. സമ്മർദം മൂലം ശരീരം ഇതിനകം കൂടുതൽ ജാഗ്രതയിലാണെങ്കിൽ മനസ്സ് ആശങ്കകളിലേക്ക് വേഗത്തിൽ കടക്കാനും സാധ്യതയുണ്ട്. എന്നാൽ ഇത്തരം അനുഭവങ്ങൾ ഉണ്ടെന്നതുകൊണ്ടുമാത്രം ഗുരുതരമായ മാനസികാരോഗ്യ പ്രശ്നമുണ്ടെന്ന് അർഥമാക്കാനാവില്ല.

ഉറക്കമുണരുമ്പോൾ ശ്രദ്ധിക്കേണ്ട കാര്യങ്ങൾ

പുലർച്ചെ എത്ര മണിക്ക് ഉറക്കമുണരുന്നു എന്നതിൽ മാത്രം ശ്രദ്ധ കേന്ദ്രീകരിക്കുന്നതിനുപകരം, ആ സമയത്ത് ശരീരത്തിലും മനസ്സിലും എന്താണ് സംഭവിക്കുന്നതെന്ന് നിരീക്ഷിക്കുകയാണ് പ്രധാനം.

•  ജോലി സംബന്ധമായ ചിന്തകളോ ഉത്കണ്ഠയോ ഉണ്ടോ?
•  ശരീരത്തിൽ വേദനയോ അസ്വസ്ഥതയോ അനുഭവപ്പെടുന്നുണ്ടോ?
•  അമിതമായ ചൂടോ വിയർപ്പോ അനുഭവപ്പെടുന്നുണ്ടോ?
•  ശ്വാസതടസ്സം അനുഭവപ്പെടുന്നുണ്ടോ?
•  ഉറങ്ങുന്നതിന് മുമ്പ് കഫീൻ ഉപയോഗിക്കുന്നതോ മൊബൈൽ ഫോൺ ഏറെ നേരം നോക്കുന്നതോ പതിവാണോ?

ഇത്തരം കാര്യങ്ങൾ ഉറക്കത്തെ ബാധിക്കുന്ന യഥാർഥ കാരണം കണ്ടെത്താൻ സഹായിച്ചേക്കാം.

എപ്പോൾ ഡോക്ടറെ കാണണം?

പുലർച്ചെ മൂന്ന് മണിക്ക് ഉറക്കമുണരുന്നത് ശരീരം നൽകുന്ന നിഗൂഢമായ സന്ദേശമാണെന്ന് കരുതേണ്ടതില്ല. സമ്മർദം, ജീവിതശൈലിയിലെ മാറ്റങ്ങൾ, ഉറക്കത്തെ ബാധിക്കുന്ന ആരോഗ്യപ്രശ്നങ്ങൾ എന്നിവയിൽ ഏതെങ്കിലും കാരണമാകാം.

ഈ പ്രശ്നം ആഴ്ചകളോളം തുടരുകയോ പകൽ സമയത്തെ പ്രവർത്തനങ്ങളെ ബാധിക്കുകയോ അമിതമായ ക്ഷീണം അനുഭവപ്പെടുകയോ ചെയ്യുന്നുണ്ടെങ്കിൽ ഡോക്ടറുടെ സഹായം തേടണം. ശ്വാസതടസ്സം പോലുള്ള ലക്ഷണങ്ങൾ ഉണ്ടെങ്കിൽ പ്രത്യേകിച്ചും പരിശോധന വൈകിക്കരുത്.

ഓർക്കുക: ഉറക്കമുണരുന്ന സമയം മാത്രം നോക്കി രോഗനിർണയം നടത്താനാവില്ല. ഉറക്കത്തിന്റെ ദൈർഘ്യം, ഗുണനിലവാരം, മാനസികാവസ്ഥ, മറ്റ് ശാരീരിക ലക്ഷണങ്ങൾ എന്നിവ കൂടി വിലയിരുത്തുകയാണ് വേണ്ടത്.