ദസറ ദിനങ്ങളിൽ മൈസൂരു മൃഗശാല സന്ദർശിച്ചത് 1.56 ലക്ഷം പേർ; വരുമാനം 1.91 കോടി

ബംഗളൂരു: മൈസൂരു ശ്രീ ചാമരാജേന്ദ്ര സുവോളജിക്കൽ ഗാർഡൻസിൽ (മൈസൂരു മൃഗശാല) വിജയദശമി സന്ദർശകരുടെ എണ്ണത്തിൽ ഗണ്യമായ വർധന. ഇത്തവണ 11 ദിവസത്തെ ഉത്സവ കാലയളവിൽ 1.56 ലക്ഷം സന്ദർശകരാണ് മൃഗശാലയിലെത്തിയത്. ഗേറ്റ് കലക്ഷൻ വരുമാനമായി 1.91 കോടി രൂപ ലഭിച്ചു. ഒക്ടോബർ ഒന്നിന് ആയുധപൂജ ദിനത്തിൽ 27,033 സന്ദർശകർ എത്തി. ഇത് 33.21 ലക്ഷം രൂപയുടെ വരുമാനമുണ്ടാക്കി. ഒക്ടോബർ രണ്ടിന് വിജയദശമി ദിനത്തിൽ 27,272 സന്ദർശകരാണ് ഉണ്ടായിരുന്നത്. വരുമാനം 34.07 ലക്ഷം രൂപയായിരുന്നു.

2024 ലെ ദസറയിൽ മൃഗശാലയിൽ സമീപ വർഷങ്ങളിലെ ഏറ്റവും ഉയർന്ന തിരക്കാണ് രേഖപ്പെടുത്തിയത്, 1.65 ലക്ഷം സന്ദർശകരും 1.71 കോടി രൂപ (171.29 ലക്ഷം രൂപ) ഗേറ്റ് കളക്ഷനും ഉണ്ടായിരുന്നു. ആയുധ പൂജ ദിനത്തിൽ 21,996 സന്ദർശകരും 23.07 ലക്ഷം രൂപയും ലഭിച്ചു. വിജയദശമി ദിനത്തിൽ 34,659 സന്ദർശകരും എത്തി, ഇത് 35.54 ലക്ഷം രൂപ നേടി, അഞ്ച് വർഷത്തിനിടയിലെ രണ്ടാമത്തെ ഉയർന്ന ഒറ്റ ദിവസത്തെ വരുമാനമാണിത്.

2023-ൽ മൃഗശാല 1.65 ലക്ഷം സന്ദർശകരെത്തി. വരുമാനം 1.67 കോടി രൂപ (167.10 ലക്ഷം രൂപ)യിലെത്തി. ആയുധ പൂജ ദിനത്തിലാണ് ഏറ്റവും കൂടുതൽ സന്ദർശകർ എത്തിയത്, 28,287 പേർ, വിജയദശമി ദിനത്തിൽ 23,890 പേർ. ഈ ദിവസങ്ങളിൽ യഥാക്രമം 28.23 ലക്ഷം രൂപയും 24.58 ലക്ഷം രൂപയും വരുമാനം ലഭിച്ചു.