മുംബൈ: 20 കിലോമീറ്ററുകളോളം ദൂരത്തിൽ വാഹനങ്ങളുടെ നീണ്ട നിര, ഭക്ഷണമോ കുടിവെള്ളമോ ടോയ്ലറ്റിൽ പോലും പോകാനാവാതെ മണിക്കൂറുകളോളം കടുത്ത ചൂടിൽ ഉരുകി ആയിരക്കണക്കിന് യാത്രക്കാര്...മുംബൈയെ വലച്ച ഗതാഗതക്കുരുക്കിന് ഒടുവിൽ 33 മണിക്കൂറുകൾക്ക് ശേഷം പരിഹാരമായിരിക്കുകയാണ്. മുംബൈ- പൂനെ എക്സ്പ്രസ് പാതയിൽ വ്യാഴാഴ്ച പുലര്ച്ചെയോടെയാണ് ഗതാഗതം പുനഃസ്ഥാപിച്ചത്.
മലയോര ഖണ്ടാല ഘട്ട് സെക്ഷനിൽ ഒരു ഗ്യാസ് ടാങ്കർ മറിഞ്ഞതിനെത്തുടർന്ന് ചൊവ്വാഴ്ച വൈകിട്ടോടെ കുരുക്ക് ആരംഭിക്കുന്നത്. ബുധനാഴ്ച അഡോഷി ടണലിന് സമീപം ഗ്യാസ് ടാങ്കർ നിറച്ചിരുന്ന ടാങ്കർ വ്യാഴാഴ്ച രാവിലെ നീക്കം ചെയ്തതായി വാർത്താ ഏജൻസിയായ പിടിഐ റിപ്പോർട്ട് ചെയ്തു. അപകടസ്ഥലത്ത് നിന്ന് തീപിടിക്കുന്ന വാതകം വഹിച്ച ടാങ്കർ നീക്കിയതോടെ പുലർച്ചെ 1.46 ന് മുംബൈയിലേക്കുള്ള കാരിയേജ് വേയിൽ ഗതാഗതം പുനഃസ്ഥാപിച്ചതായി മഹാരാഷ്ട്ര സംസ്ഥാന റോഡ് വികസന കോർപ്പറേഷനിലെ (എംഎസ്ആർഡിസി) ഉദ്യോഗസ്ഥൻ പറഞ്ഞു.
ഗതാഗതക്കുരുക്ക് മൂലം മുംബൈക്കും പൂനെക്കും ഇടയിലുള്ള 90 കിലോമീറ്റര് ദൈര്ഘ്യമുള്ള പാതയിൽ ആയിരക്കണക്കിനാളുകളാണ് കുടുങ്ങിയത്. സ്ത്രീകളും കുട്ടികളും ഉൾപ്പെടെയുള്ള യാത്രക്കാർ ഭക്ഷണമോ വെള്ളമോ ടോയ്ലറ്റ് സൗകര്യമോ ഇല്ലാതെ മണിക്കൂറുകളോളം വാഹനങ്ങളിൽ കുടുങ്ങിക്കിടന്നു. ട്രാഫിക് ബ്ലോക്കിന്റെ ഗൗരവം കണക്കിലെടുത്ത് മുഖ്യമന്ത്രി ദേവേന്ദ്ര ഫഡ്നാവിസ് സംഭവത്തെക്കുറിച്ച് അന്വേഷിക്കാൻ ഉത്തരവിടുകയും ഭാവിയിൽ ഇത്തരം അടിയന്തര സാഹചര്യങ്ങൾ നേരിടുന്നതിനുള്ള ശിപാർശകൾ സഹിതം ഒരു റിപ്പോർട്ട് സമർപ്പിക്കാൻ മഹാരാഷ്ട്ര സംസ്ഥാന റോഡ് വികസന കോർപ്പറേഷൻ (എംഎസ്ആർഡിസി) ഉദ്യോഗസ്ഥരോട് നിർദേശിക്കുകയും ചെയ്തു.
21 ടൺ പ്രൊപിലീൻ വാതകം നിറച്ച ടാങ്കറാണ് മറിഞ്ഞത്. ടാങ്കറിൽ നിന്ന് പ്രൊപിലീൻ വാതകം ബുധനാഴ്ച രാത്രി വൈകി മറ്റ് ടാങ്കറുകളിലേക്ക് മാറ്റുകയും ഹെവി ഡ്യൂട്ടി ക്രെയിനുകളുടെ സഹായത്തോടെ അപകടത്തിൽപ്പെട്ട വാഹനം നീക്കം ചെയ്യുകയും ചെയ്തതായി എംഎസ്ആർഡിസി ഉദ്യോഗസ്ഥൻ പറഞ്ഞു.നീക്കം പൂർത്തിയായതിനുശേഷം ചുരത്തിലെ വാഹന ഗതാഗതം ക്രമേണ സാധാരണ നിലയിലായി, എന്നിരുന്നാലും നിരവധി ഭാരമേറിയ വാഹനങ്ങൾ വഴിയിൽ കുടുങ്ങിയതിനാൽ കുറച്ചുനേരം ഗതാഗതക്കുരുക്ക് തുടർന്നു.