കോഴിക്കോട്: മുസ്ലിംകൾ അനർഹമായി പലതും നേടുന്നുവെന്ന വ്യാജ പ്രചാരണം നിരന്തരമായി തുടരുന്ന സാഹചര്യത്തിൽ സംസ്ഥാന സർക്കാർ ധവളപത്രമിറക്കണമെന്ന് എസ്.കെ.എസ്.എസ്.എഫ് ആവശ്യപ്പെട്ടു. മുസ്ലിംകൾക്ക് അർഹമായ ആനുകൂല്യങ്ങൾ പോലും ഇത് വരെ ലഭിച്ചിട്ടില്ല. സാമൂഹിക, വിദ്യാഭ്യാസ മേഖലകളിൽ ഈ വിവേചനം ഇന്നും പ്രകടമാണ്. വിവിധ കമ്മീഷനുകൾ ഇത് ചൂണ്ടിക്കാട്ടിയതുമാണ്. കേന്ദ്ര സംസ്ഥാന സർവീസുകളിലും പാർലമെന്റ്, നിയമസഭ അടക്കമുള്ള നിയമ നിർമാണ സഭകളിലും ജുഡീഷ്യൽ മേഖലയിലും മുസ്ലിം പ്രാതിനിധ്യം ജനസംഖ്യാനുപാതികമായി എത്രയോ പിന്നിലാണ്.
വസ്തുത ഇതായിരിക്കെ നിരന്തരം വിദ്വേഷപ്രചാരണങ്ങൾ നടത്തുന്നത് വർഗീയ ധ്രുവീകരണം ഉണ്ടാക്കാൻ മാത്രമേ സഹായകമാവൂ. ഇത്തരം കുറ്റകൃത്യങ്ങൾക്ക് തടയിടാൻ സംസ്ഥാന സർക്കാരിന് ഉത്തരവാദിത്തമുണ്ടെന്നും വർഗീയ പരാമർശങ്ങൾ നടത്തുന്നവർക്കെതിരെ മുഖം നോക്കാതെ നടപടി സ്വീകരിക്കണമെന്നും എസ്.കെ.എസ്.എസ്.എഫ് സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങൾ, ജനറൽ സെക്രട്ടറി ഒ.പി അഷറഫ് കുറ്റിക്കടവ് എന്നിവർ പ്രസ്താവനയിൽ ആവശ്യപ്പെട്ടു.