കാഠ്മണ്ഡു: നേപ്പാളിലെ അന്നപൂർണ പർവതത്തിൽ ഇന്ത്യൻ പർവതാരോഹകനെ കാണാതായത് യു.എൻ സുസ്ഥിര വികസന ലക്ഷ്യങ്ങളെക്കുറിച്ചുള്ള അവബോധ ദൗത്യത്തിനിടെ. രാജസ്ഥാൻ കിഷൻഗഢ് സ്വദേശിയായ 34കാരൻ അനുരാഗ് മാലുവിനെയാണ് കാണാതായത്.
യു.എൻ സുസ്ഥിര വികസന ലക്ഷ്യങ്ങളെക്കുറിച്ച് അവബോധം സൃഷ്ടിക്കാനായി 8,000 മീറ്ററിന് മുകളിലുള്ള 14 പർവതങ്ങളും ഏഴ് ഭൂഖണ്ഡങ്ങളിലെയും ഉയരം കൂടിയ കൊടുമുടികളും (സെവന് സമ്മിറ്റ്സ്) കയറാനുള്ള ദൗത്യത്തിലായിരുന്നു അനുരാഗ്.
അന്നപൂർണ പർവതത്തിലെ ക്യാമ്പ് മൂന്നിൽ നിന്ന് ഇറങ്ങുന്നതിനിടെയാണ് ഇദ്ദേഹത്തെ കാണാതായത്. തിങ്കളാഴ്ച രാവിലെ മുതലാണ് അനുരാഗിനെ കാണാതായതെന്ന് ട്രെക്കിങ് പര്യവേഷണം നടത്തിയ സെവൻ സമ്മിറ്റ് ട്രെക്സിന്റെ ചെയർമാൻ മിംഗ്മ ഷെർപ്പ പറഞ്ഞു.
"അനുരാഗിനെ കാണാതായതിന് പിന്നാലെ ഞങ്ങൾ വ്യാപക തെരച്ചിൽ ആരംഭിച്ചിരുന്നു. തിങ്കളാഴ്ച വൈകുന്നേരം വരെയും അവനെ കണ്ടെത്താനായില്ല"- ഷെർപ്പ പറഞ്ഞു. ചൊവ്വാഴ്ചയും തിരച്ചിൽ തുടരുമെന്നും അദ്ദേഹം കൂട്ടിച്ചേർത്തു.
സമുദ്രനിരപ്പിൽ നിന്ന് 8,091 മീറ്റർ ഉയരത്തിൽ സ്ഥിതി ചെയ്യുന്ന അന്നപൂർണ ലോകത്തിലെ ഏറ്റവും ഉയരമുള്ള പത്താമത്തെ പർവതമാണ്. കയറാനുള്ള ബുദ്ധിമുട്ടിന്റേയും അപകടങ്ങളുടേയും കാര്യത്തിൽ ശ്രദ്ധേയമാണ് അന്നപൂർണ പർവതം.