തിരുവനന്തപുരം: 'എമ്പുരാന്' കാണില്ലെന്ന് പ്രഖ്യാപിച്ച ബിജെപി സംസ്ഥാന അധ്യക്ഷന് രാജീവ് ചന്ദ്രശേഖറിനെ പരിഹസിച്ച് പ്രതിപക്ഷ നേതാവ് വി.ഡി സതീശന്.
'ഇന്നലെ സിനിമ കാണുമെന്ന് പറഞ്ഞ ബിജെപി സംസ്ഥാന അധ്യക്ഷന് ഇന്ന് സിനിമ കാണില്ലെന്ന് പറയുന്നു. ചിലര്ക്ക് ഉച്ച ആയാലും നേരം വെളുക്കില്ല. അങ്ങനെയെങ്കില് എമ്പുരാന് കാണും'- വി.ഡി സതീശന് ഫേസ്ബുക്കില് കുറിച്ചു.
ഫേസ്ബുക്ക് പോസ്റ്റിന്റെ പൂര്ണരൂപം:
'എമ്പുരാന് കാണില്ല, കാണരുത്, ബഹിഷ്കരിക്കണം, എടുത്ത ടിക്കറ്റ് ക്യാന്സല് ചെയ്യണം. അങ്ങനെ സംഘ്പരിവാര് അഹ്വാനമാണ് എങ്ങും. ഇന്നലെ സിനിമ കാണുമെന്ന് പറഞ്ഞ ബിജെപി സംസ്ഥാന അധ്യക്ഷന് ഇന്ന് സിനിമ കാണില്ലെന്ന് പറയുന്നു. ചിലര്ക്ക് ഉച്ച ആയാലും നേരം വെളുക്കില്ല.
അങ്ങനെയെങ്കില് എമ്പുരാന് കാണും'
നേരത്തെ 'എമ്പുരാനും' അണിയറ പ്രവർത്തകർക്കും പിന്തുണയുമായും പ്രതിപക്ഷ നേതാവ് രംഗത്ത് എത്തിയിരുന്നു. സംഘ്പരിവാറിന് ചരിത്രത്തെ കുറിച്ച് കാര്യമായ അറിവില്ല. മാത്രമല്ല ചരിത്രത്തെ വളച്ചൊടിച്ചാണ് ശീലം. ആവിഷ്കാര സ്വാതന്ത്ര്യം എന്നാൽ തങ്ങൾക്ക് അനുകൂലമായി സൃഷ്ടിക്കപ്പെടുന്ന നിർമ്മിതികൾക്കുള്ള സ്വാതന്ത്ര്യമാണെന്നാണ് സംഘ്പരിവാർ കരുതുന്നതെന്നും ഫേസ്ബുക്കിലെഴുതിയ കുറിപ്പില് വി.ഡി സതീശന് വ്യക്തമാക്കിയിരുന്നു.
ഇതിനിടെ 'എമ്പുരാനില്' ഖേദം പ്രകടിപ്പിച്ച് മോഹന്ലാല് രംഗത്ത് എത്തി. ഒരു കലാകാരന് എന്ന നിലയില് തന്റെ ഒരു സിനിമയും ഏതെങ്കിലും രാഷ്ട്രീയ പ്രസ്ഥാനത്തോടോ, ആശയത്തോടോ, മതവിഭാഗത്തോടോ വിദ്വേഷം പുലര്ത്തുന്നില്ല എന്ന് ഉറപ്പുവരുത്തേണ്ടത് തന്റെ കടമയാണെന്ന് അദ്ദേഹം പറഞ്ഞു. അതുകൊണ്ടു തന്നെ പ്രിയപ്പെട്ടവര്ക്ക് ഉണ്ടായ മനോവിഷമത്തില് തനിക്കും എമ്പുരാന് ടീമിനും ആത്മാര്ത്ഥമായ ഖേദമുണ്ടെന്നും മോഹന്ലാല് ഫേസ്ബുക്ക് പേജില് കുറിച്ചു.
കുറിപ്പ് ചിത്രത്തിന്റെ സംവിധായകന് പൃഥ്വിരാജും നിര്മാതാവ് ആന്റണി പെരുമ്പാവൂരും ഷെയര് ചെയ്തു.