ഇപിഎഫ്: വിരമിക്കൽ പ്രായം മുതൽ പെൻഷൻ വരെ, ശമ്പളക്കാർ അറിഞ്ഞിരിക്കേണ്ട അഞ്ച് കാര്യങ്ങൾ

ശമ്പളക്കാരായ ജീവനക്കാരെ സംബന്ധിച്ചിടത്തോളം ഇപിഎഫ് എന്നത് കേവലം ഒരു സമ്പാദ്യ പദ്ധതിയല്ല, മറിച്ച് വിരമിക്കൽ കാലത്തേക്കുള്ള വലിയൊരു കൈത്താങ്ങാണ്. എന്നാൽ വിരമിക്കൽ പ്രായം, പലിശ, പിൻവലിക്കൽ നിയമങ്ങൾ എന്നിവയെക്കുറിച്ച് പലരിലും തെറ്റായ ധാരണകൾ നിലനിൽക്കുന്നുണ്ട്. 2026 മാർച്ചിലെ പുതുക്കിയ വിവരങ്ങൾ പ്രകാരം അറിഞ്ഞിരിക്കേണ്ട അഞ്ച് കാര്യങ്ങൾ ഇവയാണ്.

• തെറ്റിദ്ധാരണ: ഇപിഎഫ് വിരമിക്കൽ പ്രായം 60 ആണ് 
• വസ്തുത: ഇപിഎഫ് നിയമങ്ങൾ അനുസരിച്ച് ഔദ്യോഗിക വിരമിക്കൽ പ്രായം 58 വയസാണ്. 58 വയസ കഴിഞ്ഞാൽ ഇപിഎഫ് വിഹിതം അടയ്ക്കുന്നത് സാധാരണയായി നിൽക്കും. വ്യക്തികൾ അതിനുശേഷവും ജോലിയിൽ തുടർന്നാലും ഇപിഎഫ് ആനുകൂല്യങ്ങൾക്കായി 58 വയസാണ് പരിഗണിക്കുന്നത്.
• തെറ്റിദ്ധാരണ: വിരമിച്ചാലുടൻ പലിശ ലഭിക്കുന്നത് നിൽക്കും
• വസ്തുത: വിരമിച്ച ഉടനെ പലിശ ലഭിക്കുന്നത് നിൽക്കില്ല. ഒരാൾ 58 വയസിൽ വിരമിക്കുകയാണെങ്കിൽ, ആ തുകയ്ക്ക് അടുത്ത മൂന്ന് വർഷം കൂടി (അതായത് 61 വയസ് വരെ) പലിശ ലഭിച്ചുകൊണ്ടിരിക്കും. എന്നാൽ ഈ കാലാവധിക്ക് ശേഷം അക്കൗണ്ട് 'ഇൻഓപ്പറേറ്റീവ്' ആയി മാറുകയും പലിശ ലഭിക്കാതാവുകയും ചെയ്യും.
• തെറ്റിദ്ധാരണ: നേരത്തെ വിരമിച്ചാലും മൂന്ന് വർഷം മാത്രമേ പലിശ ലഭിക്കൂ
• വസ്തുത: 58 വയസിന് മുമ്പ് ജോലിയിൽ നിന്ന് മാറുന്നവർക്ക് പലിശ ലഭിക്കുന്ന കാലയളവ് വ്യത്യസ്തമായിരിക്കും. ഉദാഹരണത്തിന്, ഒരാൾ 45-ാം വയസിൽ ജോലി വിടുകയാണെങ്കിൽ, വിരമിക്കൽ പ്രായമായ 58 വയസ് വരെ അദ്ദേഹത്തിന്റെ അക്കൗണ്ടിൽ പലിശ ലഭിച്ചുകൊണ്ടിരിക്കും. എന്നാൽ 57 വയസിലാണ് വിരമിക്കുന്നതെങ്കിൽ 60 വയസ് വരെ മാത്രമേ പലിശ ലഭിക്കൂ.
• തെറ്റിദ്ധാരണ: ജോലിയിൽ ചെറിയ ഇടവേള വന്നാൽ അക്കൗണ്ട് അപ്രത്യക്ഷമാകും
• വസ്തുത: വിഹിതം അടയ്ക്കാത്ത കാലയളവിനെ 'നോൺ-കോൺട്രിബ്യൂട്ടറി പിരീഡ്' എന്നാണ് വിളിക്കുന്നത്. തുടർച്ചയായി മൂന്ന് വർഷം വിഹിതം ലഭിച്ചില്ലെങ്കിൽ മാത്രമേ അക്കൗണ്ട് പ്രവർത്തനരഹിതമാകൂ. അപ്പോഴും അക്കൗണ്ട് ക്ലോസ് ചെയ്യപ്പെടില്ല. അംഗങ്ങൾക്ക് പണം കൈമാറാനോ പിൻവലിക്കാനോ രേഖകൾ പുതുക്കാനോ സാധിക്കും. എന്നാൽ ഈ ഇടവേള പെൻഷൻ കണക്കാക്കുന്ന കാലയളവിൽ ഉൾപ്പെടുത്തില്ല.
• തെറ്റിദ്ധാരണ: വിരമിച്ചാൽ മാത്രമേ പെൻഷൻ ലഭിച്ചു തുടങ്ങൂ
• വസ്തുത: ഇപിഎസ് പെൻഷൻ ലഭിച്ചു തുടങ്ങുന്നത് 58 വയസ് തികയുമ്പോഴാണ്. നിങ്ങൾ ആ സമയത്ത് ജോലിയിൽ തുടരുകയാണെങ്കിലും പെൻഷൻ ലഭിക്കാൻ അർഹതയുണ്ട്. 2026 മാർച്ചിലെ കണക്കനുസരിച്ച്, പ്രതിമാസ കുറഞ്ഞ പെൻഷൻ 1,000 രൂപയാണ്. ഇത് 7,500 രൂപയായി ഉയർത്തണമെന്ന ശിപാർശ പാർലമെന്ററി സമിതി മുന്നോട്ടുവെച്ചിട്ടുണ്ടെങ്കിലും സർക്കാർ ഔദ്യോഗികമായി ഇതുവരെ പ്രഖ്യാപിച്ചിട്ടില്ല.