മോണയിലെ വീക്കം നിസാരമായി കാണരുത്; കാൻസറിന്റെ ലക്ഷണമാകാം

മോണകൾ വീങ്ങി ചുവപ്പ് നിറമാവുകയോ അല്ലെങ്കിൽ മുമ്പെങ്ങുമില്ലാത്ത തരത്തിൽ വിളർച്ച ഉണ്ടാവുകയോ ചെയ്താൽ ചിലർ ആദ്യം ചിന്തിക്കുക ഇത് കാൻസറിന്റെ ലക്ഷണങ്ങൾ ആണോ എന്നാണ്. എന്നാൽ മോണയിൽ അസഹനീയമായ വേദനയോ അമിത രക്തസ്രാവമോ ഉണ്ടായാൽ ശ്രദ്ധിക്കണം. അത് ചിലപ്പോൾ കാൻസറിന്റെ ലക്ഷണമായിരിക്കാം. മോണവീക്കവും ചുവപ്പു നിറവുമെല്ലാം സാധാരണയായി കണ്ടു വരുന്നതാണ്. എന്നാൽ ഇത് മൂന്നോ നാലോ ആഴ്ച നീണ്ടു നിൽക്കുകയാണെങ്കിൽ ഒരു സ്പെഷ്യലിസ്റ്റിന്റെ സഹായം നിർബന്ധമായും തേടണം.

മോണയുടെ മുകളിലോ താഴയോ ഉള്ള കോശങ്ങൾ നിയന്ത്രണാതീതമായി വളരുകയോ അല്ലെങ്കിൽ മുഴകൾ രൂപപ്പെടുകയോ ചെയ്യുന്നത് മൂലമുണ്ടാകുന്ന കാൻസറാണിത്. വായക്കുള്ളിലോ ചുണ്ടുകളിലോ വെളുത്തതോ ചുവന്നതോ ആയ പാടുകൾ രൂപപ്പെടുന്നു. തുടക്കത്തിൽ ഇത് കുമിളയോ വ്രണമോ ആയി മാറും. സാധാരണഗതിയിലുള്ള പാടാണെങ്കിൽ പെട്ടന്ന് ഉണങ്ങും എന്നാൽ ചിലത് ഉണക്കം വരാതെ പല്ലുകൾ പോലും വ്രണത്തിൽ ആഴ്ന്നു പോകുന്ന സാഹചര്യം ഉണ്ടാവുന്നു. സിഗരറ്റ്, മറ്റു പുകയില വസ്തുക്കൾ തുടങ്ങിയവ ഉപയോഗിക്കുന്നവരിലാണ് ഇത്തരം കാൻസറുകൾ കൂടുതലായി വരുന്നത്. ഈ കാൻസറിനെ പലപ്പോഴും വെറും ഒരു മോണരോഗമായി തെറ്റിദ്ധരിക്കാറുണ്ട്.

മോണയിലെ കാൻസറിന്റെ പ്രാരംഭ ലക്ഷണങ്ങൾ

. വായ്പ്പുണ്ണ്- മൂന്ന് മുതൽ നാലാഴ്ച നീണ്ടു നിൽക്കുന്നവയാണെങ്കിൽ

. വായക്കുള്ളിൽ വെള്ളയോ ചുവപ്പോ കലർന്ന പാടുകൾ

. വായിലും ചെവിയിലും അനുഭവപ്പെടുന്ന വേദന

. അമിതമായി ശരീര ഭാരം കുറയുന്നു

ചികിത്സ

കാൻസറിന്റെ സ്വഭാവം മനസിലാക്കി ചികിത്സിക്കുക എന്നതാണ് പ്രധാനം. വായ, തൊണ്ട, തുടങ്ങിയ ഭാഗങ്ങളിലാണോ അതോ ശരീരത്തിന്റെ മറ്റു ഭാഗങ്ങളിലാണോ പടർന്നത് എന്നത് കൃത്യമായി അറിയണം. തുടർന്ന് ശസ്ത്രക്രിയ, കീമോ തെറാപ്പി, റേഡിയേഷൻ തെറാപ്പി പോലുള്ള ചികിത്സാരീതികൾ ഉപയോഗിക്കാം.