ന്യൂഡൽഹി: ഡൽഹിയിലെ രൂക്ഷമായ വായുമലിനീകരണം പരിഹരിക്കുന്നതിനായി ആക്ഷൻ പ്ലാൻ പ്രഖ്യാപിച്ച് സർക്കാർ. 'എയർ പൊല്യൂഷൻ മിറ്റിഗേഷൻ ആക്ഷൻ പ്ലാൻ 2026' എന്ന് പേരിട്ടിരിക്കുന്ന പദ്ധതിയുടെ ഭാഗമായി ഈ വർഷം നവംബർ 1 മുതൽ ഡൽഹിയിലേക്ക് ബിഎസ്-6 (BS-VI) വ്യവസ്ഥകൾ പാലിക്കുന്നതോ, സിഎൻജി, ഇലക്ട്രിക് എന്നിവയിൽ പ്രവർത്തിക്കുന്നതോ ആയ ചരക്ക് വാഹനങ്ങൾക്ക് മാത്രമേ പ്രവേശനം അനുവദിക്കുകയുള്ളൂ.
പഴയ ഡീസൽ വാഹനങ്ങൾ മൂലമുണ്ടാകുന്ന മലിനീകരണം പരമാവധി കുറയ്ക്കുക എന്നതാണ് ഇതിലൂടെ ലക്ഷ്യമിടുന്നത്. മുഖ്യമന്ത്രി രേഖാ ഗുപ്തയുടെ നേതൃത്വത്തിൽ നടന്ന ഉന്നതതല യോഗത്തിന് ശേഷമാണ് പുതിയ ആക്ഷൻ പ്ലാൻ പുറത്തിറക്കിയത്. നയപരമായ പ്രഖ്യാപനത്തിനപ്പുറം, സാങ്കേതികവിദ്യയുടെ സഹായത്തോടെ നിയമങ്ങൾ കർശനമായി നടപ്പിലാക്കാനാണ് സർക്കാർ ഒരുങ്ങുന്നത്.
പദ്ധതിയിലെ മറ്റ് പ്രധാന തീരുമാനങ്ങൾ:
വാഹനങ്ങളിൽ നിന്നുള്ള പുക, റോഡിലെ പൊടി, നിർമാണ പ്രവർത്തനങ്ങൾ, വ്യവസായ ശാലകളിൽ നിന്നുള്ള മലിനീകരണം എന്നിവ കൃത്യമായി നിരീക്ഷിക്കാൻ ആർട്ടിഫിഷ്യൽ ഇന്റലിജൻസിന്റെ സഹായത്തോടെയുള്ള പുതിയ പോർട്ടലുകളും സെൻട്രലൈസ്ഡ് ഗ്രീൻ വാർ റൂമും സജ്ജമാക്കുമെന്ന് സർക്കാർ വ്യക്തമാക്കി. ജനങ്ങൾക്ക് ശുദ്ധവായു ഉറപ്പാക്കുന്നതിനായുള്ള വലിയ ചുവടുവെപ്പാണ് ഈ കർമപദ്ധതിയെന്ന് മുഖ്യമന്ത്രി രേഖാ ഗുപ്ത കൂട്ടിച്ചേർത്തു.