സ്വർണത്തെക്കാൾ വിലയേറിയ തേൻ, കേൾക്കുമ്പോൾ വിചിത്രമായി തോന്നാം. പ്രകൃതിയുടെ അപൂർവമായ അത്ഭുതങ്ങളിൽ ഒന്നാണ് പച്ച തേൻ. സാധാരണ തേനിൽ നിന്ന് വ്യത്യസ്തമായി, വളരെ പരിമിതമായ അളവിൽ മാത്രമേ ഇത് ഉത്പാദിപ്പിക്കപ്പെടുന്നുള്ളൂ, അസാധാരണമാംവിധം ചെലവേറിയതാണ് ഇതിൻ്റെ പ്രത്യേകത.
പച്ച തേനിന്റെ സവിശേഷതകളിൽ പ്രധാനം അതിന്റെ അപൂർവതയാണ്. അവ ഉത്പാദിപ്പിക്കുന്ന തേനീച്ചകൾ കുറവാണ്, മാത്രമല്ല അതിന്റെ രൂപീകരണത്തിന് ആവശ്യമായ സാഹചര്യങ്ങൾ ഇടയ്ക്കിടെ മാത്രമേ ഉണ്ടാവുകയുമുള്ളൂ. തേനീച്ചകൾ പ്രത്യേക പച്ച നിറമുള്ള പൂക്കളിൽ നിന്ന് അമൃത് ശേഖരിക്കുമ്പോൾ പച്ച തേൻ ഉണ്ടാകുന്നു, പ്രകൃതിയിൽ വളരെ അപൂർവമായി മാത്രം സംഭവിക്കുന്ന ഒന്നാണിത്.
പ്രകൃതിദത്തമായി ലഭിക്കുന്ന പച്ച തേൻ പ്രധാനമായും പ്രത്യേക പൂക്കളിൽ നിന്നാണ് ലഭിക്കുന്നത്. ഗ്രേയാനോടോക്സിനുകൾ അടങ്ങിയ റോഡോഡെൻഡ്രോൺ പൂക്കളിൽ നിന്ന് ഉത്പാദിപ്പിക്കുന്ന നേപ്പാളിലെ ഹിമാലയൻ മാഡ് ഹണി ഇതിന് ഒരു ഉദാഹരണമാണ്. കാട്ടുചെടികൾ, ധാതുക്കൾ, പാരിസ്ഥിതിക ഘടകങ്ങൾ എന്നിവയുടെ സ്വാധീനത്താൽ ഈ തേനിന് ഇളം പച്ച നിറമോ കടും പച്ച നിറമോ ഉണ്ടാകാം.
മലേഷ്യയിലെ കുഡാറ്റ് മേഖലയിലും ഇറ്റലിയുടെ ചില ഭാഗങ്ങളിലും സ്പിരുലിനയുമായി കലർത്തിയ പച്ച തേൻ വിൽക്കുന്നുണ്ട്. വളരെ അപൂർവവും വിലപ്പെട്ടതുമായ ഈ ഇനം പൂർണമായും പ്രകൃതിദത്തമാണ്.
ഹിമാലയൻ ഭീമൻ തേനീച്ചകൾ 3,500 മീറ്ററിനു മുകളിൽ ഉയരത്തിലുള്ള പാറക്കെട്ടുകളിലാണ് കൂടുകൾ പണിയുന്നത്. ഗുരുങ് വർഗത്തിൽ പെടുന്നവർ മുളകൊണ്ടുള്ള ഏണിപ്പടികളിൽ കയറിയാണ്, ജീവൻ പണയപ്പെടുത്തി തേൻ ശേഖരിക്കുന്നത്. വർഷത്തിൽ രണ്ടുതവണ മാത്രം നടത്തുന്ന ഒരു പ്രവർത്തനമാണിത്. ഒരു കിലോഗ്രാം തേൻ ഉത്പാദിപ്പിക്കാൻ തേനീച്ചകൾക്ക് ഒരു ആയുഷ്കാലം മുഴുവൻ എടുക്കും. മാഡ് ഹണിയുടെ വില 100 ഗ്രാമിന് 200 ഡോളർ വരെയാണ്, അതുകൊണ്ടുതന്നെ അതിന്റെ മൂല്യം വിലയേറിയ ലോഹങ്ങൾക്ക് തുല്യമായാണ് കാണക്കാക്കുന്നത്.
വെറും മധുരമാത്രമല്ല ഈ തേനിൻ്റെ പ്രത്യേകത. നേരിയ ലഹരിയും നിരവധി ആരോഗ്യ ഗുണങ്ങളും ഉണ്ടെന്നും വിശ്വസിക്കപ്പെടുന്നു. പ്രതിരോധശേഷി വർദ്ധിപ്പിക്കുകയും സമ്മർദ്ദം ഒഴിവാക്കുകയും മൊത്തത്തിലുള്ള ക്ഷേമം മെച്ചപ്പെടുത്തുകയും ചെയ്യുമെന്നും കരുതുന്നു.
ലോകത്തിലെ ഏറ്റവും വിലകൂടിയ തേനുകളിൽ ചിലത് തുർക്കിയിലെ എൽവിഷ് ഹണി, സെന്റോറി ഹണി എന്നിവയും ഉൾപ്പെടുന്നു, സമുദ്രനിരപ്പിൽ നിന്ന് 2,500 മീറ്റർ ഉയരത്തിൽ സ്ഥിതി ചെയ്യുന്ന ഗുഹകളിൽ നിന്നാണ് ഇവ വിളവെടുക്കുന്നത്. കിലോഗ്രാമിന് 10 ലക്ഷം വരെ വില ലഭിക്കും , പലപ്പോഴും പച്ചകലർന്നതോ അതുല്യമായതോ ആയ നിറമായിരിക്കും. ഇന്ത്യയിലെ ഹിമാലയൻ വനങ്ങളിൽ കാട്ടുതേൻ കാണപ്പെടുന്നുണ്ടെങ്കിലും, സ്വാഭാവികമായി ലഭിക്കുന്ന പച്ച തേൻ വളരെ അപൂർവമാണ്.