വാരണാസി-ലഖ്നൗ ഹൈവേയിൽ ടാങ്കർ മറിഞ്ഞു; വൈറലായി ചെളിയിൽ നിന്ന് എണ്ണ കോരുന്ന ഗ്രാമവാസികളുടെ വിഡിയോ

ലക്നൗ: ഉത്തർപ്രദേശിലെ അമേഠിയിൽ ചെളിയിലേക്ക് മറിഞ്ഞ ടാങ്കറിൽ നിന്ന് നാട്ടുകാർ ശുദ്ധീകരിച്ച എണ്ണ കോരിയെടുത്ത് കൊണ്ടുപോകുന്ന വിഡിയോ സോഷ്യൽ മീഡിയയിൽ വൈറലാണ്. ചൊവ്വാഴ്ച രാവിലെ വാരണാസി-ലഖ്‌നൗ ഹൈവേയിലെ കതോറ ഗ്രാമത്തിന് സമീപമാണ് സംഭവം. ഒരു എക്സ് ഉപയോക്താവ് പങ്കിട്ട വീഡിയോയിൽ ചെളിയിൽ നിന്ന് ആളുകൾ ശുദ്ധീകരിച്ച എണ്ണ കോരിയെടുക്കുന്നത് കാണാം. ഡ്രൈവറെ സഹായിക്കുന്നതിന് പകരം ഒഴുകിയ എണ്ണ ശേഖരിക്കാൻ നാട്ടുകാർ ബക്കറ്റുകളും ക്യാനുകളുമായി ഓടുകയായിരുന്നു.

സുൽത്താൻപൂരിൽ നിന്ന് ലഖ്‌നൗവിലേക്ക് പോകുകയായിരുന്ന ടാങ്കർ നിയന്ത്രണം വിട്ട് മറിയുകയായിരുന്നു. ബരാബങ്കിയിലെ ബഹാദൂർപൂർ ഹൈദർഗഡിലെ രാംരാജ് എന്ന ഡ്രൈവർ അപകടത്തിൽ ഗുരുതരമായി പരിക്കേറ്റു. എന്നിരുന്നാലും പരിക്കേറ്റ ആളെ സഹായിക്കാൻ ഓടിയെത്തുന്നതിനുപകരം ഒഴുകിയെത്തിയ ശുദ്ധീകരിച്ച എണ്ണ കോരിയെടുക്കാനാണ്, പ്രഥമശുശ്രൂഷയ്ക്ക് പകരം ടിന്നുകൾ, ബക്കറ്റുകൾ, ബാരലുകൾ എന്നിവയുമായി നിരവധി ഗ്രാമീണർ സംഭവസ്ഥലത്തേക്ക് ഓടിയെത്തിയത്.