ഒരേ ടിക്കറ്റിൽ അടുത്ത ദിവസവും ട്രെയിനിൽ യാത്ര ചെയ്യാനാകുമോ? റെയിൽവെയുടെ ബ്രേക്ക് ജേര്‍ണി നിയമത്തെക്കുറിച്ചറിയാം

ഡൽഹി: ദീര്‍ഘദൂര ട്രെയിൻ യാത്രക്കിടയിൽ ഏതെങ്കിലും ഒരു നഗരത്തിൽ ഒരു ബന്ധുവിന്‍റെ അടുത്ത് കുറച്ചുനേരം തങ്ങണമെന്ന് നിങ്ങൾ ആഗ്രഹിക്കുകയാണെങ്കിൽ ഇന്ത്യൻ റെയിൽവെയുടെ പ്രത്യേക നിയമം നിങ്ങളെ സഹായിക്കും. യാത്രയ്ക്കിടയിൽ ഒരിടത്ത് നിർത്തി പിന്നീട് തുടരുകയാണെങ്കിൽ പുതിയ ടിക്കറ്റ് എടുക്കേണ്ടി വരുമെന്നാണ് പല യാത്രക്കാരും കരുതുന്നത്.

എന്നാൽ 'ബ്രേക്ക് ജേർണി' (Break of Journey) നിയമപ്രകാരം, നിങ്ങളുടെ യാത്ര താത്കാലികമായി നിർത്തിവെക്കാനും പിന്നീട് അതേ ടിക്കറ്റ് ഉപയോഗിച്ച് തന്നെ ബാക്കി യാത്ര തുടരാനും സാധിക്കും. എന്നാൽ ഇതിന് ചില നിബന്ധനകളും വ്യവസ്ഥകളുമുണ്ട്.

എന്താണ് ബ്രേക്ക് ജേര്‍ണി നിയമം

ഇന്ത്യൻ റെയിൽവെയുടെ ചട്ടങ്ങൾ അനുസരിച്ച് ഒരു ടിക്കറ്റിൽ 500 കിലോമീറ്ററിൽ കൂടുതൽ ദൂരം സഞ്ചരിക്കുന്ന ഒരു യാത്രക്കാരന് ആ റൂട്ടിലെ ഏത് സ്റ്റേഷനിലും യാത്ര അവസാനിപ്പിക്കാൻ അര്‍ഹതയുണ്ട്. ഇതിനെയാണ് ബ്രേക്ക് ജേര്‍ണി നിയമം എന്ന് പറയുന്നത്. യാത്രയുടെ ആകെ ദൂരം 500 കിലോമീറ്റര്‍ കൂടുതലാണെങ്കിൽ , വഴിമധ്യേ ഏതെങ്കിലും ഒരു സ്റ്റേഷനിൽ ഇറങ്ങി രണ്ട് ദിവസം വരെ തങ്ങാൻ അനുവാദമുണ്ട്. യാത്ര ആരംഭിച്ച സ്റ്റേഷനിൽ നിന്ന് കുറഞ്ഞത് 500 കിലോമീറ്റർ പിന്നിട്ടതിന് ശേഷം മാത്രമേ ആദ്യത്തെ ബ്രേക്ക് ജേർണി എടുക്കാൻ പാടുള്ളൂ.ടിക്കറ്റിലെ ആകെ ദൂരം 1000 കിലോമീറ്ററിൽ കൂടുതലാണെങ്കിൽ, യാത്രയ്ക്കിടയിൽ രണ്ടുതവണ ഇത്തരത്തിൽ യാത്ര നിർത്തിവെച്ച് തുടരാൻ അനുവാദമുണ്ട്.

ശ്രദ്ധിക്കേണ്ട കാര്യങ്ങൾ

നിങ്ങളുടെ യാത്ര അവസാനിപ്പിക്കുന്നതിന്, നിങ്ങൾ ഇറങ്ങുന്ന സ്റ്റേഷനിലെ സ്റ്റേഷൻ മാസ്റ്ററോ അംഗീകൃത റെയിൽവേ ഉദ്യോഗസ്ഥനോ ടിക്കറ്റിൽ സ്റ്റേഷൻ കോഡും ഔദ്യോഗിക സ്റ്റാമ്പും - രേഖപ്പെടുത്തേണ്ടത് നിർബന്ധമാണ്. ഇതില്ലാതെ യാത്ര റദ്ദാക്കിയാൽ, സാധുവായ ടിക്കറ്റില്ലാതെ യാത്ര ചെയ്യുന്നതായി നിങ്ങളെ കണക്കാക്കാം, ഇത് പിഴയ്ക്ക് കാരണമായേക്കാം. രാജധാനി എക്സ്പ്രസ്, ശതാബ്ദി എക്സ്പ്രസ്, ജൻ ശതാബ്ദി എക്സ്പ്രസ് പോലുള്ള പ്രീമിയം ട്രെയിനുകളിൽ ഈ സൗകര്യമുണ്ടായിരിക്കില്ല. ഈ ട്രെയിനുകൾക്ക് പോയിന്റ്-ടു-പോയിന്റ് യാത്രാ നിരക്ക് ഘടനയും വ്യത്യസ്ത പ്രവർത്തനരീതിയുമാണ് ഉള്ളത്.

ഓൺലൈനായി ബുക്ക് ചെയ്യുന്ന ഇ-ടിക്കറ്റുകളിൽ നേരിട്ട് 'ബ്രേക്ക് ജേർണി' സൗകര്യം ലഭ്യമല്ല. നിങ്ങൾ സ്ലീപ്പർ അല്ലെങ്കിൽ എസി കോച്ചുകളിലാണ് യാത്ര ചെയ്യുന്നതെങ്കിൽ, വഴിമധ്യേ യാത്ര നിർത്തി പിന്നീട് തുടരുമ്പോൾ നിങ്ങളുടെ നിലവിലെ ബെർത്തോ സീറ്റോ അതേപടി നിലനിൽക്കുമെന്ന് ഉറപ്പുനൽകാനാവില്ല. യാത്രയുടെ ബാക്കി ഭാഗത്തേക്ക് റെയിൽവേയുടെ സാധാരണ യാത്രാ നിയമങ്ങളും വ്യവസ്ഥകളുമായിരിക്കും ബാധകമാകുന്നത്.