'ജൻ സൂരജ് പാര്‍ട്ടിക്ക് വോട്ട് ചെയ്യുക, ജോലി തേടി ബിഹാറിന് പുറത്തുപോകേണ്ടി വരില്ല'; പ്രശാന്ത് കിഷോര്‍

സീതാമർഹി: വരാനിരിക്കുന്ന ബിഹാര്‍ നിയമസഭ തെരഞ്ഞെടുപ്പിൽ ജൻ സൂരജ് പാര്‍ട്ടിക്ക് വോട്ട് ചെയ്യണമെന്നും വോട്ട് ചെയ്താൽ ആളുകൾക്ക് ജോലി തേടി ബിഹാറിന് പുറത്തുപോകേണ്ടി വരില്ലെന്നും പാര്‍ട്ടി സ്ഥാപകനും തെരഞ്ഞെടുപ്പ് തന്ത്രജ്ഞനുമായ പ്രശാന്ത് കിഷോര്‍. സീതാമർഹിയിൽ നടന്ന തെരഞ്ഞെടുപ്പ് റാലിയിൽ സംസാരിക്കുകയായിരുന്നു അദ്ദേഹം.

"ജൻ സൂരജിന് വോട്ട് ചെയ്താൽ, ഛാത് ആഘോഷത്തിനായി നാട്ടിലേക്ക് വന്നവര്‍ക്കെല്ലാം ഒരിക്കലും തൊഴിൽ തേടി ബിഹാറിന് പുറത്തേക്ക് പോകേണ്ടി വരില്ല. ബിഹാറിലെ യുവാക്കൾക്ക് ബിഹാറിൽ തന്നെ തൊഴിൽ വേണം. ബിഹാറിൽ ഒരു ജനകീയ സർക്കാർ രൂപീകരിക്കാൻ പോകുന്നു" അദ്ദേഹം വ്യക്തമാക്കി. നിതീഷ് കുമാറിന്‍റെ നേതൃത്വത്തിലുള്ള എൻ‌ഡി‌എ സർക്കാരിനെതിരെ പരോക്ഷമായ ആക്രമണം അഴിച്ചുവിട്ട കിഷോര്‍ ഗുജറാത്തിൽ ഒരു ബുള്ളറ്റ് ട്രെയിൻ നിർമിക്കുമ്പോൾ, ബിഹാറിലെ യുവാക്കൾ ഛാത്ത് ഉത്സവത്തിനായി നാട്ടിലേക്ക് മടങ്ങാൻ പാടുപെടുകയാണെന്ന് അദ്ദേഹം ആരോപിച്ചു.

''ഇത് ജൻ സൂരജിന്‍റെ ജന്മഭൂമിയാണ്, മൂന്നര വർഷം മുമ്പ് പാർട്ടി നിലവിൽ വന്ന സ്ഥലം. ബിഹാറിലെ ജനങ്ങളുടെ രാഷ്ട്രീയ അടിമത്തം അവസാനിപ്പിക്കുമെന്ന് ഞങ്ങൾ തീരുമാനിച്ചു, അവിടെ അവർ ലാലുവിനെ ഭയപ്പെടുമ്പോൾ ബിജെപിക്ക് വോട്ട് ചെയ്യുന്നു, തിരിച്ചും... വരുന്ന 10-15 ദിവസങ്ങളിൽ, നിലവിലുള്ള ക്രമീകരണത്തിൽ തുടരണോ അതോ മാറ്റം കൊണ്ടുവരണോ എന്ന് ജനങ്ങൾ തീരുമാനിക്കേണ്ടതുണ്ട്... ഗുജറാത്തിൽ ഒരു ലക്ഷം കോടി രൂപയുടെ ബുള്ളറ്റ് ട്രെയിൻ നിർമിക്കപ്പെടുന്നു, അതേസമയം ബിഹാറിലെ യുവാക്കൾ ഛാത്തിന് വീട്ടിലേക്ക് മടങ്ങാൻ ട്രെയിനിൽ സീറ്റ് ലഭിക്കാതെ ബുദ്ധിമുട്ടുകയാണ് " കിഷോർ മാധ്യമപ്രവർത്തകരോട് പറഞ്ഞു.

അതേ ദിവസം തന്നെ, ഗോപാൽഗഞ്ചിൽ നിന്നുള്ള സ്വതന്ത്ര സ്ഥാനാർഥി അനുപ് കുമാർ ശ്രീവാസ്തവ പ്രശാന്ത് കിഷോറിന്റെ സാന്നിധ്യത്തിൽ ജൻ സൂരജ് പാർട്ടിയിൽ ഔദ്യോഗികമായി ചേർന്നു.ഗോപാൽഗഞ്ച് നിയമസഭാ മണ്ഡലത്തിൽ നിന്ന് ജൻ സൂരജ് സ്ഥാനാർഥി ശശി ശേഖർ സിൻഹ നാമനിർദേശ പത്രിക പിൻവലിച്ചതിനെ തുടർന്നാണിത്. സിൻഹയുടെ രാജിയെത്തുടർന്ന്, വരാനിരിക്കുന്ന തെരഞ്ഞെടുപ്പുകളിൽ ശ്രീവാസ്തവയ്ക്ക് പാർട്ടി പിന്തുണ നൽകിയിട്ടുണ്ട്.

2025ലെ ബിഹാർ തെരഞ്ഞെടുപ്പിൽ എൻഡിഎയും മഹാഗത്ബന്ധനും തമ്മിലാണ് മത്സരം. എൻഡിഎയിൽ ബിജെപി, ജനതാദൾ (യുണൈറ്റഡ്), ലോക് ജനശക്തി പാർട്ടി (രാം വിലാസ്), ഹിന്ദുസ്ഥാനി അവാം മോർച്ച (സെക്കുലർ), രാഷ്ട്രീയ ലോക് മോർച്ച എന്നിവ ഉൾപ്പെടുന്നു.രാഷ്ട്രീയ ജനതാദൾ നയിക്കുന്ന മഹാഗത്ബന്ധനിൽ കോൺഗ്രസ് പാർട്ടി, ദീപങ്കർ ഭട്ടാചാര്യ നയിക്കുന്ന കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്-ലെനിനിസ്റ്റ്) (സിപിഐ-എംഎൽ), കമ്മ്യൂണിസ്റ്റ് പാർട്ടി ഓഫ് ഇന്ത്യ (സിപിഐ), കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്) (സിപിഎം), മുകേഷ് സഹാനിയുടെ വികാസീൽ ഇൻസാൻ പാർട്ടി (വിഐപി) എന്നിവയാണ് കക്ഷികൾ.

പ്രശാന്ത് കിഷോറിന്റെ പാര്‍ട്ടി സംസ്ഥാനത്തെ 243 സീറ്റുകളിലും മത്സരിക്കുമെന്ന് പ്രഖ്യാപിച്ചിട്ടുണ്ട്. അതേസമയം കിഷോര്‍ മത്സര രംഗത്തില്ലെന്നും അറിയിച്ചിട്ടുണ്ട്. നവംബര്‍ 6,11 തിയതികളിലാണ് ബിഹാറിൽ വോട്ടെടുപ്പ്. നവംബർ 14 ന് വോട്ടെണ്ണൽ നടക്കും.